جه‌هان له‌وه‌رده‌م هه‌ڕه‌شه‌ی چه‌كه‌يل نه‌وه‌وی

شفق نيوز

وه‌جه‌نگ دريژماوه‌ وه‌شيوه‌يگ كاره‌ساتبار و فراوانتر له‌بان مه‌ردم بته‌قيه‌يگه‌وه‌ . پرووژه‌ی وه‌ده‌سهاوردن ئی ته‌كنۆلۆجيا جوير ئه‌وه‌ك باس كرياگه‌ ئه‌را خزمه‌تكردن ئنسانی هوير دروسكردن و ئبداع له‌لی كرياگه‌ ئه‌را ئه‌وه‌ك بتويه‌نريه‌يگ له‌ئاينده‌ شوون وزه‌ يا تاقه‌يل تر بگريگه‌وه‌ ، وه‌ك نه‌فت له‌مه‌يدان سووزه‌مه‌نی و پيشه‌سازی و ،  ئاوئه‌را دابينكردن كاره‌با ‌  .

نه‌فوه‌رگرتن له‌ وزه‌و شه‌وق خوه‌ر ئه‌و فكره‌ی وه‌رفراوانه‌ نه‌وی ك بووگه‌ هووكار ئاشكراكردن ده‌سپيچگ يا مه‌هانه‌ له‌ په‌ره‌وه‌پيداين چه‌ك نه‌وه‌وی و دوياخر تاقيه‌وكردنی له‌بان ئاده‌ميزاد . شكه‌ستخواردن كه‌رت يا قه‌تاع پيشه‌سازی و قه‌يران ئابووری و بيكاری ساڵه‌يل وه‌رجه‌ جه‌نگ جه‌هانی دويم مه‌يل ده‌وڵه‌ته‌يل سه‌ركه‌فتگ جه‌نگ زياتر كرد و بيجگه‌ كووتاييهاتن جه‌نگ دويم جه‌هانی و ده‌ركه‌فتن شوونه‌وار و خراوی ده‌روينی و كاولكاری و ماڵويرانی و زه‌ره‌د گيانی ، وه‌لی هوير داگيركردن تازه‌يگ له‌ته‌كنۆلۆجيا بازاڕ كيشمه‌كيش هاورده‌ بان له‌يه‌ك ترازيان دو به‌ره‌ يا جه‌بهه‌ی هاوپه‌يمان و سه‌ره‌تای ده‌سوه‌پيكردن جه‌نگ تازه‌يگ له‌ناونی وڵاته‌يل يه‌كگرتگ ئه‌مريكاو رووسيا ، ريككه‌فتننامه‌ی په‌خشه‌وبوين چه‌كه‌يل ناته‌قليدی وه‌ ئه‌وه‌يش نه‌وسيا ك له‌وه‌زعيگ شارياگ مه‌ترسی بمينيگه‌وه‌ ، وه‌ل ئه‌وه‌يشا كه‌م له‌ ده‌وڵه‌ته‌يل و ملله‌ته‌يل جه‌هان زانستيان ك ئاست كاريگه‌ری و تێكداين قومبه‌ڵه‌يگ هايدرۆجينی ره‌سيگه‌ چه‌نيگ ؟ گشت ئه‌و راسيه‌يله‌ له‌ی باوه‌ته‌وه‌ تا ئيسه‌ زوورميان هه‌ر وه‌ په‌رده‌پووش مه‌ندنه‌و ريككه‌فتننامه‌ی ناوده‌وڵه‌تی له‌ ريگه‌گرتن ئه‌را زيای نه‌كردن و په‌خشه‌ونه‌وين ئی چه‌ك كاولكه‌ره‌ هيمان له‌كار ژير وه‌ژير خوه‌ی نه‌كه‌فتگه‌ و ، وه‌هه‌مان شيواز به‌رنامه‌ی وه‌ده‌سهاوردن ته‌كنۆلۆجيای نه‌وه‌وی له‌مه‌يدان سه‌ربازی بازرگانی يا توجاره‌تيگ بی ئه‌نازه‌و چه‌وه‌ڕينه‌كرياگ وه‌خوه‌يه‌وه‌ دی . جه‌نگ سه‌رد ناونی ئی دو جه‌مسه‌ر يا قوتبه‌ داوه‌زيه‌ بان شيوه‌ی ئايدۆلۆژی و وه‌ كۆمۆنيزمكردن و هه‌واداره‌يل دونيای سه‌رمايه‌داری و ، وه‌مادده‌كردن چشته‌يل مه‌عنه‌وی و له‌ هه‌ردوگ لايشه‌وه‌ گرفت وه‌ديكردن شه‌رعيه‌ت كيشه‌يگ نه‌وی ئه‌را گامه‌يل هه‌ردوگلا . لايه‌نگره‌يل هوير ديموكراسيه‌ت ليبراليزم سه‌رمايه‌داری هه‌وڵ ئه‌وه‌ ديان ده‌س بگرنه‌ بان سستم ئابووری گشتی و له‌و ريگه‌وه‌ ده‌وڵه‌ته‌يل ناچار بڕياره‌يل و پابه‌ندبوينيان بكه‌ن له‌ڕيگه‌ی وه‌هويرخستن مه‌ترسی ورسگی و له‌ناوبردن ژيرخان ئابووری خوه‌يان . ده‌وڵه‌ته‌يل چه‌پ سۆشيالزميش وه‌قوناغ ته‌ئميمكردن پايه‌يل ئابووری شيه‌وكردن خوه‌يان كردن و ده‌سكاری كه‌رت يا قه‌تاع تايبه‌ت كردن و ئه‌و وه‌ربه‌س و گرفته‌يله‌ نه‌يشتن له‌وه‌رده‌م به‌رنامه‌و نه‌خشه‌يليان .