فه‌يليه‌يل و ئه‌وه‌گ له‌ باوگ و باپيره‌يلمان وه‌ ميرات مه‌نده‌سه‌و

عه‌لى  حسێن فه‌يلى

شه‌فه‌ق نيوز/ من بايه‌سه‌ دگان وه‌ ئه‌وه‌يا بنه‌م ك هه‌رچه‌نى له‌ ته‌مه‌ن مناڵتر بويم باوه‌ڕم قويلتر بوى، و شه‌راره‌ى عه‌زيمه‌ت گشت وژدانم له‌قانياد، وه‌لێ له‌وه‌ر كيشه‌و كه‌مى ئه‌زموونه‌يلم ئاست ئه‌زه‌رته‌يلم له‌ خه‌باتم وه‌و ئاسته‌ جيوه‌جى نه‌وى و هيمان تائيسه‌يش ناڕه‌حه‌تم له‌ پشتگووشخستن فه‌يليه‌يل.

 

باوگم ره‌حمه‌تى(حسێن فه‌يلى)هه‌ميشه‌ ئامووژگاريم كردياد له‌جياى ئه‌وه‌گ دڵم زه‌خمدار بكه‌م، باقى ئحساسه‌يلم شه‌كه‌ت بكه‌م، ئمجا ئه‌و وه‌ختيشه‌ ماناى ئى وشه‌يله‌ نه‌زانستيام.

 

ره‌حمه‌تى وتياده‌پيم: گشت مه‌ردم كورد فه‌يلى زه‌خمدارن وه‌ شيوه‌ى جياجياى جوور ژان و مه‌ينه‌تى وه‌ ته‌وريگ ك زووان له‌ ئاست باسكردنى عاجزه‌‌، وه‌ل ئه‌وه‌يشا ئه‌وان ئومێد خاسترين چشته‌يليگ ئه‌كه‌ن ئه‌را مه‌ردم، وه‌لێ خوه‌يان له‌ به‌رزه‌خ گوم بوينه‌ له‌ناونى به‌هه‌يشت و دوزه‌خ.

 

ره‌حمه‌تى له‌ بڕيگ له‌ ئامووژگاريه‌يلى وتياد: كيشه‌گه‌مان ره‌فيقه‌يل خراو فريه‌يگ و دوشمنه‌يليگ راسكانى له‌تى وجوود ديرن، ئه‌وه‌يش له‌ هوير ناوه‌يم ك خاسكرده‌يى فريه‌يش نه‌خوه‌شى كه‌مفكرى له‌لى ئه‌كه‌فێده‌و، ك بايه‌سه‌ هوير له‌وه‌ نه‌كه‌يم وه‌ دريژايى ته‌مه‌ن مه‌ردمان تر چوين نوڕنه‌ كيشه‌گه‌مان يا چه‌وه‌ڕى جواويان بكه‌يم، دى له‌جياى مه‌ندنه‌وه‌ى له‌ى وه‌رده‌واميه‌ با ده‌سپيشخه‌رى ئه‌را جموجويل بكه‌يم له‌ وه‌رانوه‌ريان و پشتگيرييان وه‌ده‌س باريم.

 

دوياى ساڵه‌يليگ و له‌ رووژگاره‌يل جياجيايگ له‌ ژيانم، زوورم مه‌ردم حوكم له‌بان كيشه‌گه‌مان كردنه‌و يه‌يش ماقوڵ نيه‌، به‌ڵكوو ته‌ناته‌ت وه‌رپرسيش نه‌وينه‌، وه‌لێ ئيمه‌ تواناى ئه‌وه‌ داشتيمنه‌ له‌ليان بووه‌خشيم و چشتيگيش ك وه‌ دريژايى ماوه‌ى گوزه‌يشت هه‌وڵ دامه‌زراننى دايم و ئاشكرا بدێ، مه‌ردمان فريه‌يگ هه‌وڵ رماننى دان يا تواسيان زاڵ بوون له‌بانى، وه‌لێ ئيمه‌ نه‌ف له‌وه‌ گشتى وه‌رگرتيم له‌ وه‌رگرى و مقه‌يه‌تيكردن له‌لى و سووزداريمانيش نه‌بايه‌د وه‌ ترس له‌يه‌كه‌و بدريه‌ێد و سووز و راسگووييمان و ته‌وازعمانيش نه‌بايه‌د وه‌ ئزدواجيه‌ت و ئامانجه‌يل له‌كه‌دار باس بكريه‌ێد، دى نازانم كه‌سه‌يل تر چه‌ وه‌ ميرات له‌ باوگ باپيره‌يليان وه‌رگرتنه‌؟

 

دوياى گشت ئى هه‌مگه‌ گه‌رده‌لويليشه‌ ئه‌تويه‌نيم ريڕه‌ومان ديارى بكه‌يم و دوياى لاوردن خه‌رمان خوسه‌و كينه‌ت و پلان غه‌ره‌زداره‌يل وه‌ ئازايه‌تى ئه‌تويه‌نيم به‌حره‌يلمان ته‌مام بكه‌يم و به‌خيلى غه‌يره‌يلمان له‌تى سه‌رنگوون بكه‌يم و توانامان جوور ئه‌و مناڵ كه‌مهيزه‌ نيه‌، به‌ڵكووسه‌برمان پڕ زينه‌ت بويه‌ وه‌ هيز و وه‌دريژايى ته‌مه‌نيش دويره‌و ئه‌كه‌فيم له‌ ترس له‌ى ژيانه‌.

 

ئمڕوويش نه‌ك ته‌نيا جومله‌يگ له‌ ئامووژگاريه‌يل ره‌حمه‌تى، به‌ڵكوو گشت گوزاره‌يلى جوور ژيانه‌ ئه‌رامان.

عه‌لى حسێن فه‌يلى