ره‌نجيان و بڕيان

شفق نيوز

له‌ليانيش هه‌س نه‌ك هه‌ر ئه‌وه‌يش، به‌ڵكوو وه‌ قسه‌يل جوراوجووريش تومه‌تبارديش ئه‌كه‌ن و وه‌ قسه‌ی ناڕه‌واو جه‌رگبريگ ژه‌هر كوشنده‌ ده‌نه‌ خوه‌ردد و تير نكتيژيگ ده‌نه‌ تك دڵه‌ پاكه‌گه‌دو هه‌ر وه‌و ژانه‌و هيلنه‌ده‌ جی و حاشا له‌گشت يادگاريه‌يل رووژه‌يل گوزه‌يشتد ئه‌كه‌ن و له‌يوا ته‌ماشا ئه‌كه‌ن ك غه‌ڵه‌ت فريه‌ گه‌ورايگ ده‌رهه‌قيان ئه‌نجام دايده‌.

ئمجا له‌يرا ت ناچاريد له‌ خوه‌د بپرسيد، ئايا من چه‌ كردمه‌؟ تاوانم چه‌س؟ ئايا ئه‌راچه‌ له‌يوا له‌ليم هه‌ڵگه‌ردياوه‌؟ ئه‌ی ئی هه‌مگه‌ رووژگاره‌ ك وه‌يه‌كه‌و بويم و يادگاری خوه‌شخوه‌ش له‌تی داشتيم چيه‌ كوو؟ ئه‌ی ئه‌گه‌ر دووس و براده‌رمه‌ ئه‌را پشت له‌ليم كردو حاشا له‌ وجوودم كرد؟ ئايا ئی ره‌نجيان وبڕيانه‌ مانای چه‌ بوی؟

وه‌ل ئه‌وه‌يشا سه‌ختترين چشت ئه‌وه‌سه‌ هه‌نای پرسيار هووكاره‌گه‌ی له‌ليان ئه‌كه‌يد جواود نايه‌نه‌و! دوياخريش كورد وه‌ته‌نی(دونيا ده‌ور ده‌وره‌)شايه‌ت دويای ماوه‌يگ هه‌وه‌جه‌ وه‌پيد داشت سه‌رله‌نوو ڕی ماڵد بگريده‌وه‌ر ‌و بايدو بخوازيد جوور جاران وه‌ليا بخه‌نيد و بنيشيد و بويشيد و برشنيد ئه‌رای!!

وه‌لی ئايا ئه‌تويه‌نيم ئه‌و هه‌ڵويست پڕ ژانه‌ له‌ هويره‌و بووه‌يم و جوور جاران سفره‌ی دڵمان ئه‌رايان واز بكه‌يم؟ ئايا جوور جاران ئه‌و په‌يوه‌نديه‌ وه‌رده‌وام مينيد و گشت چشتيگ ئاڵشت ئه‌دێ ئه‌را شيوه‌ی جارانی؟ ئی ره‌نجيان بيهووده‌ هه‌ڵبه‌ته‌ هووكاريگ ديريد، وه‌نا چوين ئی هه‌ڵويسته‌يله‌ رويدا، بيگومان ئه‌را په‌ياكردن ئی هووكاره‌يليشه‌ هه‌وه‌جه‌ وه‌ سه‌بر و ماريفه‌ت و دانايی ديريم تا بتويه‌نيم سه‌رچه‌وه‌ی ئی ره‌نجيانه‌ بوينيمنه‌و، ك شايه‌ت كه‌سه‌يليگ له‌ خودانه‌ترس و بشيون هه‌وڵ ئی مه‌سه‌له‌ دانه‌ له‌وه‌ر وه‌ديهاوردن مه‌رام ناپاكيان و هه‌ر له‌وه‌ر ئه‌وه‌يش حاڵه‌ت ناكووكی له‌ناونی ئاده‌ميزاده‌يل دروس ئه‌كه‌ن وه‌خاتر گرژه‌وكردن په‌يوه‌نديه‌يل ژيان.

عه‌لی به‌ياخی