كى وه‌رپرسه‌؟!

شفق نيوز

ئه‌خوازم بويشم له‌ناونى ئه‌و ئه‌وانه‌ كه‌سيگ وجوود نه‌ياشت ك خوازيار هوير سوشياليستى زانستى بدێ، چوينكه‌ هه‌ڵويست كه‌سه‌يل تر ئاشكراسه‌ وه‌ گووره‌ى خواست وه‌رده‌واميان وه‌ ئه‌وه‌گ ده‌وڵه‌ت بايه‌سه‌ رينمايى ستراتيجى ئاشكرايگ داشتوود و گشت بواره‌يليگ بگرێده‌و، له‌وانه‌يش كيشه‌يل ئابوورى و دارايى، بيجگه‌ ئه‌وه‌يش داواكارى وه‌رده‌واميان له‌بان وه‌كارهاوردن ئه‌قڵانيه‌ت ئه‌را داهاته‌يل و كه‌ميگ له‌ دادگه‌رى كومه‌ڵايه‌تى، ئمجا سوشياليسته‌يل فريه‌جار داواى جوورايه‌تى سه‌رچه‌وه‌يل داهات كردن وه‌ل هساوكردنن مه‌سه‌له‌ى ئاڵشتكارى له‌ نرخه‌يل نه‌فت و پشت وه‌پى نه‌وسانن جوور ته‌نيا سه‌رچه‌وه‌يگ، ك له‌يراوه‌ بانگه‌وازان ئه‌را گرينگيداين وه‌ كه‌رته‌يل به‌رهه‌مهاوه‌ر كشتوكاڵى و پيشه‌سازى و خزمه‌تگوزارى ده‌سوه‌پيكرد.

جيوه‌جيكاره‌يليش وه‌گشت جووره‌يل و گشت پايه‌يل وه‌رپرسيارێتييان له‌ ده‌وڵه‌ت، هه‌ڵبه‌ته‌ نه‌ك سوشياليسته‌يل، وه‌رپرس بوين له‌بان وه‌تاڵان داين دارايى گشتى و دوياخستن مه‌سه‌له‌ى وه‌ره‌و نوابردن وڵات و هه‌ر ئه‌وانه‌يش په‌نجه‌ى تومه‌ت ئه‌ڕايان دريژ كريا له‌و دوسيه‌يل گه‌وراى گه‌ناته‌كاريه‌ ك هيمان مينه‌ى دادوه‌ر ئازاو دادگه‌ريگ ئه‌كا ئه‌را وازكردنيان وه‌ل كاراكردن ياسا ده‌رهه‌ق ئه‌وانه‌گ ئى تاوانه‌يله‌و تاوانه‌يل تر ئه‌نجام دانه‌ ده‌رهه‌ق ملله‌ت و نيشتمان.

سوشياليسته‌يل ناڕازيين له‌بان باوه‌ڕ فرووشتن موڵكه‌يل و دام و ده‌زگاو كوشكه‌يل و كارخانه‌يل ده‌وڵه‌ت وه‌ نرخه‌يليگ بى قيمه‌ت ئه‌را ئه‌و جيوه‌جيكار و هاوپه‌يمانه‌يليانه‌ له‌ به‌ڵێنده‌ره‌يل و بازرگانه‌يل گه‌ناته‌كار گه‌ورا.

دويا ئه‌وه‌يش.. كى وه‌رپرسه‌ له‌بان پرووژه‌يل سه‌رنه‌كه‌فتگ و خراو، يا ئه‌و پرووژه‌يله‌ ك پويليان وه‌رگيرياو هه‌ر جوور خوه‌يان مه‌ندنه‌و خه‌رجيان فيشتر بوى له‌ سه‌دان مليار دۆلار؟ كى وه‌رپرسه‌ له‌بان وه‌تاڵان بردن دارايى بودجه‌ى 2014 وه‌ ملياره‌ها دۆلار و كه‌سيش نازانێد چوين خه‌رج كريا؟

شايه‌ت مه‌ترسيدارتر ئه‌وه‌ بوود ك بپرسيم كى وه‌رپرسه‌ له‌بان ئاسانه‌وكردن ئه‌ركه‌يل داعش و په‌لكوتان و داگيركردن فيشتر له‌ سێكوتى وڵاته‌گه‌و كى به‌شدارى كرد له‌ سياسه‌ت چه‌فت ئه‌را كزه‌وكردن توانايه‌يل عراق و هيزه‌يل چه‌كدارى دژ ترۆر و ريكخرياگه‌يلى؟ كى وه‌رپرسه‌ له‌بان كزه‌وكردن هه‌يبه‌ت ده‌وڵه‌ت و كزه‌وكردن نه‌خش ده‌زگايه‌يل ئاسايشيه‌گه‌ى له‌وه‌رانوه‌ر ئازادكردن ده‌س مليشيايه‌يل روێدار و ده‌رچگ له‌ ياسا و چه‌ته‌يل تاوانكار و له‌كارخستن جيوه‌جيكردن كرده‌وه‌يى له‌باوه‌ت داواكارى چه‌ك ك ته‌نيا وه‌ده‌س ده‌وڵه‌ته‌و بدێ؟!

ئايا كيشمه‌كيش هيزه‌يل جيوه‌جيكار له‌بان ده‌سڵات و نفوز و دارايى و بنگه‌يل هيز و بڕيار و وه‌رگريكردنيان له‌ به‌شبه‌شه‌وكردن ره‌گه‌زى – تايفى ك هووكار به‌ڵا بوى و ركابه‌رى تايفه‌چيه‌يل و تونڕه‌وه‌يل له‌بان گرژه‌وكردن ئحساس ئنتمابوين، گشت ئه‌يانه‌ نه‌ويه‌ هووكار كزه‌وكردن شيرازه‌ى كومه‌ڵايه‌تى و شيوانن يه‌كێتى نيشتمانى و ره‌سانه‌مانه‌ ئى بار خراوه‌ ك له‌تى ژيه‌يم و چاره‌نويس ئه‌ى وڵاته‌ وه‌ى حاڵه‌ته‌ ره‌سان و ده‌س ده‌ره‌كى وه‌پى ره‌سان؟!

به‌ڵى.. جيوه‌جيكاره‌يل هه‌ر له‌وه‌خت ئالشتكارى له‌ 2003 تائيسه‌، ئه‌وان وه‌رپرسن له‌ى حاڵه‌ته‌يله‌ و له‌ى باره‌ ك هاته‌سه‌ تويش عراق له‌ ويرانه‌و كاولكارى، نه‌ك سوشياليسته‌يل، جوور ئه‌وه‌گ مه‌ردمانيگ هه‌وڵ ئه‌يه‌ن مه‌ردم وه‌پى بخه‌ڵتنن!

محه‌مه‌د عه‌بدولڕه‌حمان