ده‌وڵه‌ت كوردى خه‌ویگ راسكانى!!

شفق نيوز

ڕى له‌دامه‌زرانن ده‌وڵه‌ت كوردى بگرن و رووژانه‌ ژیر وه‌ژیر و ئاشكرا گرده‌و بوون و خوه‌یان كه‌نه‌ ناو عراقاو گرووپه‌یل ده‌سكردیان وه‌ مه‌هانه‌ى جووراوجوور وه‌ك زوڵمكردن له‌ كه‌مایه‌تى و كاریگه‌رى ده‌وڵه‌ت كوردى له‌وڵاته‌یل هاوساو چشته‌یل تر خه‌ریك كاركردنن، ئنجا ئه‌را كیشه‌ى كورد و ترس له‌ دامه‌زرانن ده‌وڵه‌ت كوردى ئاماده‌ن چه‌وپووشى له‌كیشه‌یل كویه‌ن تاریخى بكه‌ن و دژ وه‌كورد یه‌كه‌وبگرن و په‌یه‌وه‌ندییان خاستر و بته‌وتر بكه‌ن و رووژانه‌ سه‌ردان یه‌كترى بكه‌ن.

ئى دیارده‌یله‌ بوینه‌سه‌ هووكار دروسكردن سێ كوچگه‌ى شووم و ڕخه‌وبه‌ریگ ك تویه‌نیم ناوى بنه‌یم سێ كوچگه‌ى دژ وه‌كورد.

ئى مه‌سه‌له‌ راسییگ  گرینگتر ئه‌ڕامان ده‌رخه‌یگ، ئه‌ویش ئه‌وه‌سه‌ ك ده‌وڵه‌ت كوردى مه‌حاڵ نیه‌، وه‌نا ئه‌گه‌ر نه‌‌و، ئه‌ى ئه‌ڕاچه‌ دوشمنه‌یلمان‌ له‌یوا په‌شوكیانه‌و گشت دوشمنه‌یلیش ئه‌و راسیه‌ وه‌ گونجیاگ جى وه‌جیكردن زانن ك كورد نه‌وگ! وه‌ل ئه‌و هه‌مگه‌ سیناریۆى ئه‌ڵڵاجه‌ویه‌، ده‌سڵاتداره‌یل كورد نووڕید بڕیگ له‌لیان چن ئه‌ڕا لاى دوشمنه‌یل كویه‌ن كوردو له‌ هه‌مان وه‌خت وه‌براى خوه‌یان زاننه‌یان! ئه‌وانه‌ك تیه‌نگ خوین كوردن.

ناحه‌زه‌یل كورد ك ئاشكراترینیان وڵاته‌یل هاوساى عراقن، فره‌ وه‌ئاشكراو تون وتیژى ئاشكراو دوشمنكارانه‌یگه‌وه‌ له‌ره‌سانن یا ئعلام و میدیایه‌یل جه‌هانه‌وه‌ هه‌ڕه‌شه‌ له‌ وجوود كورد و ده‌وڵه‌ت كوردى كه‌ن. بیجگه‌ ئه‌وه‌یش ره‌سانن(اعلام) عه‌ره‌بییش وه‌ درووكردن فره‌یگه‌وه‌ كورد وه‌ هاوپه‌یمان ئسرائیل و دوشمن نه‌ته‌وه‌ى عه‌ره‌ب زانن. جى داخه‌ ك هیمان بڕیگ له‌ ده‌سڵاتداره‌یل كورد له‌ئاست دعایه‌ى عه‌ره‌ب و هاوسه‌یلیان بیده‌نگن، ك سه‌ره‌كیترین هووكاریش چووگه‌وه‌ ئه‌را یه‌كنه‌گرتن ماڵ كورد. ئنجا ئه‌و خاڵه‌یله‌ ك له‌ى وه‌خته‌یل نازگه‌ بایه‌سه‌ له‌وه‌رچه‌و بگیریه‌ن، ئه‌ویش:

1- یه‌كه‌وگرتن ماڵ كورد له‌ژیر یه‌ك دروشم یا شعار و یه‌ك په‌رچه‌م، ك ئه‌ویش كورد و كوردایه‌تیه‌، نه‌ك حزبایه‌تى!!

2- جواودانه‌وه‌ى ئه‌وانه‌ك ته‌نیا هه‌ر وه‌ناو دووسن، ك ژیر وه‌ژیر هه‌ر خه‌ریك جه‌نگ سیاسى و تیرۆرستیین.

3- جواودانه‌وه‌ى ره‌سانن یا ئعلام و نویسه‌ره‌یل شۆڤێنى عه‌ره‌ب و تورك و فارس وه‌ نویسانن و وه‌رپه‌رچدانه‌وه‌ى دوشمنه‌یل دروسكریاگ تازه‌ى ملله‌ت كورد.

4- كه‌ركووك كیشه‌ یا شار حزبیگ یا ده‌سه‌و تاقمیگ نیه‌، چوینكه‌ خاوه‌نداریه‌تى كه‌ركووك ملله‌تیگه‌و كه‌س نیه‌تویه‌نى وه‌بى مووڵه‌ت له‌ مه‌سه‌له‌ى ملله‌ت بچووگه‌ وڵاتیگ  دژ وه‌ كورد ئه‌را چه‌واشه‌كردن زیاتر كیشه‌ى ره‌واى كورد.

بیگومان ملله‌ت كورد وه‌ك ملله‌ته‌یل تر دونیا هه‌ق چاره‌نویس خوه‌ى دیریگ له‌ بڕیارداین، وه‌ل ئه‌وه‌یشا ریفراندۆم و پرسكارى هه‌ق گشت نه‌ته‌وه‌یگه‌و هویچ كه‌سیگ نیه‌تویه‌نیگ ئه‌و هه‌قه‌ زه‌فت بكا، ئنجا ئایا ئه‌گه‌ر باس له‌ دیموكراسى و ئازادى كریه‌یگ ئه‌ى له‌وه‌رچه‌ ئه‌را كورد بڤه‌س؟ بیگومان هه‌ركه‌سیگ توایگ هه‌ق ره‌واى كورد جى وه‌جى نه‌وگ بایه‌سه‌ بخریه‌یگه‌ پرس وپرسكاریه‌وه‌.