ڕه‌سانن له‌ناونى سستم چه‌سپانن و كار ئازاد گیركردگه‌!!

شفق نيوز

له‌جیوازكردن هه‌ر رویداگ و هه‌واڵه‌یلیگ  ئه‌را مه‌ردم. بیگومان میدیاو ڕووژنامه‌و گووڤاره‌یل وه‌گووره‌ى ره‌فتار و جیوازكردن زانیارى پاك و ته‌ندروس هه‌م تویه‌نن بوونه‌ سه‌رچه‌وه‌ى ڕاسى(الحقیقه‌)و باوه‌ڕ وه‌پیكریاگ و هه‌میش وه‌گووره‌ى بوخت و گومان و هه‌ڵویست ناوه‌جى تویه‌نن له‌ چوارچیوه‌ى كاره‌ پیرووزه‌گه‌ى خوه‌یان دویره‌و بكه‌فن و په‌رده‌ى شه‌رم بدڕن و گشت چشتیگ  وه‌چه‌واشه‌وه‌ جیواز بكه‌ن، ك یه‌یش یه‌كمجار متمانه‌ى خوه‌یان وه‌پى له‌ده‌سده‌ن و دویه‌میش ئه‌وه‌سه‌ ك زه‌ره‌د گه‌ورایگ  ره‌سننه‌ كاره‌گه‌یان.

له‌گشت وه‌ختیگ  وه‌تایبه‌ت له‌ى سه‌رده‌م پیشكه‌فتن و ته‌كنۆلۆجیه‌، ئه‌گه‌ر بایگ  و نواگیرى له‌ئازادى بكریه‌یگ ، ئه‌وه‌ مه‌عناى ئه‌وه‌سه‌ نواگیرى له‌ڕیگه‌ى ژیان كریه‌یگ ، له‌هه‌مان وه‌خت ژیانیش وه‌ ئازادیه‌وه‌ په‌یوه‌س وخوه‌شه‌، وه‌لى وه‌جووریگ  ئه‌و ئازادیه‌ وه‌ئه‌مانه‌ت و ڕاس و دروسه‌وه‌ باریه‌یگه‌ كار، نه‌ك وه‌گووره‌ى ناوه‌گه‌ى وبه‌س ، چوینكه‌ ئازادییش مه‌رز خوه‌ى دیریگ  و په‌ڕینه‌وه‌ یا بازداین له‌و مه‌رزه‌ كیشه‌و گرفت له‌لى كه‌فیگه‌وه‌و له‌ڕوى قانوونیشه‌وه‌ تاوانبار كریه‌یگ ، وه‌لى ئه‌گه‌ر هات و ئازادى پرچ پاكیگ  وه‌گشت مه‌عنایگیه‌وه‌ نه‌ف له‌لى وه‌رگیریا ، ئه‌وه‌ قانوون و ده‌سڵاتیش هویچ وه‌ختیگ  ئه‌ڕایان نیه‌ وه‌نیه‌ت خراویگه‌وه‌ بچنه‌ قه‌ره‌ى و هساو و كتاو وه‌لیا بكه‌ن، له‌وه‌ر ئه‌وه‌ بنه‌ڕه‌ت باوه‌ته‌گه‌ى له‌بان بنه‌ماى وژدان پاك و هه‌واڵ ڕاس و هه‌ڵویست پاوه‌جى دامه‌زرانگه‌و ترس نه‌یریگ  له‌ده‌رئه‌نجامه‌گه‌ى، چوینكه‌ دگان وه‌هه‌قا ناگه‌و پایه‌یلى له‌سه‌ختان به‌ن كردگه‌و هویچ پلان و نه‌خشه‌یگ  نیاریگه‌ى له‌رزه‌.

