قوربانى و عه‌ید قوربان

شفق نيوز

  له‌ شوون رووژ عه‌رافات راسه‌وخۆ عه‌ید قوربان تیه‌ید ك ناسریاگه‌ وه‌ عه‌ید حاجیه‌یل یا عه‌ید گه‌ورا، ك ئى عه‌یدیشه‌ جوور عه‌یده‌یل تر مایه‌ى دڵخوه‌شى و گه‌ردن ئازاییه‌و قه‌وم وخیش له‌تى سه‌ردان یه‌كترى كه‌ن و له‌هه‌مان وه‌خت وه‌ دیدار یه‌كترى شاده‌و بوون.

عه‌ید قوربان عه‌ید دویه‌م موسڵمانه‌یله‌ له‌شوون عه‌ید ره‌مه‌زان، ك موسڵمانه‌یل له‌تى نماز وه‌جه‌م خوه‌نن جوور ئه‌ركیگ ئایینى و شه‌رعى له‌مزگفت یا شوونیگ وه‌رفراوان و له‌ى نمازیشه‌ ده‌س لاڵكیان و نزاو دوعا به‌رزه‌و كریه‌ید ئه‌ر په‌روه‌ردگار، ئنجا له‌شوون ته‌واوكردن نماز موسڵمانه‌یل ده‌س یه‌كترى سینن و سڵام و خوه‌شه‌ویسى ئاراسته‌ى یه‌كترى كه‌ن و گه‌ردن ئازایى له‌ یه‌كترى كریه‌ید.

عه‌ید قوربان دویاى رووژ عه‌رافات جوور گوزراشیگ ئه‌را به‌شدارى موسڵمانه‌یل له‌ گشت جه‌هان و ئه‌را حاجیه‌یل له‌ مه‌ككه‌، نیشانه‌ى خوه‌شاڵى و به‌خته‌وه‌رى ئه‌یاد له‌ى گره‌وبوین گه‌ورا.

ئنجا دیارترین كاره‌یل عه‌ید قوربان، قوربانیكردن و سه‌ربڕین ئاژه‌ڵه‌، ك ئه‌ويش جوور هسكردنیگ ئه‌را باپیره‌ گه‌وراى موسڵمانه‌یل ئبراهیم په‌یغه‌مبه‌ر(س . خ)له‌وه‌ر مه‌سه‌له‌ى فه‌رمان سه‌ربڕين ئسماعیل كوڕى، ك ئه‌وه‌ بوى خوداى په‌روه‌ردگار فه‌رمان وه‌پى كردو دوياخر ئاژه‌لێگ ئه‌رای كريا دياری له‌جيای سه‌ربڕين روڵه‌گه‌ی، دى له‌وه‌یشه‌و ئبراهیم په‌یغه‌مبه‌ر بویه‌ نموونه‌یگ ئه‌را موسڵمانه‌یل جه‌هان له‌ جیوه‌جیكردن فه‌رمان خوداى گه‌وراو ئسماعیلیش قورتار بوى له‌و قوربانیه‌.

ئه‌و قوربانیه‌ دویاى ته‌واوبوین نماز عه‌ید بوى له‌وه‌خت ده‌ركه‌فتن خوه‌ر، ك ئیسه‌یش له‌وساوه‌ تائیسه‌ موسڵمانه‌یل ده‌س كه‌نه‌ قوربانیكردن و ئاژه‌ڵ سه‌ربڕن و گوشته‌گه‌ى دابه‌ش كه‌نه‌ بان فه‌قیر و نه‌داره‌یل. دى وه‌جووره‌ عه‌ید گه‌ورا له‌لاى موسڵمانه‌یل ناسریا وه‌ عه‌ید قوربان.

ج . أ