كورد، پارسه‌نگ ياهاوسه‌نگ بوود له‌ عراق!؟

شفق نيوز

ئه‌گه‌ر نه‌ويشيمن، ده‌وڵه‌ت قانوون وه‌ سه‌رۆكاتی نوری مالكی سه‌رۆك وه‌زيره‌يل وه‌ل ليست عراقيه‌يا وه‌ تايبه‌ت له‌ وه‌ر كێشه‌گه‌ی تارق هاشمی جيگر سه‌رۆك كۆمار.

له‌ راسيا هه‌ميشه‌ عراق هه‌له‌ سه‌ره‌تای دروس بوينێ بێ كێشه‌ نه‌ويه‌، وه‌لی فره‌ وه‌ختێش كێشه‌يله‌ وه‌ زوور هێز كپه‌و كريانه‌.

ئه‌گه‌رنه‌ گشتمان زانيمن ك ململانی شيعه ‌و سوننه‌ ڕه‌گ سه‌دان ساڵه‌ ديرێد و چه‌ن جاريش جه‌نگ خويناویش وه‌ دی هاورديه، ‌و چاره‌سه‌ريش وه‌ تايبه‌ت ئه‌ی ململانی  له‌ روی ئايينيه‌ ئاسان نيه‌.

مه‌سه‌له‌ی كورديش ئه‌وه‌گ ئاشكرايه ‌و ڕووشنه‌ وه‌ چه‌ن چاڵی وبه‌رزيه‌و ره‌ی بويه‌، ئه‌را به‌ڵگه‌يش جينۆسايدكردن كورد له‌ لايه‌ن ڕژيم به‌عسه‌و شاتيده‌ر ئه‌و كێشه‌سه‌، ئه‌وه‌گ بێجگه‌ له‌ سياسه‌ت ته‌عريب ئه‌را پاكه‌و كردن و ئه‌وسڕين شوون و نوين كورد ك له‌ لايه‌ن ڕژيمه‌يل يه‌ك له‌ دويای يه‌ك به‌غدا په‌يڕه‌و كريا.

له‌ دويای ڕميان به‌عس ك وه‌ده‌س هێزه‌يل ئه‌مريكا له‌ نيسان ٢٠٠٣ يه‌و، باڵانس كلاسيك نه‌مه‌ن و بارو‌دۆخ ناوڕاس و خوار عراق وه‌ ته‌مامی وه‌ره‌و شڵه‌قيان چی، له‌ ٢٠٠٦  تا٢٠٠٧ جه‌نگێگ ناخوه‌يی له‌ ناونی ئه‌ی دومه‌زه‌وه‌ هاته‌ دی ك وه‌ په‌ێ بڕێگ سه‌رچاوه‌ بويه‌ مه‌مه‌ر وه‌گ هه‌زارن كه‌س بكوشيه‌ن.

وه‌لی وه‌ دی هاتن وه‌زعێگ هاوشێوه‌ی چه‌ن ساڵ گوزه‌يشته‌ ئه‌را فره‌ ترسناك و خه‌ته‌ره‌؟! ئاشكراس له‌وه‌ر ئه‌وه‌گ ئه‌یجاره‌ هێز ئه‌مريكا نيه‌سه‌ی تا ناوجی له‌ ناونی ميليشايل ئه‌ی دو هێزه‌ بكا، هێز پێشمه‌رگه‌يش وه‌ ته‌نيا نه‌ توانای يه‌ ديرێد بچووده‌ ناو ئه‌ی كێشه‌يه‌‌و نه‌ باوه‌ڕيش كه‌م ئه‌و ئاماده‌گيه‌ داشتوود تا بچووده‌ ناو ئه‌ی داوه‌.

وه‌ی مانا: له‌ ئه‌گه‌ر هه‌ر پێشهاتێگ له‌ی شێوه‌و دوباره‌ بوينێ، ئه‌وه‌ بووده‌ جه‌نگێگ فره‌ وێرانكه‌ر، نه‌گ هويچ هێزيگ هه‌رێميش ناتوانێد بايده‌ ناويه‌و، له‌وانه‌يشه‌ پرشنگ ئه‌ی جه‌نگه‌ نه‌گ هه‌ ئه‌را هاوسايله‌گه‌، به‌ڵكوو سه‌رانسه‌ری ناوچه‌گه‌يش بگرێده‌و وه‌ر.

پرسيارێگ له‌يره‌ ئه‌ياده‌ وه‌ر، بێگومان له‌و وه‌خته‌گ ئه‌ی جه‌نگه‌ روی نه‌ێدو ته‌نيا ململانێگ له‌ چوارچێوه‌ی ململانی سياسی بمنێده‌و له‌ عراقا، ئايا كورد پارسه‌نگ بوود، هه‌ر ئه‌و جووره‌گ فره‌ له‌ی لاو له‌ولا باس كه‌ن، خوه‌ی ساغه‌و بكا له‌ سه‌ر لايگ يا خووهاوسه‌نگی خوه‌ی چوی يه‌كێگ له‌ پێكهاته‌يل سه‌ره‌كی ك ده‌وڵه‌ت عراق پێكهاورديه‌، بپارێزێت.

له‌ به‌رژوه‌ندی كورد نيه‌ باڵانس ئه‌ی دو هێزه‌ خڕه‌و بوود وه‌ لای يه‌كێگيانا له‌نگه‌و بوود، ئيمه‌ ده‌سڵات كه‌مينه‌ی سوننه‌ ئه‌را ماوه‌ی هه‌شتا ساڵ تاقی كرديمنه‌و، ئه‌گه‌ر شيعه‌يش چوی كۆپيێگ له‌ ئيران وه‌ربگريم، ئه‌وا ئه‌رامان ڕووشنه‌ ك ڕايان چوين بوود له‌ سه‌ر ئيمه‌.

