ژیانى ئاڵشت بوود ره‌فتاریشى ئاڵشت ئه‌كا

شفق نيوز

له‌دروسكریاگ كوومه‌ڵگاس، هه‌ر له‌وه‌ر ئه‌وه‌یش ئه‌و ره‌فتاره‌ وه‌گووه‌رى كوومه‌ڵگایه‌یل جیاوازى دیرێد.

 

ره‌فتار هه‌ڵوه‌س گشتییگه‌ ك وه‌تویڕه‌یى و مه‌یل و دڵسووزى كاریگه‌ریگه‌ره‌و یا ئه‌وه‌سه‌ خاسه‌ یا وه‌ چه‌واشه‌ ك دوینید جیاوازه‌ جوور ئه‌وه‌ك له‌ مه‌سه‌له‌ى سیاسى و دینى و چینایه‌تى...هتد گه‌فێده‌ وه‌رچه‌و.

 

مه‌سه‌له‌ى ره‌فتار له‌روخساره‌و وجوود دیرێد، وه‌لى له‌ڕاسى كه‌م كه‌س تیه‌رنه‌ى كار، ئنجا شیوه‌ى ئه‌و جیاوازیه‌ سیاسى یا نه‌ته‌وه‌یى یا چینایه‌تى بوود بایه‌سه‌ جوور هووكاریگ ئه‌را جه‌نگ و كاولكارى گشتى نه‌ود، به‌ڵكوو تاڕاده‌یگیش دوینید چه‌ودیریكردن وازى تووپ پاو لایه‌نگرى تیمه‌یلیش جووریگ له‌ خوسه‌و كینه‌ت له‌لى كه‌فته‌سه‌و له‌ كوومه‌ڵگامان..!!

 

هه‌ر له‌وه‌ر ئه‌وه‌یش ئویشیم: ئایا گوناهیان چه‌س ده‌یه‌ها كه‌س له‌ناو وازیگاى"بور سه‌عید"له‌ مسر شه‌لپه‌ت كریان، ته‌نیا ئه‌وه‌ نه‌ود ك هانه‌ ناو كوومه‌ڵگایگ ئه‌یاكه‌ حورمه‌ت ئه‌واكه‌ نه‌گرت له‌وه‌ر ئه‌وه‌ك ده‌رفه‌ت وه‌ یه‌كترى نه‌یان ك هه‌رچه‌نى وازى تووپانیش بوى..!!

 

ته‌نانه‌ت تا ره‌سیه‌ ئه‌و راده‌یش هه‌ركه‌سیگ  لایه‌نگرى ریال مه‌دریدو به‌رشلۆنه‌یش كرد كینه‌تدار و تونڕه‌و بوین و زیاتر له‌ئه‌ندامه‌یل تیمه‌گه‌.

 

كومه‌ڵگاى عه‌ره‌بى پڕه‌ له‌كینه‌تدارى و مه‌سه‌له‌ى جیاوازیكردن نه‌ته‌وایه‌تى و چینایه‌تى و پیلان و ناپاكى نیه‌تدارى ك هه‌رچه‌نى زوورم ملله‌ته‌یلى سه‌ر وه‌دین موسڵمانن و بایه‌سه‌ ره‌فتار خاس داشتوون، وه‌لى دوینید ئه‌و سفه‌ته‌یل خراوه‌ له‌تیان وجوود دیرێدو په‌یڕه‌و ره‌فتار خاس ناكه‌ن ته‌نیا له‌وه‌ر ناكوكییگ بویچگ چینایه‌تى.

 

ئایا دى چ قانجازیگ له‌ى دینه‌ كردنه‌ ك له‌ده‌یشته‌و توانه‌ى و له‌ناوه‌و چه‌واشه‌ى دینه‌گه‌ن و ره‌فتاریان ناپوخته‌..؟

 

وه‌ل ئه‌وه‌یشا دوینید ئه‌و گه‌نڕه‌فتاره‌یله‌ هه‌ر خوه‌یان وه‌خاس و ڕاس زانن و باوه‌ڕیان له‌یواسه‌ هه‌ركه‌سیگ چه‌واشه‌یان بكا یا نه‌فامه‌ یا كینه‌تدار و خراوه‌كاره‌!

 

سیاسه‌ت كاریگ وه‌پیمان كردگه‌ ك ڕى نه‌فامى وه‌پیمان نیشانداگه‌و كیشمه‌كیش وه‌رده‌وام ره‌فتار مه‌ردمان فره‌یگ شیوانگه‌، له‌ڕاسى كوومه‌ڵگایگ خودپه‌رسه‌و گرینگى ده‌ێده‌ به‌رژه‌وه‌ندى خوه‌ى و دوینید كارمه‌ندیگ له‌ده‌زگایگ حكوومى وژدان خاس له‌كاره‌گه‌ى ناورده‌سه‌ كار ئه‌را خاتر به‌رژه‌وه‌ندى گشتى و خوه‌یشى وه‌ خاوه‌ن ره‌فتار خاسیگ زانید.

 

ته‌نانه‌ت پزیشك یا دكتۆریگیش له‌نه‌خوه‌شخانه‌ى گشتى حكوومه‌ت گرینگى وه‌ نه‌خوه‌ش نیه‌ێد، وه‌لى ئه‌گه‌ر سه‌ردان خود ئه‌و پزیشكه‌ بكا له‌شوون تایبه‌ت خوه‌ى دوینیده‌ى هه‌مان ئه‌و پزیشكه‌ ئاده‌میزادیگ تره‌و ره‌فتاریگ تر دیرێد..!!

 

وه‌ى جووره‌ دوینیم كه‌سه‌یلیگ هه‌ن حورمه‌تیان گریم، وه‌لى له‌ڕاسى شایسته‌ى ئه‌و ریز و حورمه‌ته‌ نین، چوینكه‌ به‌رژه‌وه‌ندى خوه‌یان خه‌نه‌ بان گشت به‌رژه‌وه‌ندییگ . هه‌ر له‌وه‌ر ئه‌وه‌یش هه‌ر وه‌ختى ژیانى ئاڵشت بوود ره‌فتاریشى ئاڵشت ئه‌كا، ك یه‌یش بویه‌سه‌ هوكاریگ ئه‌را ئاڵشتبوین شیوه‌ى ره‌فتار.

 

 

حه‌یده‌ر محه‌مه‌د وائلى

ج