هه‌ڵكه‌فت گه‌شتیارى له‌هه‌رێم كوردستان

شفق نيوز

له‌ڕوى داهات، ئه‌یه‌ بیجگه‌ ئه‌وه‌ك ستوینیگه‌ له‌ستوینه‌یل په‌یاكردن پویل ئه‌را وڵات و مه‌یدانیگ ئه‌را وه‌كارخستن مه‌ردم بیكار.

كه‌رت گه‌شتیارى بایه‌سه‌ گرنگى وه‌پى بدریه‌ێد و مه‌یل گه‌شتیاره‌یل وه‌پى بكیشید، هه‌رێم كوردستانیش یه‌كیگه‌ له‌و شوونه‌یل گه‌شتیارى خاسه‌ ك ناوچه‌ى گه‌شتیارى فره‌یگ گرته‌سه‌ خوه‌ى ئه‌را كیشانن مه‌یل گه‌شتیار و پیاوه‌یل كار له‌وه‌ر خاتر وه‌سه‌ربردن وه‌خته‌یل خوه‌شیگ له‌ساى ئه‌و دیمه‌نه‌یل جوان و دڵڕفنیه‌، هه‌ر له‌وه‌ر ئه‌وه‌یش خواستیگ نیشتمانیه‌ له‌بان حكوومه‌ت هه‌رێم كوردستان ك مه‌سه‌له‌ى كه‌رت گه‌شتیارى و په‌ره‌ وه‌پیداین و كاركردن ئه‌را وه‌دیكردن روى وه‌ر یا مه‌ساحه‌ى فراوانتر له‌ پاركه‌یل سه‌وز وه‌جوانترین شیوه‌ بگرێده‌ مل و ئه‌و شوونه‌یل گه‌شتیارى و پاركه‌یله‌ خوه‌شتره‌و بكا وه‌جووریگ ك گه‌شتیار ئسراحه‌ت بكا له‌تیان.

له‌وه‌ر خاتر ئى مه‌سه‌له‌ ئه‌وه‌ بوى له‌ 29/ 11/ 2011 په‌نج ملیۆن شه‌تڵه‌ دار له‌هه‌رێم كوردستان كاڵیاو له‌ناوچه‌ى مه‌خمووریش له‌ژیر ناونیشان(كوردستان سه‌وز، ژینگه‌ى ته‌ندروسى)، ك ئه‌ویش ئه‌را دروسكردن روى وه‌ر سه‌وز پڕ له‌ژینگه‌ى ته‌ندروسى و دویر له‌ پیسى.

له‌ى لایه‌نه‌و هه‌وڵ و ته‌قلاى فره‌یگ دریه‌ى ئه‌را په‌ره‌داین وه‌ كه‌رت گه‌شتیارى له‌هه‌رێم وه‌هاوكارى لژنه‌ى گه‌شت وگوزار له‌وه‌ر خاتر به‌رزه‌وكردن ئاست ئى كه‌رته‌ له‌ چوارچیوه‌ى خزمه‌تگوزارى گه‌شتیارى، ئنجا بایه‌سه‌ له‌بان گشت ده‌زگایه‌یل په‌یوه‌ندیدار جویر وزاره‌ت ژینگه‌و ریكخریاگه‌یل كوومه‌ڵگاى مه‌ده‌نى و لایه‌نه‌یل تر كار له‌وه‌ر خاتر په‌ره‌ وه‌پیداین ئى كه‌رت گه‌شتیاریه‌ بكه‌ن له‌ هه‌رێم، هه‌ر له‌وه‌ر ئه‌وه‌یش لژنه‌ى گه‌شتیارى له‌هه‌رێم كوردستان كۆنگره‌ى فراوانیگ له‌شار هه‌ولێر ساز كرد شماره‌یگ له‌ شاره‌زایه‌یل جه‌هانى و خاوه‌ن كومپانیایه‌یل گه‌شتیارى سه‌رمایه‌گوزارى له‌تى به‌شدارى كردن، ك ئامانج له‌و كۆنگره‌ داناین نه‌خشه‌یگ ستراتیجى بوى ئه‌را په‌ره‌ وه‌پیداین كه‌رت گه‌شتیارى.

ئنجا له‌وه‌ر خاتر ئى مه‌سه‌له‌ بایه‌سه‌ كار له‌بان كیشانن سه‌رمایه‌گوزاره‌یل بكریه‌ى ئه‌را سه‌رمایه‌گوزارى له‌ دروسكردن میوانخانه‌یل تازه‌و چشته‌یل تر گه‌شتیارى له‌و شوونه‌یله‌ ك سه‌رچه‌وه‌ى ئاو دیرن و سه‌وزاییه‌ تا بكریه‌نه‌ شوون گه‌شتیارى.

هه‌رێم كوردستان سروشت جوانیگ دیرێد و پڕه‌ له‌شوونه‌وار و هه‌وارگه‌ى جوان، شار هه‌ولێریش ك پایته‌خت هه‌رێم كوردستانه‌، دویه‌مین شوون گه‌شتیارى جه‌هانیه‌ جویر ئه‌وه‌ك ماپه‌ڕیگ تایبه‌ت ئشاره‌ت وه‌پى كردگه‌، چوینكه‌ سه‌قامگیرى خاسیگ له‌تى دوینریاو سه‌رمایه‌داره‌یل بیگانه‌ كیشا وه‌ره‌و لاى خوه‌ى.

بیجگه‌ ئه‌وه‌یش پایته‌خت هه‌رێم كوردستان هه‌وارگه‌یل فره‌یگ گریگه‌ خوه‌ى، ك وه‌ جووریگ له‌گشت پاریزگایه‌یل تر عراقه‌و روى له‌لى كه‌ن و ته‌نانه‌ت له‌ده‌وڵه‌ته‌یل هاوسایش و شوونه‌یل تر جه‌هانیش وه‌ك هه‌وارگه‌ى گه‌لى عه‌لى بێگ و جندیان و بێخاڵ و شه‌قڵاوه‌و سه‌ڵاحه‌دین و شوونه‌یل تر.

 

محه‌مه‌د عه‌لى سه‌ماوى