جه‌له‌ولا داگير نه‌كرياگه‌‌..جه‌له‌ولا كوردستانيه‌

شفق نيوز

ناوچه‌ی جه‌له‌ولا جوور ناوچه‌يل تر كوردستانی ده‌يشت هه‌رێم و ناوچه‌يل تر باكوور عراق و خوه‌رئاوای ئه‌را ماوه‌ی چه‌ن مانگيگ له‌ ژير ده‌سڵات تونڕه‌وه‌يل داعش گشت مه‌ردمه‌ بيده‌سڵاته‌گه‌ی ئاواره‌ی شوونه‌يل تر بوين و زوورم ماڵه‌يلی ويران وكاول بوی، وه‌لی جی داخه‌ بريگ له‌ وه‌رپرسه‌يل ئاژاوه‌چی و نائاشتيخواز له‌ وه‌ختيگ ك ئه‌و شاره‌ له‌ژير ده‌سڵات ئه‌و ريكخرياگ ترۆريستيه‌ بوی دڵيان ئه‌را خاكه‌گه‌ی ژان نه‌كرد و هويچ وه‌ختيگ باس له‌وه‌ نه‌كردن ك داعش جه‌له‌ولا داگير كردگه‌، وه‌لی هه‌نای هيزه‌يل پيشمه‌رگه‌ ئه‌و شاره‌گه‌ له‌ده‌س داعش قورتار كرد يه‌كسه‌ر داخ له‌دڵه‌يل سه‌ر وه‌ ده‌وڵه‌ت ياسا هاتنه‌ زووان و پێشمه‌رگه‌ وه‌ داگيركه‌ر زانست و چه‌نه‌ها لێدوان ناڕه‌واو نادروس له‌ی باوه‌ته‌و ژنه‌فتيم.

ئيمه‌ له‌يرا ئويشمه‌ ئه‌و وه‌رپرس و ئه‌ندامه‌يل ئاژاوه‌چيه‌ ك هه‌ميشه‌ هه‌وڵ شيوانن ريككه‌فتن و گونجيان ئه‌يه‌ن له‌ناونی پيكهاته‌يل جياجيا بيجگه‌ ته‌رم شه‌هيده‌يل پێشمه‌رگه‌ ته‌رم كام سه‌رباز عراقی له‌ژير خانگه‌يل ويرانكرياگ جه‌له‌ولا دوينرياوه‌.

به‌ڵی داعش له‌ مانگ ئاب گوزه‌يشت له‌ڕی ته‌قاننه‌وه‌ی ته‌نكه‌ريگ نه‌فتهه‌ڵگر له‌ جه‌له‌ولا شماره‌يگ پێشمه‌رگه‌ شه‌هيد و زه‌خمدار كرد، ك ته‌رم دوانزه‌ پێشمه‌رگه‌ كه‌فته‌ ژير خانگ رمياگ و بی سه‌ر و شوون بوين و كه‌س وكاريانيش چارنويسيان نه‌زاست تا رووژ ئمڕوو، ك تازه‌ دوينريانه‌و له‌شوون ئازادكردن و پاكه‌وكردن شاره‌گه‌ له‌ مين و ته‌قينه‌وه‌.

ئمجا له‌يوا دياره‌ داخ له‌دڵه‌يل و ئه‌وانه‌ك چاره‌نويس ئی وڵاته‌ ره‌ساننه‌ ئی راده‌ی خويناويه‌ هيمان وه‌ته‌مای ئه‌وه‌نه‌ خاكمان داگير بكه‌ن و سه‌رله‌نوو وازی وه‌ چاره‌نويس ناوچه‌يل كوردنشين بكه‌ن و هه‌ر وه‌و خاتريشه‌ له‌ لێدوانه‌يليان باس له‌وه‌ ئه‌كه‌ن ك گوايا پێشمه‌رگه‌ جه‌له‌ولا داگير كردگه‌، ئيمه‌يش وه‌پيان ئويشيم: نه‌خه‌ير ئيوه‌ خه‌ياڵدان خاوه‌ پێشمه‌رگه‌ جه‌له‌ولا داگير نه‌كردگه‌..پێشمه‌رگه‌ خاك كورد ئازاد كردگه‌، چوينكه‌ جه‌له‌ولا كوردستانی و كوردنشينه، ‌وه‌لی دياره‌ هيمان له‌ خه‌وا ناتينه‌و ئاگادان له‌وه‌ نيه‌ سه‌رده‌م داگيركاری و ديكتاتۆريه‌ت وه‌سه‌ر چی، دياره‌ ئيوه‌ مێژوو قه‌ره‌غان نه‌خوه‌نستينه‌و هيمان جوور جه‌له‌ولای سه‌رده‌م به‌عس نوڕينه‌ پيه‌و!! دياره‌ ئيوه‌ حه‌مرين له‌ هويردان چيه‌ ك مه‌رز كوردستانه‌و هه‌ر وه‌و خاتريشه‌ دياره‌ هاينه‌ هه‌وڵ ئه‌وه‌ له‌ جه‌له‌ولا سه‌نگه‌ر له‌ليمان بگرين و بكه‌ينه‌ی دويا خاك كوردستان له‌ ديم باشوور خوه‌رهه‌ڵات هه‌رێم. ئيوه‌ ئه‌گه‌ر وه‌ڕاسی خه‌مخوه‌ر خاك عراقين ئه‌راچه‌ ڕی داينه‌ ترۆريست داگيری بكا؟ نه‌ك هه‌ر جه‌له‌ولا، به‌ڵكوو وه‌ دريژايی زه‌نجيره‌ جه‌وه‌ڵ حه‌مرينيش هه‌ر خاك كورده‌و چه‌وه‌ڕی باوه‌ش كوردستانه‌.

ج . عه‌ليمری