كورد خوارگ!
"ئه‌لى"ناوه‌یل ئیمه چه‌نه عه‌لى مه‌ردم تر قه‌در و قیمه‌ت داشتوون و یه له رێز و حورمه‌ت ئایم كه‌م ناكاد.
ئیمه كورده‌یل به‌ش لا خوار ئى كوردستان قه‌ڵوقه‌پ كریاگه داستان خوه‌مان دیریمن ئه‌ویش ئه‌وه‌سه ك له ناوڕاس و خوار عراق به‌شێ له ملله‌ته‌مان ژیه‌ن ك له لاى مه‌ردم كوردزووان خوه‌مان و عه‌ره‌ب زووان ئه‌وان وه پییان ئویشن كورد فه‌یلى و هیچ تیره‌و تایفه یا ئێڵ و هووزێگ كورد چه‌نه ئه‌و ناو و نیشانه ناودار و تویه‌نم بویشم قه‌دردار نیه! ئمجا ئه‌گه‌ر یه له شوون خوه‌ى بوود یا غه‌ڵه‌ت جى كه‌فتگ بوود، گرنگ یه‌سه ك ئى ناوه بیه‌سه به‌س و په‌یوه‌س ناونى ئى هووزه‌یل هاوزووان و هاونژاده و له فره شوونیش ماناگه‌ى وه خاسى له یه‌كه‌و دریاس ك ڕه‌ینترینیان ئه‌وه‌سه ك ئویشێ فه‌یلى یانێ(كورد نیشته‌جاى خوه‌رئه‌ڵات دجله) یا خوه‌مان ئویشیمن مه‌ردم پشت كوو.
نه له عراق، فیشتر له وڵات ئیران ئى قسیه فره جار ده‌مه‌وده‌م گه‌ردێ ك بڕێ كه‌س ئویشن ئیمه فه‌یلى نیمن و فكر ئه‌كه‌ن ك ناو هووز یا ئیڵێگه جوور كه‌ڵور یا له‌ك یا خزڵ و مه‌ڵكشایى، له وه‌ختێگ ك له ئه‌ده‌بیات سیاسى و كومه‌ڵایه‌تى و ژیان عراقییه‌یل چنه نا نووڕنه ئى مه‌سه‌له و ئامانج ئه‌وه نیه ك ناو ئى هووزه‌یل كورده شوون گومه‌و بكه‌ن، به‌ڵكم گشتیان له ژێر ئى سیه‌ماڵه جه‌مه‌و ئه‌كا! ئیمه باس عراق و كورد نیشته‌جاى به‌غدا و ده‌وروگردى ئه‌كه‌یمن ك ساڵه‌یل فره‌ێگه وه‌ى ناوه ناسریانه و وه‌خاتر ئى ناوه ئاواره و ده‌روه‌ده‌ر و بى سه‌روشوین كریانه ئمجا سه‌ر وه هه‌ر هووز و تایفه‌ێگ كورد بوون.
ئیمه كورده‌یل ده‌یشت هه‌رێم كوردستان بڕێگ ناو و وشه یا كه‌لمه و دنیاێگ زویخ و ده‌رد و داواكارى دیریمن ك بایه‌ت ئه‌گه‌ر وه قسیه و ئه‌گه‌ر وه نویسانن و ئه‌گه‌ر وه وینه و فیلم بوود له به‌غدا و له عراق ڕاز خوه‌مان وه‌پییان بویشیمن، ئمجا وه هه‌ر زووانێگ و وه‌هه‌ر شیوه و ناوێگ ك له لمان بڕه‌سنه‌و یا گووش ئه‌رامان بته‌كنن!! له‌ى وڵات وه‌ر خوه‌ره‌تاو و ئه‌ڵقرچیانه تا نه‌ویشید فه‌یلى كه‌س وه ناو هووز و ئێڵ چنه ك خوازیمن ناناسێده‌مان.
ئى قسیه راسه ك ئویشێ ئازایه‌تى له ئه‌وه نیه ك هه‌رچ خوازى بویشید، به‌ڵكم ئازایه‌تى ها له ئه‌وه ك باوه‌ڕ داشتوید وه ئه‌و قسیه ك خوازى بویشیده‌ێ و من هامه سه‌ر ئه‌و باوه‌ڕه ك له وه‌ختێگ ئى ناوه تویه‌نست و تویه‌نێد له ژیر سایه‌ى خوه‌ى جه‌ممانه‌و بكا و ماناى خراوێگ نێرێ و ئه‌ڕاى ڕه‌سین وه داوایه‌یلمان ڕێ كوڵبڕێگه ئیمه نه‌بایه‌ت بچیمنه‌و دویا و له نوو ده‌س وه پى بكه‌یمن!
ئه‌وانه‌ى ك دڵنگه‌رانن بایه‌ت بزانن ك ئیمه جوور شه‌فه‌ق هیچ جیاوازیێگ له ناونى (خوازم و توام) نانیمن وه‌لى یه كار حساو و كتاو سیاسه‌ت و رووژگار و ئه‌و وڵاته‌سه ك ئیمه نیشته‌جایمن و چنه و وه‌ى ناوه ناسنه‌مان ك ناسنه‌مان! یه‌ش له هاوزووانى و هاو قه‌ومى و هاوچاره‌نویسى خوه‌مان دویرمانه‌و ناخا ئه‌گه‌ر له به‌ش لا خوار یا لا بان كوردستان ژیه‌یمن.
عه‌لى حوسێن فه‌یلى
