كورد فه‌يلى سه‌رئه‌كه‌فێد

شفق نيوز

ئى دوسيه‌يله‌ له‌لايه‌ن كه‌سه‌يليگ تايبه‌تمه‌ند و ئه‌كاديمى خريا ڕوى وهه‌ر يه‌كيگ وه‌ گووه‌رى تايبه‌تمه‌ندى ئه‌كاديمى و پيشه‌يى خوه‌ى، له‌وانه‌يش دوسيه‌ى مێژوو و وجوود جوگرافى له‌لايه‌ن توێژه‌ر له‌ كاروبار كورده‌يل فه‌يلى نمايش كريا ك ئه‌را ماوه‌ى ساڵه‌يل فريه‌يگه‌ وه‌ ريكخرياگه‌يل كورد كار ئه‌كا، وه‌لێ دوسيه‌ى ياسايى له‌لايه‌ن دادوه‌ريگ له‌ دادگاى تاوانه‌يل عراقى نمايش و باس كريا، ك شيه‌وكردنيگ ياسايى له‌باره‌ى تاوان له‌ناوبردن وه‌جه‌م پيشكه‌ش كرد.

دوسيه‌ى سياسى و ماف هاووڵاتيبوين و رۆڵ كومه‌ڵگاى ناوده‌وڵه‌تييش له‌ روى وه‌ڕوى بوينه‌وه‌ى ئه‌و تاوانه‌يله‌ ك هاته‌ تويش كورده‌يل فه‌يلى له‌لايه‌ن مامۆستايگ زانكۆيى تايبه‌تمه‌ند وه‌ په‌ويه‌نديه‌يل ناوده‌وڵه‌تى خريا ڕوى، دوسيه‌ى مافه‌يل ئاده‌ميزاد و مه‌ينه‌تيه‌يل كووچ وه‌پيكردن و بيسه‌روشوونكردن جايه‌ڵ جوانه‌يليش له‌لايه‌ن چالاكوانيگ له‌ مافه‌يل ئاده‌ميزاد خريا روى و باس له‌ نموونه‌يل راسكانى و ئه‌و مه‌ويسيه‌ ك كرد ك هاته‌ تويش خيزانه‌يل فه‌يلى له‌ وه‌رجه‌و دوياى كووچ وه‌پيكردن زووره‌ملى.

دوسيه‌ى په‌نجه‌ميش يه‌كيگ له‌ دكتۆره‌يل كورد فه‌يلى خسته‌ى روى له‌بان ئه‌زموونى له‌ جموجويل نيشتمانى كوردستانى و رۆڵ كورد فه‌يلى له‌ به‌شدارى نه‌ك ته‌نيا جوور جه‌نگاوه‌ر، به‌ڵكوو جوور دامه‌زرنه‌ر له‌ گرينگترين حزب و جمشته‌يل كوردستانييش، ئمجا كومه‌ڵگاى ناوده‌وڵةتييش گووش له‌ يه‌كيگ له‌ شايه‌تحاڵه‌يل گرت ك باس له‌ ئه‌و شيواز دڕندانه‌ كرد ك له‌وه‌خت كووچ وه‌پيكردن هاته‌ تويش خيزانه‌يل فه‌يلى و ئه‌و مامڵه‌ى نائنسانيه‌ و دڕنده‌ ك ده‌رهه‌ق زيندانيه‌يل ئه‌نجام درياو دوياى ئه‌وه‌يش قاپى پرسيار و موداخله‌ واز كريا ك يه‌يش له‌و فريه‌يگ له‌و دوسيه‌يله‌ زياى كرد.

