گریه‌كووره‌یل نوویگ له‌وه‌رده‌م كورده‌یل فه‌یلى

شفق نيوز

له‌ باوگ و داڵگیگ عیراقى په‌یا بوود وه‌ عیراقى ده‌یده‌ قه‌ڵه‌م و ڕه‌گه‌زنامه‌ى عیراقى دوباره‌ دریه‌یده‌ ئه‌و كه‌سه‌یله‌ له‌وه‌ر هووكاره‌یل سیاسى و ڕه‌گه‌زپه‌رستى و مه‌زه‌وى له‌ لیان خستنه‌سه‌ى، یه‌یشه‌ لایه‌ن نویسریاى قانوونه‌، وه‌لى له‌ لایه‌ن جیوه‌جیكردنه‌وه‌ بڕ فره‌یگ ته‌گه‌ره‌ و گیروگرفت و ڕیگر بووده‌ تویش ڕووڵه‌یل ئه‌و كورده‌یل فه‌یلیه‌ ك ته‌سفیر كریانه‌ و ئیسه‌ توان ڕه‌گه‌زنامه‌ى عیراقى وه‌ربگرن.

له‌ى باوه‌ته‌ هاووڵاتى فازڵ جه‌بار ئاغالى فه‌یلى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" دویاى عه‌دامكردن باوگم، خوه‌م خێزانه‌گه‌م ته‌سفیر كریایم؛ و دویاى ڕمیان ڕژیم هاتیمنه‌و ئه‌را وڵات خوه‌مان و وه‌رج له‌ نزیكه‌ى دو ساڵ داواكارى پیشكه‌شكردم ئه‌را وه‌رگرتن ڕه‌گه‌زنامه‌ى عیراقى، وه‌لى تویش گیروگرفت ئه‌وه‌ هاتم ك باوگ و داڵگم له‌ ده‌یشت دادگا زه‌واج كردنه‌، و عه‌قده‌گه‌یان له‌ دادگا تۆمار نه‌كردنه‌ تا ئه‌وه‌ سابت بكه‌ن هاوسه‌ر یه‌كتر بوینه‌؛ له‌وه‌ر ئه‌وه‌ دادگا ئیسه‌ داوا له‌لیم كه‌ید (مقتبس حكم) و (شهاده‌ وفاه‌) بارم وه‌نه‌ وه‌كوڕ ئى پیاو ژنه‌ شماره‌م نیه‌كه‌ن".

فازڵ زیاتر ئویشى :" ئیسه‌ من له‌وه‌ر نه‌یاشتن ڕه‌گه‌زنامه‌؛ بیكار نیشتمه‌ و ئه‌را هه‌ر كاریگ بچم داواى ڕه‌گه‌زنامه‌ له‌لیم كه‌ن، و یه‌یشه‌ بویه‌سه‌ كێشه‌ى خوه‌م برا و خوه‌یشكه‌یلم له‌و ڕووژه‌وه‌ ك ئه‌را عیراق هاتیمنه‌سه‌وه‌".

ئاماژه‌یش وه‌وه‌ دا ك به‌ڵگانامه‌یلیگ جوور (مقتبس حكم ) عه‌دامكردنى و فه‌رمان ته‌سفیر كردنیان و گشتى ڕووژ و تاریخیش هابانیان هه‌ر له‌ عه‌دام كردن باوگیان تا ڕه‌سیده‌ جیوه‌جیكردنى و ناو كه‌س وكاره‌یلى، یانه‌ گشتى شایه‌تى ئه‌وه‌ ده‌ن ك خوه‌ى برا و خوه‌یشكه‌یلى مناڵ باوگیانن، وه‌لى دادگا هیمان ئه‌وه‌ ئینكار كه‌ید و هه‌واڵه‌ى ئى فه‌رمانگه‌ و ئه‌و فه‌رمانگه‌یان كه‌ید، ك ته‌نیا ده‌ركردن (مقتبس حكم) عه‌دام كردن باوگى زیاتر له‌ دو مانگ وه‌پى چویه‌.

