شه‌كه‌تی ئاواره‌يی و مه‌رگ مه‌دحه‌ت بانميلی

شفق نيوز

 

مامۆستا "مه‌دحه‌ت عه‌لی ره‌زا" ئه‌ركه‌وازی ك يه‌كيگ بوی له‌ پياوه‌يل دمڕاس و ناودار شاره‌ جوانه‌گه‌ی خانه‌قين، ك شه‌كه‌تی و ده‌رده‌سه‌ری ميه‌نه‌تيه‌يل فريه‌يگ هاته‌ تويشی له‌ژيان، ئه‌ويش دويای ئازار و شكه‌نجه‌داين ‌و گرتن و ئاواره‌يی فريه‌يگ له‌ په‌ڕ شاره‌يل و دوير له‌ زێدو ماوای باوگ و باپيره‌يلی له‌سه‌رده‌م رژيم به‌عس گوڕ وه‌گووڕ .

ئی كه‌سايه‌تی شار خانه‌قينه‌ له‌ساڵ ١٩٤٣ له‌ ئاوايی بانميل هاته‌سه‌ دونيا، خوه‌نين سه‌ره‌تايی له‌ خوه‌ندنگای ئه‌لوه‌ند ته‌مام كردو دويای ئه‌وه‌يش قوناغ ناوه‌ندييش له‌ ئاماده‌يی خانه‌قين ته‌مام كرد و له‌شوون ئه‌وه‌يش چيه‌ خانه‌ی مامۆستايه‌يل له‌ شار باقووبه‌و له‌ساڵ ١٩٦٤يش وه‌ مامۆستا دامه‌زريا.

مامۆستا مه‌دحه‌ت ئه‌ركه‌وازی ئاده‌ميزاديگ كوردپه‌روه‌ر و خه‌مخوه‌ر مه‌ينه‌تيه‌يل ملله‌ت كورد بوی، له‌ ساڵه‌يل ناونی ١٩٦٧ و ١٩٦٨ له‌لايه‌ن رژيم به‌عس زيندانی كرياو ئازاد كريا، له‌ساڵ ١٩٦٩ جاريگتر ئه‌را ماوه‌ی ساڵيگ زيندانی كرياو دوياخر له‌ ١١ی ئازار ١٩٧٠ ئازاد كريا، له‌ ساڵ ١٩٧٧ دويره‌و خريا ئه‌را پاريزگای عماره‌ له‌ باشوور عراق تا ساڵ ١٩٨٠.

له‌ سه‌ره‌تای ساڵ ١٩٨٠ جيواز كريا ئه‌را شار په‌نجوێن جوور مامۆستا، له‌شوون ئه‌وه‌يش له‌ ساڵ ١٩٨٥ جيواز كريا ئه‌را قه‌زای كه‌لار سه‌ر وه‌ پاريزگای سلێمانی، ئمجا له‌ كه‌لار كه‌فته‌ وه‌ر فشار پياوه‌يل حزب به‌عس و هه‌ميشه‌ داوا له‌ليان كرديان په‌يوه‌ندی بكاده‌ ئه‌و حزب شۆفينيزمه‌، وه‌لی مامۆستا مه‌دحه‌ت ئه‌و كاره‌ ره‌ته‌و كرد، له‌ ئاكام ئه‌و ره‌ته‌وكردنه‌ حزب به‌عس فاشيست وه‌ برياريگ له‌ پيشه‌ی مامۆستاييه‌و جيوازی كرد ئه‌را ده‌زگای كشتوكاڵی جوور كارمه‌نديگ ئاسايی وه‌خاتر كلكردنی ئه‌را به‌ره‌ی جه‌نگ، وه‌لی دوياخر خانه‌نشين كريا.

له‌ساڵ ١٩٩٥ حكوومه‌ت به‌عس جاريگتر كووچ زوره‌ملی وه‌پيكرد ئه‌را پاريزگای ئه‌نبار له‌ رومادی، ئه‌ويش له‌شوون زه‌فتكردن ماڵ و دارايی و تا ساڵ ٢٠٠٣ تا وه‌ختيگ رژيم سته‌مكار رميا هه‌ر له‌ورا مه‌ند، وه‌لی له‌شوون ئه‌و ماوه‌ گله‌و خوارد ئه‌را شار به‌غداو ئه‌را ماوه‌ی چه‌ن ساڵيگيش له‌ به‌غدا مه‌ند و دوياخريش گله‌وخوارد ئه‌را زێدو باوان خوه‌ی له‌ شار خانه‌قين.

مه‌دحه‌ت له‌ساڵ ٢٠٠٤ مه‌رگ ناوه‌خته‌و له‌ناكاو موڵه‌ت وه‌ ته‌ز و تووز شه‌كه‌تی ساڵه‌يل فريه‌ی ئاواره‌يی و ده‌رده‌سه‌ريه‌گه‌ی نه‌ياو هه‌ر وه‌و شه‌كه‌تيه‌و ماڵئاوايی يه‌كجاری له‌ دونيا كردو ٢ كوڕ و دويه‌تيگ له‌شوونی مه‌نده‌سه‌ جی، وه‌لی هيمان قه‌وم وخيش و ره‌فيقه‌يلی باس له‌ مه‌ردايه‌تی و ناوداری و خوه‌شڕه‌فتاری ئی كه‌سايه‌تی خوه‌شه‌ويسه‌ ئه‌كه‌ن.

ج . عه‌ليميری

سه‌رچه‌وه‌ى زانيارى: عه‌بدلكه‌ريم محه‌مه‌د ئه‌كبه‌ر