مه‌سه‌له‌گه‌ له‌یرا ئه‌وه‌سه‌، ك ئمڕوو كار ره‌سانن هه‌رچه‌نى ئازاده‌ ، وه‌لى وه‌ل ئه‌وه‌یشا بویه‌سه‌ سستم چه‌سپانن و گیركردگه‌ له‌ناونى ئى سستمه‌و كار ئازاد، ئه‌را نموونه‌: ئه‌گه‌ر بایگ  و ئاده‌میزادیگ  داناى هه‌قناس و خوه‌شڕه‌فتار و خاوه‌ن هه‌ڵویست په‌سه‌ن، ئه‌جه‌ل برده‌ى وه‌ره‌و مه‌نزڵگاى حه‌قیقه‌ت(دار الحق) گشت كوومه‌ڵگا داخ له‌دڵن ئه‌ڕاى و له‌هه‌مان وه‌خت وه‌سه‌ربه‌رز و دادپه‌روه‌ر یاد كریه‌یگ  و شوونه‌وار خاسیگ  له‌شوون خوه‌ى هیلیگه‌ جى، وه‌لى ئه‌گه‌ر كه‌سیگ  بوختانچى و خودپه‌رس و ئاژاوه‌چى بوى، ئه‌وه‌ نه‌ك هه‌ر كوومه‌ڵگا ، شایه‌ت خیزان خوه‌یشى فاتحایگیش ئه‌ڕاى نه‌خوه‌نن، چوینكه‌ تا له‌دونیا بویه‌ زوانى وه‌هه‌ق نه‌جویلیاگه‌و ئه‌ڕا به‌رژه‌وه‌ندى لایه‌نیگ  یا گرووپیگ وه‌هه‌ر شیوه‌یگ  بویه‌ هه‌ر خه‌ریك شیوانن و له‌كه‌داركردن  سومعه‌ت ئه‌ى و ئه‌و بویه‌و ده‌رئه‌نجامیش ره‌سیگه‌ سزاى خوه‌ى.

له‌یرا مه‌به‌س باسه‌گه‌مان پاك و ئاشكراس ، ئمجا خاستر و جوانتر ئه‌وه‌سه‌ نه‌ویده‌ به‌نه‌ى هویچ لایه‌نیگ ، چوینكه‌ ئاده‌میزاد له‌وه‌ختى چه‌وى واز بووگ و تیه‌یگه‌ دونیا خودا وه‌ئازاد دروسى كردگه‌.

ئعلام وه‌شیوه‌زوان فه‌یلى مه‌عناى (ره‌سانن) ده‌یگ ، ره‌ساننیش په‌یوه‌سه‌ وه‌ئه‌مانه‌ته‌وه‌، ئمجا ئایا فه‌ن وفێڵ له‌ئه‌مانه‌ت كریه‌یگ  یا وه‌بى ده‌سكاریكردن ڕه‌سیه‌یگ ؟ ئه‌یه‌ پرسیاره‌یگه‌ ئه‌را گشت ده‌زگایه‌یل ئعلامى و نه‌بایه‌د خوه‌یان له‌لى گیل بكه‌ن.

ئمڕوو ئى عراق زه‌خمداره‌ هه‌وه‌جه‌ وه‌ئه‌وه‌ دیریگ  زه‌خمه‌یلى بپیچیه‌یگ  نه‌ك بكولیه‌یگه‌وه‌، چوینكه‌ چل ساڵ خوینڕشان و كوشت وكوشتار له‌تى وه‌رده‌وام بوى بیجگه‌ ئه‌وه‌ك گشت ئازادییگ  له‌تاك زه‌فت كریاویگ  و ته‌نیا ده‌زگایه‌یل ره‌سانن خود ده‌وڵه‌ت نه‌وگ له‌ژیر راسپارده‌و به‌رژه‌وه‌ندى تایبه‌ت حكوومه‌ت به‌عس ئه‌نجام كاره‌یلیان دیان، وه‌لى ئه‌وه‌سه‌ ئه‌و ده‌زگایه‌یل ره‌سانن یائعلامى و ئه‌و خاوه‌ن قه‌ڵه‌مه‌یل نادروسه‌ په‌كیان كه‌فت و نه‌تویه‌نستن په‌یام خوه‌یان تاسه‌ر بڕه‌سنن و كه‌سیش خه‌میان نه‌خواردو دویكه‌ڵ خوه‌یان چه‌وه‌یلیان كوور كرد.

