ئه‌و رووشنهویر كورده‌ ك وه‌نامه‌یگ سوڵتان عه‌بدولحه‌مید كیشا بان ته‌له‌فونكردن!!

شفق نيوز

شایه‌تى ئه‌و بیگانه‌یله‌ ك له‌ئۆرپاو وڵاته‌یل تر جه‌هانه‌وه‌ سه‌ردان كوردستان كردنه‌ چ له‌سه‌رده‌م كویه‌ن چ له‌ى ڕووژگاره‌. هه‌ر له‌ى باوه‌تیشه‌وه‌ ناوداره‌یل فره‌یگ دیریم بوینه‌سه‌ مایه‌ى سه‌رسامى یا ئعجاب غه‌یره‌ كورد له‌مه‌یدانه‌یل جیاجیاو له‌هه‌مان وه‌خت كه‌فتنه‌سه‌ وه‌ر تاریفكردن قه‌ڵه‌م رووشنهویر و گه‌شتكه‌ره‌یل بیگانه‌. هه‌ر له‌وه‌ر ئه‌وه‌یش وه‌پیمان خوه‌شه‌ رووشنهویره‌یلیمان ناودارى ئه‌را نه‌ته‌وه‌گه‌یان ده‌ربكه‌ن و مایه‌ى شانازى ملله‌ته‌گه‌یان بوون.

یه‌كیگ له‌و ئه‌دیب و رووشنهویر و ناوداره‌یل گه‌وراى كورده‌ ك سوڵتان عه‌بدولحه‌مید وه‌پى سه‌رسام بوى و حه‌ز له‌دیدارى كرد، ئه‌ویش شاعر گه‌وراى ملله‌ته‌گه‌مان ره‌حمه‌تى حاجى ته‌وفیق(پیره‌مێرد)بوى، له‌وه‌ختیگ  وه‌ نامه‌یگ سوڵتان عه‌بدولحه‌مید كیشا بان ته‌له‌فونكردن.

له‌ڕاسى پیره‌مێرد بیجگه‌ ئه‌وه‌ك شاعر بوى، له‌هه‌مان وه‌خت قسه‌كه‌ر و دانایگ سه‌رڕشته‌دار و خاوه‌ن زانست و ماریفه‌تیش بوى و هه‌میشه‌ رینیشانده‌ر و رینماییكه‌ر بویه‌و پرس وه‌پى كریاگه‌ له‌كاره‌یل فره‌یگ.

ئنجا شێخ محه‌مه‌د خاڵ جویر یادگارى و ڕویداگیگ تاریخى باس له‌هه‌ڵویست جوان و دانایى پیره‌مێرد كردگه‌و ئویشیگ: رووژیگ له‌ڕووژان له‌باوگم ژنه‌فتمه‌، له‌سه‌رده‌م و عوسمانى له‌وه‌خت سوڵتان عه‌بدولحه‌مید كوردیگ خه‌ڵك سلێمانى حوكم سێداره‌دریانى دریه‌یگ له‌ ئه‌سته‌مبوڵ و كه‌س وكاره‌گه‌ى چنه‌ڕا ماڵ رووشنهویر و شاعر كورد پیره‌مێرد له‌شار سلێمانى و له‌لى لاڵكیه‌نه‌وه‌ نامه‌یگ  وه‌گووره‌ى ئه‌قڵ خوه‌ى بنویسیگ ئه‌را سوڵتان و له‌لى بلاڵكیه‌یگه‌وه‌ سزاى له‌سێداره‌داین له‌بان كوڕه‌گه‌یان ئه‌ڵگریگ ، پیره‌مێردیش وه‌ دانایى و خامه‌ ڕه‌نگینه‌گه‌ى نامه‌ى جوانیگ وه‌ زووان توركى ڕازنیگه‌وه‌و ئه‌را سوڵتان عه‌بدولحه‌مید و ده‌یگه‌ى كه‌سوكاره‌گه‌ى بڕه‌سننه‌ى سوڵتان له‌ ئه‌سته‌مبوڵ تا ئه‌و سزا له‌بانى نه‌یلیگ. ئنجا سوڵتان وه‌ختى نامه‌گه‌ وه‌پى ڕه‌سیگ  و خوه‌نیگه‌وه‌ى، ئه‌ڵڵاجه‌ویى تیه‌یگ له‌ به‌لاغه‌ت و ڕه‌نگینى ناوه‌ڕوك نامه‌گه‌و یه‌كسه‌ر سكرتێره‌گه‌ى چڕیگ و ئویشیگه‌پى: ئى حاجى ته‌وفیقه‌ كییه‌؟ ئه‌ویش ئویشیگ : ئه‌یه‌ نویسه‌ر و شاعریگ كورده‌وئه‌ندام (مجلس العالى) بویه‌ له‌ ئه‌سته‌مبوڵ. سوڵتانیش ئویشیگ : رووشنهویریگ كورد وه‌ى جووره‌ ئى نامه‌ى جوان و ڕه‌نگین و پڕ مانا وه‌ زووان توركى بنویسیگ  شایسته‌ى ئه‌وه‌سه‌ داواكاریه‌گه‌ى جى وه‌جى بكریه‌یگ، دى یه‌كسه‌ر سوڵتان فه‌رمان ئه‌دا كوڕه‌ كورده‌گه‌ ئازاد بكریه‌یگ .

بیگومان ئى جووره‌ رویداگیگ تاریخى ئه‌وه‌سه‌ جویر یادگارى و له‌ناو لاپه‌ڕه‌ى تاریخ رووشنهویرى كورد وه‌ جوانى توومار كریاگه‌و ئسپات ئه‌وه‌ ئه‌كا ك ملله‌ت كورد خاوه‌ن كه‌سه‌یل رووشنهویر و پڕ ماریفه‌تن.

 

جه‌ماڵ ئه‌ركه‌وازى