سه‌روه‌رى خاك عراق له‌ كووره‌ مقه‌یه‌تى كریاگه‌؟

شفق نيوز

 

دو خاڵ هه‌ن هه‌رێم كوردستان چ جوور حكوومه‌ت چ جوور ملله‌ت، تایبه‌ت وه‌و مه‌سه‌له‌، یه‌كه‌میان ئه‌وه‌سه‌ ك له‌وساوه‌ ریكخریاگیگ وه‌ناو پارت كارگه‌ره‌یل كوردستان دامه‌زریاگه‌ گه‌ریلایه‌یلیان له‌ بڕیگ ناوچه‌ى مه‌رز هه‌رێم كوردستان وجوود دیرن، ك یه‌یش له‌لاى گشت لایه‌نیگ و له‌لاى حكوومه‌ت عراقیش ئاشكراسه‌و ئه‌و ناوچه‌یله‌ چ ئیسه‌ چ ئه‌وسایش پارت كارگه‌ره‌یل كوردستان له‌تى ژیه‌ن و چالاكى دیرن له‌تیان و ناوچه‌یلیگن سه‌خت و مه‌رزى ك وه‌ دریژایى سه‌د ساڵ گوزه‌یشت ئه‌و ناوچه‌یله‌ به‌ره‌یگ جه‌نگ بویه‌و ناسریانه‌ وه‌ ناوچه‌ى نائارام.

 

خاڵ دویه‌م له‌وه‌ر ئه‌وه‌ك خودكیشانه‌وه‌ى گه‌ریلا به‌شیگه‌ له‌ پرووسه‌ى ئاشتى و پیشكه‌فتن چاره‌سه‌ركردن مه‌سه‌له‌ى كورد له‌ توركیا، گومان له‌تى نیه‌ ك ئیمه‌یش جوور هه‌رێم كوردستان و هاووڵاتیه‌یل كورد باكوور هه‌ر گام ئاشتیانه‌ وه‌پیمان خوه‌شه‌و فره‌جار وه‌رپرسه‌یل باڵاى هه‌رێم كوردستانیش ئسپات ئه‌وه‌ كردنه‌و هه‌رێم كوردستانیش به‌شیگه‌ له‌ چاره‌سه‌ر كیشه‌ى په‌كه‌كه‌و توركیا، ك زویتر گام جددى نریاگه‌ ئه‌را ئى مه‌رامه‌.

 

ئنجا مه‌سه‌له‌ى خودكیشانه‌وه‌ى گه‌ریلایه‌یل په‌كه‌كه‌ ئه‌را ناو خاك هه‌رێم كوردستان له‌ى وه‌خته‌یله‌ ماناو له‌یه‌كه‌وداین خوه‌ى دیرید، چوینكه‌ وه‌ دریژایى ساڵه‌یل گوزه‌یشت وه‌رده‌وام هه‌ردوگ وڵات ئیران و توركیا وه‌ مه‌هانه‌ى وجوود چه‌كداره‌یل په‌كه‌كه‌ بوردمان ناوچه‌یل مه‌رزى هه‌رێم كوردستان كردیان و حكوومه‌ت به‌غدایش نه‌ك هه‌ر هه‌ڵویست خوه‌ى نیشان نه‌یا له‌وه‌رانوه‌ر پاشیلكردن سه‌ره‌وه‌رى خاك، به‌ڵكوو مه‌هانه‌ى فره‌یگیش هاوردیاده‌ كار ئه‌را ئه‌و دو حكوومه‌ته‌ ك مه‌رز هه‌رێم بوردمان كردیان.

 

ئنجا ئه‌گه‌ر جوور یادكردنیگ  قوربانى و زه‌ره‌ده‌یل ئه‌و سێ چوار ساڵ گوزه‌یشته‌ى مه‌رزه‌یله‌ بخه‌یمنه‌ وه‌رچه‌و، ئه‌وه‌ فره‌ له‌وه‌ گه‌وراتره‌ ك چه‌ن گه‌ریلایگ تیه‌نه‌ ناو خاك عراق، ك ده‌سڵاتداره‌یل به‌غدایش ئه‌و راسیه‌ له‌لایان پاك و ئاشكراس.

 

هویچ وڵاتیگ له‌ ناوچه‌گه‌ نه‌مه‌ندگه‌ ده‌س نه‌خاده‌ ناو كاروبار عراق، ئایا كام وڵات هاوساى عراق چه‌نه‌ها جار خاك و سه‌روه‌رى عراق پاشیل نه‌كردنه‌؟ هه‌ر له‌وه‌ر ئه‌وه‌یش خاستر ئه‌وه‌سه‌ به‌غدا له‌جیاى توماركردن شكایه‌ت له‌ ئه‌نجوومه‌ن ئاسایش ناوده‌وڵه‌تى كار ئه‌را ئه‌را قه‌ره‌بووكردن هاووڵاتیه‌یل قوربانى ده‌س وڵاته‌یل ده‌وروه‌ر بكه‌ن.

 

ناڕه‌زایى به‌غدا له‌وه‌رانوه‌ر خودكیشانه‌وه‌ى په‌كه‌كه‌ ئه‌را ناو خاك هه‌رێم، بیجگه‌ له‌ مه‌رام تر سیاسى و شیوانن په‌یوه‌ندى ناونى به‌غداو ئه‌نقه‌ره‌ هویچ تر له‌لى وه‌دى ناكریه‌ید و ئه‌گه‌ریش ئه‌نجوومه‌ن ئاسایش ته‌ماشاى سه‌روه‌رى خاك عراق بكا له‌ وه‌خت ریككه‌فتن خیانه‌تكارانه‌ى جه‌زایر، ئه‌وه‌ بیگومان ئه‌را كپه‌وكردن شووڕش كورد، ئه‌راى ده‌ركه‌قید ك عراق چه‌نیگ خاك خوه‌ى داسه‌ وڵاته‌یل هاوسا.

 

قائد میرۆ

ج . أ