گشت كورده‌يل فه‌يلى ماف خوه‌يانه‌ وه‌ تايبه‌ت ئه‌وانه‌گ به‌شدارى ئى كۆنگره‌ كردنه‌ شانازى وه‌ ئه‌وه‌ بكه‌ن پيشكه‌شى كردنه‌ له‌ى كۆنگره‌ى ئۆرپيه‌، ك ئه‌را يه‌كه‌مجاره‌ تويه‌نستن ده‌نگ و مه‌ينه‌تيه‌يليان بڕه‌سننه‌ كومه‌ڵگاى ناوده‌وڵه‌تى و وه‌ى كاريشه‌ ئه‌وه‌ چه‌سپانن ك وه‌ ڕاسى رووڵه‌و نه‌وه‌ى ئه‌وانه‌ن ك كومه‌ڵه‌و خوه‌ندنگايه‌يل فه‌يلى دامه‌زراننه‌ له‌ ساڵه‌يل چل سه‌ده‌ى وه‌رين. جى باسيشه‌ ك گشت به‌شداربويه‌يل له‌ گشت ئنتماو ريره‌ويگ فكرى و يه‌ك دڵ و يه‌كهه‌ڵويست بوينه‌ و ئامانجيان وه‌ جددى ئه‌وه‌ بوى ئى كۆنگره‌ سه‌ربكه‌فێد و له‌شوونه‌يل جياجياى ئۆرپاوه‌ هاتوين وه‌ره‌و برۆكسل و له‌بان خه‌رج خوه‌يان تا ئسپاتى بكه‌ن ئه‌را گشت جه‌هان ك ئيمه‌ ملله‌تيگيم له‌ ئاست به‌رزيگ و تواناى قسه‌و خستنه‌ڕوى و به‌شدارى ديريم له‌ ئيچنه‌ بوونه‌يگ وه‌شيوه‌يگ ژيارى، وه‌ل ئه‌وه‌يشا بايه‌سه‌ باس له‌ به‌شدارى دوسه‌يلمان و دوسه‌يل كورد فه‌يلييش بكه‌يم، ك ئافره‌تيگ سويدى له‌ ره‌گه‌ز ئه‌فريقى له‌ باكوور سوێده‌و له‌بان خه‌رج خوه‌ى هاتوێد ئه‌را ئاماده‌بوين و به‌شدارى جوور هاوكارى ئافره‌ته‌ هاوڕيه‌گه‌ى ك كورد فه‌يلى بوى، وه‌لێ له‌ هه‌مان وه‌خت جى داخه‌ بڕيگ له‌ كورده‌يل فه‌يلييش ك نزيكتريش بوينه‌ له‌ شوون نيشته‌جى ئى ئافره‌ت سوێديه‌ ئاماده‌ نه‌وين و به‌شدارى ئه‌و كۆنگره‌ نه‌كردن، يه‌يش له‌وه‌ختيگ ك ئاگادار بوين له‌ وه‌خت ساكردن و شوون كۆنگره‌گه‌.

زوورم به‌شداربويه‌يل دوياى ته‌مامبوين كۆنگره‌گه‌ دانيشتنيگ فراوان وه‌خاتر مه‌زه‌نه‌كردن ساز كردن و دوياى ئه‌وه‌يش ليژنه‌يگ هه‌ڵوژرياو ناوى نريا ليژنه‌ى چه‌ودێرى له‌وه‌ر چه‌ودێريكردن ئاكامه‌يل ئه‌و كۆنگره‌ى گرينگه‌و ئاگاداركرددن گشتلايگ له‌ مه‌سه‌له‌ى بڕيار له‌لايه‌ن ئه‌ندامه‌يل په‌رله‌مان ئۆرپى ك ئه‌ويش له‌ڕى پۆست ئه‌لكترۆنى ئه‌را ئه‌وانه‌گ به‌شدار بوين له‌و كۆنگره‌و ناونيشان پۆست ئه‌لكترۆنى خوه‌يان دان، بيجگه‌ ئه‌وه‌يش گشت ئاماده‌بويه‌يليش شايه‌تى وه‌ سه‌ركه‌فتن ئى كۆنگره‌ دان و گرينگ له‌تى ئه‌وه‌ بوى ك كورده‌يل فه‌يلى تويه‌نستن تويه‌ميگ بكاڵن و به‌ردار بدێ و قاپييگ وه‌ره‌و چه‌سپانن كيشه‌گه‌يان واز بكه‌ن.

وه‌ل ئه‌وه‌يشا بايه‌سه‌ باس له‌ رۆل ديارى"ك ن ك" " كۆنگره‌ى نيشتمانى كوردستانى" بكه‌يم ئه‌را چه‌ودێريكردن كۆنگره‌گه‌و ئه‌و پيشوازى خاسه‌ ك له‌ به‌شداربويه‌يل كريا وه‌ل دابينكردن شوون و خزمه‌تگوزارى تر جوور خواردن و هووكاره‌يل جيوازكردن و دابينكردن هۆڵه‌يل باره‌گاى تايبه‌ت ئه‌را سازكردن دانيشتنه‌يل ئاماده‌كارى، ك يه‌يش نيشانه‌ى ئه‌وه‌سه‌ خه‌م كورد گشتى يه‌كيگه‌.

زيا كه‌ريم