هه‌وڵ كورد ئه‌را ئازادی وئاسووده‌يی

شفق نيوز

وه‌و خاتريشه‌ فريه‌جار دوینیم مێژوويش جوور كه‌سه‌یگ نابینا بویه‌ وه‌تایبه‌ت له‌ هه‌ناى ملله‌ته‌يل ژيرده‌سه‌ و ئه‌و ملله‌ته‌یله‌ ك زوڵم و سته‌م و چه‌وسيان وڵكه‌ر ژيانيان نه‌ويه‌‌، هه‌ر له‌وه‌ر ئه‌وه‌يش دوينيم ك ماڵویرانى و كاولكارى كوردیش بيبه‌ش نه‌ويه‌ له‌و داگيركاری مێژووييه‌و هه‌میشه‌ جوور ملله‌تیگ بویچگ ته‌ماشا كرياگه‌.

كورد له‌وه‌ختيگه‌و ك وه‌ دوير له‌ خواست خوه‌ی تيكه‌ڵ وه‌ نه‌ته‌وه‌ى عه‌ره‌ب و فارس و تورك بويه‌، دوشمنه‌يلی ئه‌وه‌نه‌ی تر ته‌قالا ئه‌را ئه‌وه‌ كردنه‌ بكه‌نه‌ی‌ به‌شیگ له‌ جه‌سه‌ى خوه‌یان له‌ڕی له‌ناوبردن و زه‌فتكردن زووان و فه‌رهه‌نگ و رووشنهويری و كلتووره‌و.

هويچ وه‌ختيگ نه‌ته‌وه‌يل داگيركه‌رئه‌ز‌ره‌ت ژیان ئاسووده‌يی و سه‌رفرازی ئه‌را ملله‌ت كورد نه‌ياشتگه‌و هه‌ميشه‌ دوشمن سه‌رسه‌ختى بوینه‌، ئمڕوویش له‌ وه‌ختيگ ك ئاڵشتكاری هاته‌سه‌ بان جه‌هان و ناوچه‌ی خوه‌رهه‌ڵات ناوين له‌ی ئاڵشتكاريه‌ فيشتر به‌شداره‌، ئاشكراس ك ملله‌ت كورديش له‌ناو خاك و نيشتمان خوه‌ی هه‌وڵ ره‌سين ئه‌را ئامانجه‌يلی ئه‌ياد تا بتويه‌نيد قورتار بدێ له‌و ده‌رده‌سه‌ری و داگيركاری و حه‌سه‌ره‌ته‌يل سه‌خته‌ ك رووژگاره‌يل فريه‌يگ وه‌پيه‌و ناڵانگه‌.

راسييگ حاشاهه‌ڵنه‌گره‌ ك ملله‌ت كورد هويچ وه‌ختيگ باوه‌ڕ وه‌ زوڵم و زوور نه‌ياشتگه‌و هه‌ميشه‌ ئازادی و ريڕه‌و ئنسانی هه‌ڵوژانگه‌و هه‌ر وه‌و خاتريشه‌ هه‌وڵ جيايی داگه‌ ئه‌را دامه‌زرانن قه‌واره‌يگ دوير له‌ بنه‌مايه‌يل داگيركاری و سته‌م، دوير له‌ ژيرده‌سی و چه‌وسيان، دوير له‌ چه‌واشه‌كردن راسيه‌يل، ك يه‌يش ماف سروشتی خوه‌يه‌و مێژوويش بايه‌سه‌ شايه‌تی له‌بان ئه‌و هه‌مگه‌ مه‌ويسی و به‌دبه‌ختيه‌ بيه‌يد ك وه‌ دريژايی رووژگار هاته‌سه‌ بان ئی ملله‌ت ئاشتيخواز و ديموكراسيخواز و ئازاديخوازه‌، چوينكه‌ هه‌وڵ كورد ئه‌را ئازادی و ئاسووده‌يی و ديموكراسی دروشم گشت وه‌خته‌يلی بويه‌.

ئاشتی كه‌مال

ج . أ