دامه‌نیاێ

شفق نيوز

م ک باوه‌ڕ  نه‌‌ێرم چشتێگ وه‌ناو قیامه‌ت بوو، وه‌لێ وه‌لاێ خوه‌مه‌و ئويشم خوه‌زیه ته‌واو ئه‌و گه‌په‌یله‌ ک له‌ بار به‌هه‌یشت و جه‌هه‌نمه‌و ئويشن راس بوود. چه‌نێ بێده‌سه‌ڵاتم.

ته‌واو شه‌و خه‌ومه‌و نه‌ورد، تا شه‌وه‌کی چه‌وم وه‌ سورمويچ ماڵه‌گه‌وا بوی. ئه‌وسا خوه‌م رازانم ک بچمه سه‌ر کار. شه‌قام فره چوول بوی، گشت رووژێگ له‌ی هه‌نه و گه‌ل‌گه‌ل ئاێه‌م له سه‌ر ویسگه‌ێ ئوتوبووس دوسیان. وه‌ڵام ئیمڕوو تاکه که‌سێگیژ نه‌بوی. له ناو به‌ش ژنه‌یل، ته‌نیا نیشتبويم. هه‌ناێ ره‌سيمه مه‌ێان ئنقلاب، تازه گه‌یمه‌وا ک کاتژمێر 5.5 شه‌وه‌كیه و ئداره تا دو کاتژمێرتره‌ک ناکرێده‌وا.

ماڵ دووسێگم له‌و پاڵپشته‌و بوی، به‌ڵام له‌ی هه‌ن شه‌وه‌کیه ده‌رگه ئڕاێ که‌س نه‌ێه‌کرده‌وا. ئه‌گه‌ریژ تلیفون بکردام، جوواو ژماره‌یل نه‌ناس نه‌ێه‌دا. کارت تلیفونه‌گه‌م ده‌رهاوردم و زه‌نگ دامه ماڵ، وه هاوماڵه‌گه‌م وه‌تم: تلیفون بکاده ماڵ دووسه‌گه‌م تا درێه ئڕام بکاده‌و. خوه‌شاڵ بويم، وه‌خت فره‌ێ داشتم، چایگ دخواردم و له‌گه‌ل دووسه‌گه‌میژ سیارێ  دکیشام. له سووپریێگ سیار سه‌نم. خاوه‌نه‌گه‌ێ ئڕاێ چه‌ن چرکه نووڕسه پێمه‌و، ئه‌وسا سیاره‌گه دا ده‌سم.

له‌ناو ئداره گوڕاێ‌گوڕ مێده‌م دنیشته ژان. ورسیه‌تی هه‌ڵمپێچابوی. چه‌وم دويریابويه ئه‌قر‌ه‌وه‌ێ کاتژمێره‌گه ک له‌قه‌ێ دیوار وه‌راێوه‌رمه‌و داره‌لويز بوی. تا چويوه‌سه‌ر کاتژمێر 3، له سه‌ر میزه‌گه هه‌ڵسیام. گورج کارت کوتام و هاتمه ناو  شه‌قام. ئڕاێ ماشینێگ ده‌س هه‌ڵوڕیم، ماشین وسیا. هێمان که‌س سوار نه‌کردبوی. خوه‌شاڵ بويم ک دتوانستم بنیشمه وه‌ر ماشینه‌گه، تا که‌سێگ له ‌پاڵمه‌و نه‌نیشێد. ماشینه‌گه وه سه‌ر خوه‌ێ دچیاده رێیه‌و. راننده‌گه دخوازی ره‌وه‌نی بگرێد. کوڕێگیژ هاته بان. ئای... چه‌نێگ ناشیرن بوی. قژێ شووڕ کردبوی و گشتێ وه پشته‌و به‌ستبوی. له نووایژه‌و ریشێ له چناکه‌ێه‌و وه‌ره‌و خوار چوارگووش هیشتبوی. ماشین وه‌ره‌و شه‌قام "ئیران زه‌مین" دچیاد. له‌سه‌ر "ئیران زه‌مین" چه‌ن گله ماشین ئڕاێ دويه‌تێ وسیابوين. وا دیاربوی دويه‌ته‌گه له ناوێان خه‌ریک هه‌ڵوژین بوی. دتواست بزانێد ئڕاێ کامێیان بچێده بان. خوه‌ێ خاس رازانبوی. دورسه ک کرم پودر  فره‌ێگ سابويه ده‌مچاوێ، به‌ڵام جووشه‌یل ده‌مچاوێ گه‌نجوورێگ دابويه ده‌یشت. سوار پرشیاێگ بوی و چوی. راننده‌گه له ناو جامه‌ک ماشینه‌گه‌وا نووڕسه ره‌وه‌نی دواێنه‌گه‌و وه‌ت: دوینید؟ کامپوت ئه‌یدزه. ئه‌ویژ وه ده‌نگێگ ناشیرنتر وه ده‌مچاوێ وه‌ت: ئیانه باێه‌س  له‌گه‌ل ماسک بوه‌یدێانه کار. ده‌ر قوڕگم هاتبويه‌ یه‌ک، پساێ دخنکیام. تواستم چشتێگ بويشم، به‌ڵام رخم چوی. هه‌ناێ داوه‌زیم تواستم ده‌ر ماشینه‌گه وه ته‌واو زوورم بکوتمه ‌مل‌یه‌کا، به‌ڵام راننده‌گه زانس. وه‌رجه ئیه ک م ئێ‌کاره بکه‌م، خوه‌ێ کیشا وه‌ره‌ولاێ ده‌ر ماشینه‌گه‌و ده‌سگیره‌ێ ده‌ره‌گه له ناوه‌و گرد و ده‌ره‌گه نیاده‌و. چه‌وێ زاقه‌و کرد و وه‌ت: داڵگخیز گشتتان ئڕاێ یه‌ێ‌کار خاسن....

 

Damenya، که‌سێگ ک ته‌واو که‌سایه‌تییێ له‌لێ گیریاس، بێ‌ده‌سه‌ڵات

Sîar جگه‌ره

Rewenî  مسافر

Kirmpudr  له که‌لپه‌له‌یل(وه‌سایل) خوه‌ێ رازانن