جه‌ختیش له‌بان ئه‌وه‌ كرد ك ": من له‌ ده‌زگاى شه‌هیده‌یل ناو باوگم دیمه‌سه‌وه‌ ك یه‌یش ئه‌وه‌ سابت كه‌ید ك عه‌دام كریایه‌ و ماڵ و موڵكى گشتى چه‌پاو كریایه‌ و بریایه‌ و خێزانه‌گه‌ى ته‌سفیر كریایه‌؛ وه‌لى وه‌ل گشت ئى دیكۆمێنته‌یله‌، قازیه‌گه‌ قه‌بوولیان نیه‌كه‌ید و ئویشى یه‌ كار شه‌خسییگه‌ و قانوونى نیه‌ و په‌یوه‌ندى وه‌ ڕه‌گه‌زنامه‌ یا جنسیه‌وه‌ نه‌یرى".

له‌ كووتایى قسه‌گانى فازڵ ئویشى :" له‌ كاركردنا ئیسه‌ ئستغلالم كه‌ن و هه‌ر له‌ سه‌عات هه‌یشت شه‌وه‌كى تا سه‌عات نوو شه‌و كار وه‌پیم كه‌ن و ته‌نیا ده‌ هه‌زار دینار ده‌نه‌ پیم و هه‌تا له‌ ڕووژه‌یل جومعه‌ و عوتڵه‌ و بوونه‌گانیش كاروه‌پیم كه‌ن".

له‌لاى خوه‌یه‌و سه‌رچاوه‌یگ له‌ فه‌رمانگه‌ى بار كه‌سایه‌تى (دائره‌ الأحوال المدنیه‌) ك قه‌بوول نه‌كرد ناو خوه‌ى ئاشكرا بكه‌ید له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" له‌ وه‌خت داواكارى وه‌رگرتن ڕه‌گه‌زنامه‌ى عیراقى، كێشه‌ى عه‌قده‌یل زه‌واج هاله‌ نواى گشت كێشه‌یل ڕووڵه‌یل ته‌سفیركریایه‌یل له‌ كورده‌یل فه‌یلى، چوینكه‌ زوورمیان له‌ غه‌ریبى و له‌ ئاواره‌یى ژن خوازینه‌ و عه‌قده‌یل زه‌واجیان ناقانوونیه‌ چوینكه‌ له‌ دادگا جیوه‌جى نه‌كریانه‌".

سه‌رچاوه‌گه‌ زیاتره‌ك وت :" یه‌كیگ تر له‌و كێشه‌یله‌ ك تویشیان تیه‌ید كێشه‌ى به‌یان په‌یابوین یا (بیان ولاده‌) ك بایه‌سه‌ له‌ سه‌فاره‌ت عیراقى له‌و وڵاته‌ بارنه‌ى ك ئه‌راى ته‌سفیر كریانه‌، ئه‌گه‌ریش به‌ڵگه‌نامه‌ و مستمسكات نه‌یاشتوون (بیان ولاده‌) وه‌پى نیه‌ن و وه‌ختى تیه‌نه‌وه‌ داواى (بیان ولاده‌) له‌لیان كه‌ن و ئه‌گه‌ر نه‌یاشتوینه‌ى بایه‌سه‌ (حجه‌ ولاده‌) له‌ دادگاى عیراقى ده‌ر بكه‌ن ك ده‌ركردنى له‌ دو تا سێ مانگ كیشێ، و یه‌یشه‌ یه‌كیگه‌ له‌ گه‌وراترین كێشه‌یلیگ ك تویش ئه‌و كورده‌یل فه‌یلیه‌ تیه‌ید ك ته‌سفیر كریانه‌ و ئیسه‌ ئه‌را عیراق هاتنه‌سه‌وه‌".