کەیس جینۆساید کانی عاشقان

شفق نيوز

ئامانج پیلانەگەيش گووشەگیرکردن ئی شار تێکۆشەرە بوی، لە ناوچەيل هەستیار وە تایبەتی لەو ئاواييه‌يله‌ ک کەفنە ناوبه‌ێن هەڵەبجەو ئيرانەو. لەو چوارچێوەیشه‌ (٥٢) پەنجاو دو ئاوايی شارەزوور كووچ وه‌پێيان كريا. وه‌وخاتريشه‌ جوور ناڕەزايی نيشانداينێگ دژ وە سەپانن ڕێوڕەسم سەربازی و پۆلیسی له‌بان شار هەڵەبجە و دەورووەرێ بڕێگ لە جوانه‌يل و خوه‌ندكاره‌يل شارەگە خوه‌ێنیشانداينێگ ئاشتیانە ئەنجامدان ک دوياتر وە ڕاپەرینەگەێ (١٣/٥/١٩٨٧) هەڵەبجە ناسريا، جادەگان گردنە وەر و هاوار كردیان: (نه‌ ئه‌ڕا كووچوه‌پێكردن، نه‌ ئه‌ڕا بەعسی کردن و نه‌ ئه‌ڕا وەعەرەبکردن).

جوواو هێزە سەرکوتکەرەگان وە ئاگر بوی، لەو ڕووژە جوانێگ وە ناو (مەریوان حەمەڕەشید) شەهید بوی، وه‌لێ کوڵنەدەره‌يل تەرمەگەێ بەرزه‌وکردن و وە ناو شارەگەيا گڕ خوارديان. لە ئاست تەشەنەسەنن بارودۆخەگە، ڕژيم کەفتە خوه‌ێ و ئامادە باشی نيشاندا ئه‌ڕا داپڵووسانن ڕاپەڕینەگە و پەنا برد ئه‌ڕا هێز ئاسمانی و هێز پیادەو كۆماندۆ.

هەيشت ته‌ێارەێ هێلیکۆپتەر وە بۆمب و ڕەشاش شارەگە بۆمواران کردن. ڕەشاش ته‌ياره‌گان ڕویکرديانە مه‌ردم بێتاوان ناوچه‌يل: (کانی عاشقان، مۆردانە، شێخ سمایل، پیر محەمەد) ك بويە مايه‌ێ تەقاننەوەێ (٢٥٠) دو سەدو پەنجا ماڵ له‌ ناوچه‌يل کانی عاشقان و مۆردانە و شەهیدکردن (٦٠) شەس کەس و زه‌خمدارکردن دەیان كه‌س تر، دوياتريش زه‌خمداره‌گان لە نەخوه‌شخانە دەركردن و زینگوەچاڵیان کردن.هاووه‌خت وه‌ل ڕاپەڕین (١٣/٥) هەڵەبجە، ڕەواندوز و شەقڵاوەيش ئه‌ڕا پشتیوانی هەڵەبجە ڕاپەڕین، وه‌لێ ڕاپەرینەگەێ ئەوره‌ زوی خامووش کريا.

کەیس کانی عاشقان یەکێگ بوی لە کەیسەیل جینۆساید هەڵەبجەو کوردستان لە دادگاێ باڵاێ تاوانه‌يل عێراقی وه‌لێ تا ئيسه‌ ئەو کەیسە یەکلايی نەکرياسەو و وە جینۆساید نەناسرياس. لە وه‌ختێگ وە گوره‌ێ ماددەی (٢) ی ڕێککەفتننامەێ نەتەوەيل یەکگرتگ ئه‌ڕا قەيەغەکردن جینۆساید و سزا خستنە بان تاوانکاره‌يلێ، ک عێراق له‌تێ ئەندامە.

هەميش وەگوره‌ێ ماددەی (١١) ی دادگاێ باڵاێ تاوانه‌يل عێراق چوودە چوارچێوەێ تاوان جینۆساید و گشت مەرج و پێوەرە یاساییەگان ک هه‌وه‌جه‌ وه‌پێيان هه‌س ئه‌ڕا ناسانن کەیسێگ تاوانکاری وە جینۆساید هاتێ. ئەرک نوێنەره‌یل کوردە لە حکومەت و پەرلەمان عێراقیدا پشت وەو ڕووشنايی یاساییە کار دڵسووزانە بکەن ئه‌ڕا وەجینۆساید ناسانن ئەو کەیسە و قەرەبووکرنەوەێ ماددی و مەعنەوی کەسوکار جینۆساید کرياگه‌يل.

ئاواره‌ حسێن

ا. ج