ملله‌ت عراق وه‌گشتى هه‌وه‌جه‌ وه‌كه‌ش وهه‌وایگ  ئازاد دیرن، زوورم ده‌زگایه‌یل ڕه‌ساننیش له‌ى وڵاته‌ له‌جیاى ئه‌وه‌ك وشه‌ى هه‌ق جیواز بكه‌ن، نوڕید باوه‌ته‌یلیگ  هه‌ڵچنن ك خوه‌یان مه‌به‌س له‌لى دیرن، چوینكه‌ هه‌ر یه‌كیگ  له‌لیان سه‌ر وه‌حزب و لایه‌نیگن و نیه‌تویه‌نن سه‌رپیچى فه‌رمان ئه‌و حزب ولایه‌نه‌ بكه‌ن و دیرن له‌خزمه‌تیان كار كه‌ن، ئمڕوویش مه‌سه‌له‌ى ناكووكى ناونى حزبه‌یل وه‌ئاشكرا كه‌فیگه‌ وه‌رچه‌و ، هه‌ر له‌وه‌ر ئه‌وه‌یش دوینید ئه‌یاكه‌ ناونیتگ  له‌ئه‌واكه‌ بڕیگ  و نیه‌توایگ  له‌شانیه‌تى به‌رزه‌و بووگ، وه‌لى زه‌ره‌دمه‌ن له‌ى هه‌وڵه‌ وه‌پله‌ى یه‌كم چووگه‌وه‌ ئه‌را ڕه‌ساننكار (ئعلامى)و ده‌زگایه‌یل ره‌سانن ك پشت له‌پیشه‌ پیروزه‌گه‌ى خوه‌ى هه‌ڵكردنه‌و په‌یام راسه‌قینه‌ى خوه‌یان نیه‌ڕه‌سنیگه‌نه‌ گووش مه‌ردم و گیركردنه‌ له‌ژیر سستم چه‌سپانن(نڤام الفرچیه‌)و زه‌حمه‌ته‌ بتویه‌ننن له‌كه‌ش وهه‌واى ئازادیگ  بژیه‌ن و له‌به‌رژه‌وه‌ندى گشتى كار بكه‌ن، ته‌نیا له‌وه‌ ئازادن گشت راسییگ  چه‌واشه‌وه‌ بكه‌ن. له‌لایگ  تره‌وه‌ داین پویل(الدعم المالی) زیاتر منه‌ت خسته‌سه‌ بان مه‌سه‌له‌ى ره‌سانن، چوینكه‌ ئه‌را نموونه‌: هه‌ر كه‌ناڵیگ  ته‌له‌فزیۆنى یا ڕووژنامه‌یگ  یا ده‌زگایگ  ڕووشنهویرى ئه‌را ئه‌نجامداین كاره‌گه‌ى هه‌وه‌جه‌ وه‌ بودجه‌ یامیزانیه‌یگ  دیریگ  تا بتویه‌نیگ  سه‌ركه‌فتگ  بووگ له‌كاره‌گه‌ى، هه‌ر له‌وه‌ر ئه‌وه‌یش دوینید یه‌كیگ  له‌لیان پاڵ داسه‌ حزبیگه‌وه‌و له‌ژیر ڕه‌حمه‌ت ئه‌و حزبه‌ ژیه‌یگ  و گشت هه‌وڵ وته‌قلایگى ئه‌وه‌سه‌ ڕه‌زامه‌نى حزبه‌گه‌ى باریگه‌ده‌س، بیگومان یه‌یش كاریگه‌رى خراویگ  دروسكردگه‌ له‌بان ژیان ئازادانه‌ى ره‌سانن یائعلام وه‌گشتى. هه‌ڵبه‌ته‌ گشت ده‌زگا یامیدیایگیش له‌یوا نیه‌ ، له‌لیان هه‌س ڕاسه‌ له‌لایه‌ن حزبه‌وه‌ پشتگیرى پویلى كریه‌ن و میزانه‌ى تایبه‌ت دیرن، وه‌لى وه‌ل ئه‌وه‌یشا ئازاده‌ له‌كار خوه‌ى ، چوینكه‌ ئیمه‌ له‌خودا خوه‌ش نیایگ  گشت ده‌زگایه‌یل ره‌سانن یا ئعلامه‌یل وه‌یه‌ك چه‌و ته‌ماشا بكه‌یم و هه‌ڵویست خراو له‌بانیان وه‌ربگریم، نه‌خه‌یر له‌لیان هه‌س وه‌ وژدانه‌وه‌ كار كه‌ن و خوه‌یان له‌وه‌رچه‌و مه‌ردم نیه‌خه‌ن و هه‌ر له‌سه‌ره‌تاى كاره‌گه‌یان وه‌ل ئه‌و لایه‌نه‌ ریككه‌فن ك پشتگیرى ماددیان ئه‌كاو گشت كاره‌یلیانیش پاك و ئاشكراس. ئه‌ڕا نموونه‌: من ڕووژنامه‌نویسیگم و له‌یه‌كیگ  له‌ده‌زگایه‌یل ره‌سانن و ڕووشنهویرى كاركه‌م و تائیسه‌یش وژدان خوه‌م نه‌یامه‌سه‌ تاڵان و خوه‌شبه‌ختانه‌ ئه‌و ده‌زگایشه‌ ك له‌تى كاركه‌م له‌ئاو كانیاو پاكتره‌و كه‌س نه‌تویه‌نستگه‌ لیخنى بكا، وه‌ل ئه‌وه‌یشا هه‌ر له‌سه‌ره‌تاى دامه‌زراننیه‌وه‌ تاڕووژ ئمڕوو نه‌ژنه‌فتم ناو كه‌سیگ  وه‌خراو بارن یا له‌كه‌دار لایه‌نیگ  بكه‌ن ئه‌را به‌رژه‌وه‌ندى لایه‌نیگ  تر. ئه‌یه‌ واقعه‌و بایه‌سه‌ باس بكریه‌یگ  ، چوینكه‌ ئامانجى ئه‌وه‌سه‌ خزمه‌ت گشتى بڕه‌سنیگ  وه‌ملله‌ته‌گه‌ى و چینه‌ تایبه‌ته‌گه‌ى و هویچ وه‌ختیگ  له‌هه‌ق كه‌سیگ  نه‌یاسه‌ كه‌سیگ  تر و سه‌ربه‌رزانه‌و سه‌ركه‌فتگانه‌ ئه‌ركه‌یل خوه‌ى ئه‌نجام داگه‌، ئمجا ئومیده‌وارم له‌یوا هویره‌و نه‌كه‌ین من له‌وه‌ر به‌رژه‌وه‌ندى خوه‌م تاریف ئه‌و ده‌زگا كردویم، نه‌خه‌یر من ئاشق ئى جووره‌ شوونیگم ك سه‌رچه‌وه‌ى دروو یا خه‌ڵه‌تانن یا زه‌ره‌دڕه‌سانن نیه‌ وه‌كوومه‌ڵگاو كاره‌ پیرووزه‌گه‌ى ك ره‌سانن یا ئعلام و ڕووشنهویریه‌و ئامانجم ئه‌وه‌سه‌ هان گشت ده‌زگایه‌یل تر ڕه‌سانن بیه‌م په‌ند وه‌ربگرن و خزمه‌ت راسه‌قینه‌ نیشان بیه‌ن.