وه‌په‌ێ ئه‌و داتايله‌گ له‌ سياسه‌ت بڕێگ له‌ هێزه‌يل وه‌ ناو شيعه كه‌فيده‌ ده‌سمان و وه‌ پيمان ره‌سێد، ئه‌را ئيمه‌ مژده‌وه‌خش نين. نيه‌ود ئيمه‌ دڵمان وه‌ ئه‌و وازبوين و  قه‌وڵه‌يله‌گ ئيسه‌ له‌ لايه‌ن ئه‌وانه‌و وه‌ پيمان ده‌ن خوه‌ش بوود، چوين ك هه‌ميشه‌ هه‌ر ئه‌ی جووره‌ بويه‌، ڕژيمه‌يل يه‌ك له‌دويای يه‌ك تا يه‌گ ڕه‌سنه‌ ئه‌و جيه‌ پايگای خوه‌يان قورسه‌و كه‌ن و وه‌ هێزه‌و بوون، بڕێگ قه‌وڵ ده‌ن، وه‌لی دوياتره‌ك له‌و قه‌وڵه‌يل خوه‌يان به‌تاڵيانه‌و بوود، هه‌ وه‌جووره‌گ له‌ گوزه‌يشته‌ ئه‌ی ئه‌زموونه‌ ديمنه وه‌ چه‌و خوه‌مان، ئمجا كورد چه‌ بكه‌ی...!؟.

كورد جوی وه‌رده‌وام بوين، ئه‌گه‌ر ده‌رفه‌ت ئه‌را جيابوين نه‌ود، ئه‌و بايه‌د چوی هه‌ميشه له‌ سه‌ر فيدارلی و حكوومه‌ت هاوبه‌ش پا به‌يده‌ گه‌ز و جه‌خت له‌سه‌ريه‌و بكا.

كوڵ وكوڵوڕ تا ئه‌ی عراقه‌ هه‌سه‌ی پێويسته‌ ته‌وافق بوود، چوين ك نه‌ جارتره‌ك عه‌ره‌و سوننه‌ ئه‌و ده‌سڵات ره‌ها ئه‌گريده‌ ده‌س له‌ عراق و نه‌ عه‌ره‌و شيعه‌يش توانێد ده‌سڵات خوه‌ی وه‌ سه‌ر كوردو عه‌ره‌و سوننه‌يا فه‌رز بكا، ئه‌را پێكهاتيه‌يل هه‌س هه‌ر وه‌يجووريشه‌و ئه‌را كورديش، له‌ ناو خود پێكهاته‌يل هێزێگ سياسی په‌راويز بخريه‌يد يا له‌لی نزيكه‌و بوود، وه‌لی دويره‌و خسن يا خوو په‌راويز خسن پێكهاتێگ سه‌ره‌كی جی قه‌بووڵ كردن نيه‌و سازشی له‌سه‌رێ نيه‌كريه‌يد.

بايه‌د ته‌مام لايه‌نه‌يل له‌ی راسيه‌ هاڵی بوون شكست سه‌نتراڵيزمگرايی فيدرالی هاوردنه‌و نوا ئه‌را سه‌رنه‌گرتن سيستمێگ فيدرالی، مێژوو وه‌ره‌و دويای نيه‌وه‌ێد، به‌ڵكوو ئه‌وه‌ ئه‌كا تا عراق پارچه‌ پارچه‌ بوود و بووه‌ ديفاكتۆێگ و هويچ بوار تره‌ك نيه‌مێنيه‌يد.

كورد نيه‌ود بچوود ناو گه‌مه‌يه‌گ ك مه‌ترسی و هه‌ڕشه‌يل فره‌ی له‌ ده‌سكه‌فته‌يلێ زياتره‌و ئه‌كا، پارسه‌نگ بوين وه‌ره‌و لايه‌گ چ عه‌ره‌و‌ سوننه‌ و چ عه‌ره‌و‌ شيعه وه‌ مانای په‌راويز خسن يا دويره‌ كه‌فتن ئه‌وكه‌ی تره‌، ئه‌گه‌ر ئيمه‌ ئه‌و قاپيه‌ واز بكه‌يمن، ئايا نيه‌ود هساو ئه‌ڵه‌وگه‌ردانن ئه‌ی هاوكێشه‌يله‌ بكه‌ين، ئه‌و وه‌خته‌ چاره‌نويس چوين بوود؟!.

كورد له‌ی ياريه‌ قازانج ناكا، هاوسه‌نگی پێكهاته‌يل له‌ به‌رژه‌وه‌ندی كورده‌، نه‌گ له‌ ناوچێن هاوسه‌نگی و سيسته‌م ته‌وافقی، ئه‌را يه‌ له‌ به‌رژه‌وه‌ندی كورده‌ وه‌رگری له‌ی هاوسه‌نگيه‌ بكا، نه‌گ هوير له‌ پاره‌سه‌نگ بوين له‌ به‌رژه‌وه‌ندی ئه‌و لايه‌ن يا ئه‌ی لايه‌نه‌، وه‌ی مانا كورد بايه‌د له‌ عراقا هاوسه‌نگ بوود نه‌ پاره‌سه‌نگ...

 

سه‌باح تاهیر