كورد ئه‌و نه‌ته‌وه‌سه‌ ك تيه‌نگ ديموكراسيه‌

شفق نيوز

وه‌ربه‌س له‌وه‌رده‌م سه‌قامگيری ئی وڵاته‌ ، ئه‌وه‌سه‌ ك گشت چين و لايه‌نه‌يل جووراو جوور هويريگ له‌ ديموكراسيه‌ت بكه‌ن و جوير بنه‌ڕه‌تيگ ئه‌را بونياد وڵاتيگ كاولكرياگ دابنريه‌يگ و پيشوازی گه‌رميگ له‌لی بكريه‌يگ و ئه‌زموون وڵاته‌يل ديموكراسی له‌وه‌رچه‌و بگيريه‌يگ و بزانن نه‌ف و زه‌ره‌دی چه‌س ، بيگومان ديموكراسی بيجگه‌ نه‌ف هويچ زه‌ره‌ديگ نه‌يريگ ئه‌راهه‌ر وڵاتيگ ئه‌گه‌ر بايگ و ، وه‌ڕاسی په‌يڕه‌و بكريه‌يگ و ريز وحورمه‌ت له‌بنه‌مايه‌يلی بگيريه‌يگ .

ئمڕوو زه‌حمه‌ته‌ حكوومه‌ت و پرووسه‌ی سياسی له‌عراق بكه‌فيگه‌ بان پای خوه‌ی ئه‌گه‌ر بايگ و پشت له‌ هه‌وه‌جه‌ی ديموكراسی بكه‌ن ، بايه‌سه‌ نه‌يلن نه‌ياره‌يل ديموكراسيه‌ت بڕه‌سنه‌ ئامانج خوه‌يان و قسه‌ی راسه‌قينه‌ی خوه‌يان له‌ی مه‌يدانه‌وه‌ ئاشكرا بكه‌ن يا وتار سياسيان ريك بخه‌ن و باڵ له‌لی ئه‌ڵماڵن و پشت وه‌پی بووه‌سن و دژ ريگره‌يل ديموكراسی گام بنه‌ن و په‌ياميگ خاس و گونجياگ و دڵخوه‌شكه‌ر بڕه‌سننه‌ ملله‌ته‌يل عراق و جه‌خت له‌بان چه‌سپانن ديموكراسيه‌ت بكريه‌يگ ، چوينكه‌ ته‌نيا ديموكراسيه‌ت چاره‌ی زه‌خم كويه‌ن و تازه‌س و نيه‌يليگ ماڵويرانی و كاولكاری په‌ره‌ بسينيگ .

ديموكراسيه‌ت ته‌وافقی ديموكراسيه‌تيگه‌ پڕ له‌تام به‌خته‌وه‌ری و سه‌رفرازی ، جی وه‌جيكردن ده‌ستووره‌ ، دابينكردن و هاوردنه‌وه‌ی هه‌قه‌يله‌ دوير له‌گشت دروشم يا شعاره‌يليگ ناوه‌جی ، وه‌لی يه‌يش هه‌وڵ و ته‌قلای گشتلايه‌نی توايگ و بايه‌سه‌ كار جددی له‌بانی بكريه‌يگ و گشت ناكووكی و كيشمه‌كيشه‌يل سه‌خت سياسی بخريه‌يگه‌ كنارو به‌رژه‌وه‌ندی گشتی له‌وه‌رچه‌و بگيريه‌يگ .

بيگومان دروشم يا شعار سه‌ره‌كی كورد (چه‌سپانن ديموكراسی)ه‌ له‌وڵاتيگ ك وه‌دريژايی دامه‌زراننی خه‌و خوه‌شی نه‌يه‌و دوير بويه‌ له‌په‌يڕه‌وكردن ديموكراسيه‌ت و هه‌ق نه‌ته‌وه‌يل له‌تی ژيرپا كرياگه‌ ، نامه‌ی ملله‌ت كوردو سه‌ركردايه‌تی كورد ئه‌را ده‌سڵاتداريل هاوبه‌ش له‌ی وڵاته‌و ئه‌را گشت ملله‌ته‌يل عراق وه‌بی پيچ وپه‌نا ديموكراسيه‌ته‌ . چوينكه‌ يه‌يش جه‌نگ ئيمه‌ وه‌ل نه‌ياره‌يلا ديموكراسيه‌تا يه‌كلاوه‌ ئه‌كاو كورد تيه‌نگ ديموكراسيه‌و هويچ گومانيگ له‌ی بڕياره‌ نيه له‌لايه‌ن كورده‌وه‌ . ئمجا بايه‌سه‌ پيكهاته‌يل تر عراق له‌ی راسيه‌ بڕه‌سننه‌وه‌و هه‌وڵ زياتر بيه‌ن له‌وه‌رخاتر وه‌ديهاوردنی ك هيمان ئی حاڵه‌ت كزه‌و پشتگيری خاسيگ نه‌يريگ و گشت لايه‌نه‌يل بيجگه‌ كورد ده‌س له‌ناو ده‌س نين ئه‌را وه‌ ديهاوردنی ، ك بيگومان يه‌يش خاڵيگ بنه‌ڕه‌تيه‌ ئه‌را ده‌سه‌وه‌ركردن و په‌ياكردن ديموكراسيه‌ت له‌ عراق تا ئی وڵاته‌ ئه‌من و ئاسايش و سه‌قامگيری له‌تی به‌رقه‌رار بووگ و گشت هه‌قيگ له‌تی دياريكرياگ بووگ ، وه‌ی جووره‌ تويه‌نريه‌يگ پيشكه‌فتن خاسيگ باريه‌يگه‌ ده‌س و سه‌رانسه‌ر عراقيش پڕ بووگ له‌ خوه‌شگوزرانی و ئاوه‌دانی و نه‌ياره‌يل ديموكراسييش سه‌ر خوه‌يان بيه‌ن له‌ديوار و نه‌تويه‌نن دی عراق بووه‌نه‌وه‌ ئه‌را سه‌رده‌م دكتاتۆريه‌ت . مه‌يل كورد وه‌لای ديموكراسيه‌تا هه‌ر له‌سه‌رده‌م شووڕشه‌يله‌وه‌ تا رووژ ئمڕوو ئاشكراو دياره‌ ، وه‌رده‌وام جه‌خت له‌بان ديموكراسيه‌ت ئه‌را گشت ملله‌ته‌يل عراق كردگه‌ ، وه‌ل ئه‌وه‌يشا له‌ی مه‌يدانه‌وه‌ گام خاس ناگه‌و توينيگ وه‌گشت باوه‌ڕيگه‌وه‌ په‌يڕه‌وكار و جی وه‌جيكار گشت بنه‌مايه‌يلی بووگ له‌ئيسه‌و له‌ئاينده‌يش .