ياساى وه‌رده‌وام ره‌گه‌زنامه‌ى عراقى ساڵ 1963

شفق نيوز

داناين ئى ياساى دڕنده‌ى زاڵمانه‌ له‌وه‌ر جيوه‌جيكردن به‌ياننامه‌ى شماره‌(13)ى به‌دناو كوده‌تاكه‌ره‌يل عه‌فله‌قى بوى ك بڵاو كريا له‌ رووژنامه‌ى ئه‌لوه‌قايع عراقى شماره‌(771)له‌ 18/ 2/ 1963 ك گوزارش له‌ كينه‌ت ژير وه‌ژير و پيلانه‌يل پڕ گومانيان كرد له‌بان سه‌ركرده‌يل و حكومه‌ت شۆڕش 14ى ته‌ممووز/ 1958 و ده‌سكه‌فته‌يل نيشتمانى و ئى به‌ياننامه‌ى شووميشه‌ خاڵ سيه‌يگ بوى له‌ مه‌سه‌له‌ى هه‌ڵمه‌ت و تاوانه‌يل له‌ناوبردن وه‌جه‌م دژ ئنسانيه‌ت و ياساشكنه‌يل و پاكسازيكردن جه‌سه‌يى و كوشتارگه‌ى خويناوى ده‌رهه‌ق رووڵه‌يل ملله‌ت عراقى و له‌وه‌رگرتن سياسه‌ته‌يل پاكسازى ره‌گه‌زى و جياوازيكردن ده‌رهه‌ق هه‌ركه‌سيگ له‌ دژيان وسياو له‌ سه‌ر ليسته‌ى قوربانيه‌يل و خه‌بات بوين، ك ئه‌وانه‌يش رووڵه‌يل كورد فه‌يلى بوين له‌ ئاكام كاره‌يل ئازايه‌تييان و روى وه‌ڕوى بوينه‌وه‌يان ئه‌را ماوه‌ى يه‌ك هه‌فته‌ى ته‌مام له‌ ناوچه‌يل "عه‌گد ئه‌لئه‌كراد، مه‌يدان نه‌هزه‌، باب شێخ، كازميه‌" ك له‌تى ده‌سڵات به‌عس و چه‌ته‌يل ترۆريستى و حه‌ره‌س ناقه‌ومى تاوانيگ نه‌مه‌ند ئه‌نجامى نه‌يه‌ن و له‌وانه‌يش له‌سێداره‌دان وه‌جه‌م و وه‌كارهاوردن هيز و كينه‌ت و تون وتيژى و له‌ناوبردن و كوشتن ده‌رهه‌ق وه‌رگريكه‌ره‌يل پاڵه‌وان له‌ زيندانه‌يل رخه‌وبه‌ر و يانه‌ى ئۆڵه‌مپى وه‌بى دادگاييكردن ياسايى، ك له‌تى خراوترين و سه‌ختترين سزايه‌يليگ وه‌چه‌و دين و دوياخريش داناين ياساى ره‌گه‌زنامه‌ى عراقى شماره‌(43)ى ساڵ 1963 له‌وه‌ر زينگه‌وكردن ئامانجه‌يل و سياسه‌ته‌يل ره‌گه‌زپه‌ره‌سى و نيازه‌يل پڕ كينه‌ت و توڵه‌كردنه‌وه‌يان بوى له‌ رووڵه‌يل پيكهاته‌ى فه‌يلى و زه‌فتكردن ماڵ و موڵكه‌يليان له‌ڕى بيبه‌شكردنيان له‌ مافه‌يل هاووڵاتيبوين و ره‌گه‌زنامه‌ وه‌ل گومانكردن له‌ ره‌سه‌نايه‌تى و ناسنامه‌ى نيشتمانييان ك مێژوو كويه‌نيگ ديرێد.

ئى كرده‌وه‌يل تاوانكاريه‌ له‌ كوده‌تاى 8 شووبات و ئه‌نجامده‌ره‌يلى نه‌كه‌فتنه‌ وه‌ر سزا و ياسايه‌يل و پرس وپرسكارى و وه‌رپرسيارێتى دادگايى و دووسى نيشتمانى و دادگه‌رى ئنتقالى له‌ عراق له‌ شوون رژيم سته‌مكار و پيكهاته‌ى فه‌يلييش يه‌كه‌مين مه‌ردمانيگ بوين هه‌واى ئازادى هه‌ڵمژين دوياى نه‌مه‌ندن ئه‌و رژيمه‌، وه‌لێ هيمان ده‌زگايه‌يل ده‌وڵه‌ت وه‌ هه‌مان ئه‌قڵيه‌ت ميراتگه‌ر به‌عس رمياگ و ده‌زگايه‌يلى مامڵه‌ ئه‌كه‌ن ك هه‌رچه‌نى دادگاى باڵاى تاوانه‌يليش بڕيار خوه‌ى له‌ى باوه‌ته‌و ده‌ركرد له‌ 29 / 11 / 2010، ك تاوانه‌يل ئه‌نجامدرياگ دژ پيكهاته‌ى فه‌يلى وه‌ تاوان له‌ناوبردن وه‌جه‌م تاريف كرد و دگان وه‌پى نا وه‌ گووره‌ى ياساى شماره‌(10)ى ساڵ 2005 و ريككه‌فتن نواگيرى له‌ تاوانه‌يل وه‌جه‌م و سزاداين له‌بانى وه‌گووره‌ى ياساى ساڵ 1948 و ريككه‌فتن نواگيرى له‌ جه‌نگ و تاوانه‌يل دژ ئنسانيه‌ت ساڵ 1968.

ئمڕوويش داوا له‌ ده‌وڵه‌ت عراقى ئه‌كريه‌ێد جيوه‌جى قه‌وڵه‌يلى بكا ئه‌را لاوردن گشت شوونه‌وار خراويگ ك ره‌سيه‌ پيكهاته‌ى فه‌يلى ك به‌شيگن ره‌سه‌ن له‌ پيكهاته‌يل ملله‌ت عراقى وه‌ گووره‌ى ده‌ستوور و بڕيار ئه‌نجومه‌ن وه‌زيره‌يل شماره‌(426) له‌ ساڵ 2010 و بريار ئه‌نجومه‌ن نوێنه‌ره‌يل شماره‌(18)ى ساڵ 2011 و بڕيار سه‌رۆكايه‌تى كۆمار شماره‌(6) له‌ ساڵ 2012، ك هه‌ر بايه‌سه‌ كيشه‌ى دادگه‌رانه‌ى نيشتمانى له‌ كاره‌يل بنه‌ڕه‌تى بدێ له‌ دوسيه‌ى خاسسازيه‌يل بنه‌ڕه‌تى و ئاڵشتكاريه‌يل گشتگير و هاوسه‌نگى نيشتمانى و پرووسه‌ى سياسى وه‌خاتر يه‌كلاييكردنه‌وه‌ى وه‌ يه‌كجارى و نه‌هيشتنى جوور مره‌كه‌ويگ له‌بان قاقه‌ز وه‌ دريژايى 13 ساڵ گوزه‌يشت.

ماهر ره‌شيد فه‌يلى