نوێنه‌رایه‌تى زوورمینه‌و هه‌قه‌یل كه‌مینه‌

شفق نيوز

سستمه‌ كه‌ن وه‌گشت جووریگ، گوایا ئه‌و ڕووشنهویریه‌ ك په‌یوه‌سه‌ وه‌ دیموكراسیه‌وه‌، هاوكار لایه‌ن سه‌رنه‌كه‌فتگه‌و له‌ هه‌ڵوژاردنه‌یل و له‌هه‌مان وه‌خت ڕازیه‌ وه‌ ئه‌نجامه‌یلى و ڕى ده‌یگه‌ مه‌سه‌له‌ى ده‌س وه‌ده‌سكردن ئاشتیانه‌ى ده‌سڵات و لایه‌ن سه‌ركه‌فتگ. جویر ئه‌وه‌ك باوه‌ گوایا لایه‌ن سه‌رنه‌كه‌فتگ  و لایه‌نگره‌یلى بوونه‌ ئۆپوزسیۆن كاریگه‌ر و ئه‌و قانوونه‌یل په‌یوه‌سه‌ وه‌ سستم دیموكراسى جه‌خت له‌بان ئه‌وه‌ ئه‌كا هه‌ردوگ لایه‌ن سه‌ركه‌فتگ و سه‌رنه‌كه‌فتگ  دگان وه‌ نه‌خش یا ده‌ور شه‌رعى یه‌كترى بنه‌ن. مه‌عناى ئه‌وه‌سه‌ هه‌ر یه‌كیگ له‌لیان ده‌ور شه‌رعى خوه‌ى دیریگ  و نوێنه‌ر حوكم كه‌مینه‌س له‌ناو حوكم زوورمینه‌ ك له‌ڕى سه‌ندووقه‌یل ده‌نگداینه‌وه‌ ئه‌نجام دریه‌یگ. ئه‌ویش له‌وه‌رانوه‌ر ئه‌وه‌ك قه‌بوولكردن زوورمینه‌ وه‌ هه‌قه‌یل كه‌مینه‌ یا ئه‌قه‌لیه‌ له‌وه‌ر ئه‌وه‌ك كه‌مینه‌ وه‌و شیوه‌ بڕیارداو نه‌تواس بگه‌ردیگه‌ شوون كیشه‌و گرفت و تون وتیژى باریگه‌ كار.

بیگومان ده‌ستووره‌یل دیموكراسى جه‌خت له‌بان ئه‌وه‌ كه‌ن ك بایه‌سه‌ له‌بان ده‌نگده‌ره‌یل بزانن ك حكوومه‌ت تازه‌ سیاسه‌ته‌یل چه‌فت نیه‌گریگه‌ وه‌ر، چوینكه‌ باوه‌ڕ هاوبه‌ش ئه‌و چشت خراوه‌ له‌لى نیه‌كه‌فیگه‌وه‌.

ئه‌زموون راسه‌قینه‌مان له‌عراق و له‌ژیر كۆنترۆڵ رژیمه‌یل دكتاتۆرى و تۆتالیتارى یه‌ك له‌شوون یه‌ك، له‌یوا له‌لیمان تواس خوه‌مان قورتار بكه‌یم له‌ كاره‌ساته‌یلیان و مقه‌یه‌ت خوه‌مان بویمن له‌و چشته‌یله‌ ك په‌یوه‌سن وه‌ سیاسه‌ت كوشتن و له‌ناوبردن و بیده‌نگى ك ئه‌وه‌ تواس گشت مه‌ردم له‌ژیر سایه‌ى ریڕه‌و حزبیگ و ته‌نیا فكره‌یگ بمینن. بیگومان گشت ئاده‌میزادیگ  باوه‌ڕ تایبه‌ت خوه‌ى دیریگ و ئه‌گه‌ر له‌بان ئه‌و باوه‌ڕه‌ نه‌وگ نیه‌چووگ ئه‌را سه‌ندووقه‌یل ده‌نگداین و ده‌نگ بیه‌یگ  له‌به‌رژه‌وه‌ندى كه‌سیگ  یا دژ كه‌سیگ، وه‌ل ئه‌وه‌یشا له‌هه‌ر وه‌ختیگ  تویه‌نیگ ڕاى خوه‌ى ئاڵشت بكا، مه‌عناى ئه‌وه‌سه‌ مه‌رج نیه‌ ئه‌وه‌ك ئیسه‌ ده‌نگ ئه‌ڕاى ده‌یم له‌ئاینده‌یش ده‌نگ به‌یمنه‌پى، ئمجا جویر ئه‌وه‌ك باوه‌ڕه‌یل ئاڵشت بوین، وه‌و جووره‌ ده‌سڵاتداره‌یلیش ئاڵشت بوون، ك ئه‌ویش یه‌كیگه‌ له‌ سفه‌ته‌یل جوان سستم دیموكراسى ك توایم باریمنه‌ى ده‌س له‌عراق تا كوومه‌ڵگاى خاسیگ  له‌لى دروس بكه‌یم.

باوه‌ڕ خودى مه‌ردم و باوه‌ڕ نوێنه‌ر هیزه‌یل سیاسى، بایه‌سه‌ خوه‌ى  وه‌ زوور نه‌چه‌سپنیگ ته‌نیا وه‌ قانوون نه‌وگ، ئمجا ئه‌گه‌ر مه‌سه‌له‌گه‌ وه‌چه‌واشه‌وه‌ بویاتاگ، ئه‌وه‌ بیگومان كه‌فتیایمه‌ ناو جووریگ له‌گرفت و كیشمه‌كیش و خزمه‌ت وه‌كه‌سمان نه‌كرد. هه‌ر له‌وه‌ر ئه‌وه‌یش بایه‌سه‌ له‌بانمان ڕیگه‌ خوه‌ش بكه‌یم ئه‌را دروسكردن كوومه‌ڵگایگ له‌سایه‌ى به‌خته‌وه‌رى و خوه‌شى بژیه‌یگ و هه‌ق كه‌مینه‌ له‌تى مسۆگه‌ر بووگ.