پيه‌ڵ سرات له‌ناونی جوان و سه‌رفرازی

شفق نيوز

  هه‌ميشه‌ جايه‌ڵ جوان له‌گشت وه‌خت و سه‌رده‌ميگ وه‌ نه‌وه‌يل ئاينده‌ تاريف كريانه‌و له‌ولاَته‌يل پيشكه‌فتگ قه‌در و حورمه‌ت تايبه‌تيگ له‌ليان گيريه‌يد و گشت جووره‌ خزمه‌تگوزارييگ پيشكه‌ش وه‌پيان كريه‌يدو حكوومه‌ت ئه‌و وڵاته‌يليشه‌ وه‌ چه‌و گه‌شبينی و ئوميده‌و نوڕنه‌ ئاينده‌ی رووشن جايه‌ڵه‌يليان و ته‌نانه‌ت كوومه‌ڵگايش وه‌ ريز و حورمه‌ته‌و گوزراش له‌ی چين دويارووژه‌ ئه‌كا وه‌و ئوميده‌ ك نه‌ف له‌ ئه‌زموون و به‌هره‌يليان وه‌ربگرن، وه‌لی دوينيد له‌ وڵاتيگ كاولكرياگ جوور عراق جايه‌ڵ له‌تی گرفتار ده‌س به‌دبه‌ختی و بيكاری و كه‌مدرامه‌تيه‌و خه‌و وه‌ سه‌رفرازی و ئاسووده‌ييه‌و دوينيدو ئه‌زه‌ره‌ته‌يل فريه‌يگ له‌ دڵ و ده‌روينی په‌نگه‌و خواردگه‌و ناچاره‌ سه‌ر ئه‌را بيده‌سڵاتی و چه‌وسيان خوه‌ی بچه‌منيدو رووژگاری وه‌ ژان و ده‌رده‌سه‌ری گوزه‌ر بكا.

له‌يرا پرسيار ئه‌وه‌ كه‌يم و ئويشيم: ئايا له‌ی عراق تازه‌ ك ئمڕوو كليل گه‌نجينه‌و گشت سامان و دارايه‌گه‌ی كه‌فته‌سه‌ ده‌س كه‌سه‌يليگ بی وژدان ك تا دويه‌كه‌ ئای خودا نه‌ياشتن و له‌بان ماڵ ملله‌ته‌و خوه‌شگوزرانی وه‌ پويل حه‌رام كه‌ن، تا چه‌نيگ ئاسانكاری كرياگه‌ ئه‌را پڕه‌وكردن خواست جايه‌ڵه‌يل؟ ‌ئايا جايه‌ڵه‌يل كه‌ی تويه‌نن مه‌رامه‌يل دڵيان جيوه‌جی بكه‌ن؟ تا چ راده‌يگ ده‌سڵات ناديموكراسی عراقی‌ جواو داواكاريه‌يل جايه‌ڵ جوانه‌يل داسه‌و؟ ريژه‌ی بيكاری جايه‌ڵه‌يل تا كه‌ی دريژه‌ بياشتوود؟ له‌وه‌رچه‌ ده‌سڵات و نوێنه‌ره‌يل ملله‌ت هساو ئه‌را كه‌سايه‌تی و هه‌وه‌جی جايه‌ڵه‌يل ناكه‌ن؟ كی وه‌رپرسه‌ له‌ دوياكه‌فتن جايه‌ڵ له‌ مه‌سه‌له‌ی پيكهاوردن ژيان هاوسه‌ری و ده‌سهه‌ڵگرتن له‌ خوه‌ندن وه‌ بوونه‌ی بيكاری و نه‌داريه‌و؟ لاداين بڕيگ له‌ جايه‌ڵه‌يل له‌ڕی ره‌فتار پاك و په‌سه‌ن و خووگرتنيان وه‌ مادده‌يل بيهوشكه‌ر و ئه‌نجامداين كرده‌وه‌يليگ نه‌گونجياگ وه‌ل داب ونه‌ريت كوومه‌ڵگا، كی له‌لی وه‌رپرسه‌؟.

ئيمه‌ ئه‌گه‌ر چه‌وه‌ڕی جواو ئی پرسياره‌يله‌ له‌ وه‌رپرسه‌يل بكه‌يم، ته‌نيا گفت بی كرده‌وه‌ له‌ليان ژنه‌فيم و هويچ تر، ئه‌گه‌ريش داوای جواو ئی پرسياره‌يله‌ له‌ خود جايه‌ڵه‌يل بكه‌يم، ئه‌وه‌ بيگومان وه‌ هه‌ناسه‌و حه‌سره‌ت كاڵيگه‌و جواومان ده‌نه‌و، وه‌لی ئيمه‌ ئويشيم: خه‌م جايه‌ڵه‌يل عراق له‌سای نوێنه‌ره‌يل ملله‌ت مه‌حاڵه‌ سارێژ بوود، چوينكه‌ ئی چينه‌و گشت چينه‌يل تر ناهمی و بيبه‌ش له‌ هه‌قه‌يل خه‌مخوه‌ر نه‌يرن و ره‌سينيان وه‌ كنار ئاسووده‌يی و سه‌رفرازی له‌ليان كرياسه‌ پيه‌ڵ سرات و ناچارن وه‌ خه‌م و خفه‌ته‌و رووژگار بووه‌نه‌ سه‌ر.

جه‌ماڵ ئه‌ركه‌وازی