نه‌ورووز لاده‌ر خه‌م و سه‌رچه‌وه‌ى به‌خته‌وه‌ریه‌

شفق نيوز

بویه‌. مه‌ردم كورده‌وارى باوه‌ڕیان له‌یوا بویه‌ ك نه‌ورووز هه‌میشه‌ لاده‌ر خه‌م و سه‌رچه‌وه‌ى به‌خته‌وه‌رى بویه‌. هه‌ر له‌وه‌ر ئه‌وه‌یش له‌سه‌رده‌م پاشایه‌یله‌وه‌ بگر تا رووژگار ئیسه‌مان مه‌ردم فه‌قیر و ژیرده‌سه‌یش چینه‌سه‌ پیرى نه‌ورووز و خواردن عه‌یدانه‌ ئاماده‌ كردنه‌ ئه‌ڕاى.

ئاده‌میزاد هه‌ر له‌سه‌ره‌تاى وجوودیه‌وه‌ ك خوه‌ى له‌ كومه‌ڵگا دیه‌سه‌وه‌و خه‌ریك ڕاوكردن و بویه‌و ژیانى له‌بان خواردن گژوگیا بویه‌، كه‌مه‌ كه‌مه‌ چشت تازه‌ یاى گرتگه‌و ژیانیشى ئاڵشت كردگه‌و ئیجا وه‌رزه‌یل ناسیه‌و زمسان و یه‌خبه‌نان و سروشت له‌یه‌كتر جیاوه‌ كردگه‌و زانستگه‌ وه‌خت كاڵین و ده‌سكه‌ن و خه‌رمان ئه‌ڵگرتنه‌، دى وه‌گووره‌ى چه‌رخیان مانگ و هاتن وه‌رزه‌یل ڕووژشماریگ ئه‌را خوه‌ى دروس كرد.

ئاده‌میزادناسه‌یل ئویشن: مه‌ردم ئه‌وسا بڕیگ له‌لیان وه‌خت تویه‌م وه‌شانن كردنه‌سه‌ سه‌ره‌تاى ساڵ و بڕیگیش وه‌خت ده‌سكه‌نه‌و دره‌و، هه‌ر له‌وه‌ر ئه‌وه‌یش له‌ زوورم وڵاته‌یل یا وه‌رز وه‌هار كردنه‌سه‌ سه‌ره‌تاى ساڵ یا سه‌ره‌تاى پایز یا زمسان.

نه‌ورووز ئه‌وسا ڕووژیگ بى وینه‌ بویه‌و دویاوه‌خت تازه‌بوینه‌وه‌ى سروشت و یه‌كه‌م رووژ ساڵ بویه‌، وه‌ ماناى رووژ تازه‌ تیه‌یگ ، دى مه‌ردم زانستنه‌ نه‌ورووز وه‌خت تازبوینه‌وه‌ى دونیاس و باوه‌ڕ فره‌یگ وه‌پى داشتنه‌. له‌ناو شوونه‌واره‌یل بابل به‌ڵگه‌یگ  دینه‌سه‌وه‌ ك جه‌مشید پیشداد پاشاى ئاریه‌یل له‌ یه‌كه‌م رووژ نه‌ورووز چیه‌سه‌ بان ته‌خت و به‌خت پاشایه‌تى، دى له‌و وه‌خته‌وه‌ پاشایه‌یل نه‌ورووز كردنه‌سه‌ عه‌ید. وه‌ گووره‌ى ئه‌و به‌ڵگه‌یلیشه‌ ك له‌سه‌رده‌م هه‌خامنشیه‌یل مه‌نده‌سه‌وه‌، له‌یوا دیاره‌ له‌هویچ رووژگاریگ ئه‌وه‌نه‌ى ئه‌و وه‌خته‌یله‌ نه‌چینه‌سه‌ پیشوازى نه‌ورووزه‌وه‌. وه‌ل ئه‌وه‌یشا باوه‌ڕ وه‌ ئه‌وه‌یش داشتنه‌ ك گوایا له‌و رووژه‌ خاسى له‌بان خراوى سه‌ركه‌فیگ و نه‌ورووز كردنه‌سه‌ عه‌ید گه‌ورایگ و جنگ تازه‌ له‌وه‌ر كردیان و خوه‌شى و هه‌ڵپه‌ڕكه‌ كردیان له‌و رووژه‌.

له‌شوون هاتن دین ئسلامیش نه‌ورووز هه‌رچه‌نى هه‌وڵ دریا په‌لكیش بكریه‌یگ  وه‌ره‌و نه‌مان وه‌لى وه‌و حاڵیشه‌وه‌ له‌ناو مه‌ردم هه‌ر مه‌نده‌وه‌، ك هه‌رچه‌نى دین پاك ئسلام دوشمنایه‌تى داب ونه‌رته‌یل جوان هویچ نه‌ته‌وه‌یگ نه‌كردگه‌، وه‌لى بڕیگ له‌پاشاو خه‌لیفه‌یل له‌تاو هویر وه‌رته‌نگ خوه‌یان هه‌وڵ ئه‌وه‌ دیان شوونه‌وار نه‌ته‌وه‌یل تر نه‌یلن له‌ وجوود، ئیسه‌یش ئه‌وه‌سه‌ نه‌ورووز گشت ساڵیگ دوباره‌وه‌ كریه‌یگ و مه‌ردم پیشوازى گه‌رمیگ له‌لى كه‌ن و كوردستانیش تویه‌نیگ به‌رنامه‌یگ له‌یوا دابنه‌یگ ئه‌را هانداین گه‌شتیاره‌یل تا مه‌یلیان بكیشیگ وه‌ره‌و لاى نه‌ریته‌یل كورده‌وارى و له‌ هه‌مان وه‌خت بووگه‌ سه‌رچه‌وه‌یگ ئه‌را داهات وڵات.