كورد فه‌یلى

شفق نيوز

 

ئه‌وه‌ك گرینگ و ناژنه‌فیمنه‌ى، چاره‌نویس سه‌ده‌ها هه‌زار كورده‌ ك له‌ناوچه‌یل كوردستانى ده‌یشت هه‌رێم كوردستان ژیه‌ن یا له‌ناوچه‌یل عه‌ره‌بى ناوڕاس و خوارگ عراق ك فیشتر كورده‌یل فه‌یلى له‌ورا ژیه‌ن.

له‌یرا پرسیاریگ هه‌س ك ئایا له‌ڕاسى ده‌وڵه‌ت كوردى ئاینده‌ ته‌نیا ئه‌را ئه‌و كورده‌یله‌ بوود ك له‌مه‌رز ئیسه‌ى هه‌رێم كوردستان ژیه‌ن؟ئه‌ى ئه‌و كورده‌یله‌ ك له‌ساى مه‌ینه‌تى و نائارامى ماددى و ئاسایش ژیه‌ن چه‌؟

كورده‌یل فه‌یلى هه‌میشه‌ قه‌ڵغان كورد عراق بوینه‌، ك له‌وه‌ختیگ هویر له‌ ئه‌ده‌بیات ته‌عریب كریا له‌ كوردستان عراق، كورده‌یل فه‌یلى له‌جیاى ئه‌و هه‌مگه‌ كورده‌ ئه‌و پرووسه‌ى نائنسانیه‌ له‌بانیان تاقیه‌و كریا ك تائیسه‌یش ئه‌وان له‌ژیر چه‌پووك ته‌عریب و كوشتن و سزا قورتار نه‌وینه‌!

ئنجا ئه‌وه‌ك ئیسه‌ هه‌ڵویستیگ نیشتمانى و تاریخیه‌، ئه‌ویش هویره‌وكردنیگ جددیه‌ له‌ ژیان كورده‌یل فه‌یلى، ك بایه‌سه‌ حكوومه‌ت هه‌رێم هه‌وڵ جیوازكردن قوناغ وه‌ قوناغ ئه‌ڕایان بیه‌ید ئه‌را ژیر مه‌رز ده‌سڵات حكوومه‌ت هه‌رێم كوردستان و بایه‌سه‌ له‌ یه‌كیگ له‌ ناوچه‌یل كوردستانى ده‌یشت هه‌رێمیش بوود شار تازه‌یگ ئه‌ڕایان دروس بكاو كه‌مه‌ كه‌مه‌ جیوازیان بكاو تیكه‌ڵیان وه‌ ژیان مه‌ردم ئیسه‌ى هه‌رێم كوردستان بكا، تا وه‌لایه‌ن كه‌مه‌و ئه‌و هه‌مگه‌ هاوكاریه‌ ك پیشكه‌ش وه‌ عه‌ره‌به‌یل كریاگه‌ له‌ كوردستان، نیمه‌ى ئه‌وه‌ ئه‌ڕایان بكریه‌ید.

ئیمه‌ گشتمان زانیم له‌ ئیسه‌و ئاینده‌یش فریه‌ سته‌مه‌ ئه‌قڵیه‌ت عه‌ره‌بیانه‌ى سه‌ران حكوومه‌ت عراقى رازى بوون وه‌ دروسبوین ده‌وڵه‌ت كوردى، ئنجا ئه‌گه‌ریش هه‌رچه‌نى وه‌ قسه‌یش رازى بوون وه‌خاتر هه‌ر به‌رژه‌وه‌ندییگ ، ئه‌وه‌ بیگومان ئه‌گه‌ریگ چه‌وه‌ڕیكریاگیش ئه‌وه‌سه‌ ك عراقیه‌یل شۆفێنى له‌ ئاكام ئه‌و كاره‌ ده‌س بكه‌نه‌ له‌ناوبردن كورده‌یل فه‌یلى، بیجگه‌ ئه‌وه‌یش ئه‌گه‌ر ئیمه‌ هس وه‌ وه‌رپرسیارێتى نه‌ته‌وه‌ییمانیش بكه‌یم هه‌ر بایه‌سه‌ وه‌ لایه‌ن كه‌مه‌و ته‌ماشایگ ژیان ئیسه‌ى كورده‌یل فه‌یلى بكه‌یم، چوینكه‌ پرووسه‌ى ئه‌نفال وه‌ شیوه‌یگ تر له‌بان ئه‌وان هه‌ر وه‌رده‌وامه‌.

هه‌ر وه‌و خاتریشه‌ بایه‌سه‌ هه‌ر یه‌كیگ له‌ئیمه‌ له‌شوون خوه‌مانه‌و له‌بان ئى مه‌سه‌له‌ بجویلیه‌یم و ژیان كورده‌یل فه‌یلى پشتگووش نه‌خریه‌یدو هه‌وڵ جددى بدریه‌ید ئه‌وان له‌و مه‌ینه‌تى و ژیان نائارامیه‌ قورتار بكریه‌ن.

هێمن حسێن

ج . أ