وه‌هه‌رحاڵ ڕه‌سانن بایه‌سه‌ بووگه‌ گوڵ بووداریگ  و ڕه‌نگ  جوان نیشان بیه‌یگ  ، نه‌ك جویر وه‌سیله‌یگ  وه‌ده‌س حزب و ده‌سڵاته‌وه‌ ئستغلال بكریه‌یگ  له‌وه‌ر خاتر گوزارش یا ته‌عبیر مه‌سه‌له‌ى فكرى و سیاسى و ڕووشنهویرى. ئمڕوو له‌سایه‌ى دیموكراسى و ئازادیه‌وه‌ تویه‌نیم زیاتر قه‌ڵه‌م باریمنه‌ كارو هه‌ق و ناهه‌ق وه‌پى له‌یه‌كه‌و بكه‌یم ، یه‌یش به‌ڵگه‌یگ  پشتڕاسیگه‌و هویچ گومانیگ  له‌تى نیه‌، وه‌لى هونه‌ر هاله‌ورا چوین بیلیم ئه‌و قه‌ڵه‌مه‌ متمانه‌ى خوه‌ى باریگه‌ ده‌س و مه‌ردم چه‌وه‌ڕى باوه‌ته‌یلى بكه‌ن، گرینگ  یاموهم ئه‌وه‌سه‌ ئه‌و كه‌ناڵ ته‌له‌فزیۆنیه‌ چوین دوینه‌ر وه‌رده‌وام ئه‌را خوه‌ى گرده‌و بكا، یا ئه‌و ڕووژنامه‌و گووڤاره‌یله‌ وه‌ چ شیوه‌یگ  بخوه‌نه‌یلیان بویننه‌وه‌، گشت ئه‌یانه‌ هه‌وه‌جه‌ وه‌ موور مسداقیه‌ت دیرن و بایه‌سه‌ بگه‌ردنه‌ شوون ئه‌و باوه‌ڕ و مسداقیه‌ته‌و متمانه‌ى خوه‌یان له‌ده‌س نه‌یه‌ن، چوینكه‌ سه‌رمایه‌ى ئه‌وان ته‌نیا مه‌ردمه‌گه‌س، ئه‌ما ئه‌گه‌ر بایگ  و ئه‌و مه‌ردمیشه‌ له‌ده‌س بیه‌ن، ئه‌وه‌ كاره‌گه‌یان دڵخوه‌شى نه‌یریگ  و به‌ر خاسیگ  له‌لى نیه‌چنیه‌یگ  وه‌ناو كار ئازاده‌وه‌.