بیلا گرده‌و بویمن

شفق نيوز

یا گشت پیكهاته‌یل ملله‌ت له‌وڵاتیگ  ك قانوون دیریگ له‌ گشت كرده‌ویگ ، بیگومان كاردانه‌وه‌(رد فعل) خوه‌ى دیریگ له‌بان ئاست ده‌سڵات و مه‌ردم وه‌گشتى، ئمجا دووسیه‌ یا مه‌له‌ف كیشه‌ى كورده‌یل فه‌یلى باوه‌تیگه‌ قانوونى و ڕه‌سمى ك ده‌سڵاته‌یل حكوومه‌ت وه‌رپرسیاریه‌تى چه‌ودیرى له‌ جى وه‌جیكردنى گرنه‌ مل دویر له‌ مانایه‌یل سیاسى.

ئاشكراس ئه‌را گشت كه‌سیگ ك ئیمه‌ رژیمیگ سیاسى زوڵم له‌لیمان كرد جویر ئه‌وه‌ك له‌ مه‌ردمان تر زوڵم كرد، وه‌ل ئه‌وه‌یشا گویڕیانیگ  ڕویدا له‌ رژیم حوكم له‌ عراق و ئیمه‌یش له‌لى نه‌ف وه‌رگرتیم جویر باقى چینه‌یل كوومه‌ڵگا، وه‌لى له‌یرا جیاوازى فره‌یگ  هه‌س له‌ناونى ئاست و قه‌واره‌ى ده‌سكه‌فته‌یل و زه‌ره‌ده‌یل ئیمه‌و جووره‌یلى له‌ناونى ئیمه‌و مه‌ردمان تر.

ئه‌و رژیم سته‌مكاره‌ ك زوڵم له‌ ئیمه‌ كرد رمیا، وه‌لى هه‌قه‌یلمان مه‌ندگه‌و له‌ده‌س نیه‌چووگ. وه‌ هویچ جووریگ راس نیه‌ ئیمه‌ گشت چشتیگ  بخه‌یمنه‌ بان ئه‌وه‌ك هساو بوى له‌بان ئه‌و رژیمه‌و جویر سه‌ران رژیم تاوانبار وه‌یه‌ك شیوه‌ ته‌ماشایان بكه‌یمن چوینكه‌ ئه‌و شماره‌ دیاریكریاگ بوین له‌وانه‌ك كه‌فتنه‌ وه‌ر حوكم دادگا دویاى چه‌سپانن تاوانه‌یل له‌ناوبردن وه‌جه‌م له‌بانیان، ك ئه‌وانیش شماره‌ى كه‌میگ  بوین له‌و شماره‌ى راسه‌قینه‌ى بكوشه‌یله‌.

بیگومان ئمڕوو قانوون ها وه‌لماناو ملله‌تیش له‌گشت وه‌ختیگ هه‌ر وه‌لمانا بوینه‌، دى ته‌نیا چشتیگ  نایه‌كگرتگ  ئه‌و وتار یا ختاب یه‌كگرتگه‌سه‌ ك گشت فه‌یلیه‌یل گرده‌و ئه‌كا، وه‌لى جى داخه‌ ئیمه‌ هساو ئه‌را مه‌ترسى ئى كاره‌ نیه‌كه‌یم و دگان وه‌پیا نیه‌نه‌یم، خاسترین نموونه‌یش له‌بان ئى به‌شبه‌شه‌وبوینه‌ ئه‌وه‌سه‌: ئیمه‌ تائیسه‌ نه‌تویه‌نستیمنه‌ ئه‌و زوڵم و مه‌ینه‌تیه‌یل خوه‌مانه‌ ك هاته‌ تویشمان گرده‌و بكه‌یم له‌لاى خوه‌مان ئه‌رشیفى بكه‌یم، له‌وه‌رانوه‌ر هه‌وڵ و ته‌قلاى فره‌ى بى قانجازیگ له‌ ئه‌نجام له‌وه‌رچه‌ونه‌گرتن هه‌ڵكه‌فت یا واقع خوه‌مان.

فه‌یلیه‌یل له‌وه‌ختى وه‌ته‌نیا كار كه‌ن سه‌ركه‌فتگن ئه‌را خوه‌یان، وه‌تایبه‌ت له‌ى ڕووژگاره‌و بیجگه‌ ئه‌وه‌یش وجوود ده‌یه‌ها كه‌سایه‌تیه‌یل به‌رز له‌ بوار یا مه‌جاله‌یل جیاجیا نموونه‌یگه‌ له‌ى باوه‌ته‌وه‌، وه‌لى تائیسه‌ شكه‌ست خواردنه‌ له‌ یه‌كه‌وناین هویروڕاو هه‌ڵویسته‌یلیان تا توانایى و كاره‌یل خوه‌یان له‌تى گرده‌و بووگ، هووكار سه‌ره‌كى ئى كاریشه‌ وه‌ڕاى من هسكردنه‌ وه‌ گومبوین له‌ناونى ئنتماى نه‌ته‌وه‌یى یا مه‌زه‌وى ك بویه‌ى مایه‌ى خه‌مسه‌ردى وچویچیان ئه‌و توانایه‌یله‌.

دیاره‌ ك هویچ ره‌سین و په‌یوه‌ندییگ مان وه‌بى مه‌مه‌ر وكه‌م وكوڕى نیه‌و هویچ نزیكه‌وبوینیگیشمان بى دویره‌وكه‌فتن له‌یه‌كترى نیه‌، ئمجا ئه‌گه‌ر شماره‌ى كه‌میگ  له‌ پابه‌ندیمان وه‌رانوه‌ر یه‌كترى ئاڵشت بویاتاگ ئه‌را كرده‌وه‌ له‌ به‌رژه‌وه‌ندى كیشه‌گه‌مان، ئه‌وه‌ بیگومان هه‌وه‌جه‌ وه‌ هساوكردن شماره‌مان نه‌یاشت له‌ پۆسته‌یل حكوومه‌ت ك وه‌ناو بڕى كه‌س ناوگى بڕن، به‌ڵكم ده‌سكه‌فته‌یل له‌وه‌رچه‌و گرتیایم، دویاجاریش یه‌ خه‌یمنه‌ هویر ك مه‌ردم ئویشن ئیمه‌ وه‌ل بیگانه‌ دڵنه‌رمیمن و له‌هه‌مان وه‌خت وه‌ل خوه‌مانیشا دڵڕه‌قیم، ئایا ئى قسه‌ له‌جى خوه‌یه‌؟

 

عه‌لى حسێن فه‌یلى