هه‌ڵه‌بجه په‌نج ‌ رووژ وه‌رجه‌ نه‌ورووز

شفق نيوز

هه‌ڵه‌بجه‌ شاره‌ كورده‌واریه‌گه‌ى باكوور خوه‌رهه‌ڵات عراق و باشوور خوه‌رهه‌ڵات شار سلێمانى، ده‌ردى ها بان گشت ده‌رده‌یله‌و، شنرۆى و زه‌نجیره‌ كویه‌ى باڵامبۆ گرفتار گڕه‌ى ئاگر حه‌سره‌تن ده‌ریاچه‌ى سیروان وه‌ لایه‌لایه‌ مناڵه‌ كورپه‌گان لاونید، هه‌ڵوبه‌گ سه‌رله‌نوو سیه‌ماڵ به‌دبه‌ختى هه‌ڵداگه‌و ئازیه‌تباره‌ ئه‌را كانى شێخ و كانى ئاشقه‌یل و كانیه‌ كووره‌، گشت په‌نج رووژ وه‌رجه‌ نه‌وروز "گوڵان و باوه‌كۆچه‌ك و عه‌بابه‌یلى و پیه‌ڵ زه‌ڵم" وه‌رگ خه‌م پووشن و " به‌ڵخه‌و ته‌ویڵه‌و خورماڵ و ناوچه‌یل تر كورده‌وارى چنه‌ پرسه‌و سه‌ره‌خوه‌شى هه‌ڵه‌بجه‌ى لانه‌ى كوردایه‌تى.

جاران هه‌ڵه‌بجه‌ وه‌ تفه‌نگ و بڕنه‌و ته‌یاره‌شكن نوا له‌ داگیركه‌ر گردیان و شكه‌ست وه‌ هیز دوشمن هاوردیان، وه‌لى ئیجاره‌ ته‌یاره‌یل جه‌نگى رژیم گوڕ وه‌گووڕ له‌ناكاو ژه‌هر كوشنده‌ى كیمیاوى تیكه‌ڵ وه‌ بوو"سیف" رشانه‌ بان شاره‌گه‌ له‌ 16/3/ 1988 و ئه‌و چه‌ك قه‌یه‌غه‌كریاگه‌ ئه‌را كوشتن زیاتر له‌ په‌نج هه‌زار كه‌س هاورده‌كار و نزیكه‌ى 20 هه‌زاریش له‌ ئاكام ئه‌و كیمیاوارانه‌ تویش نه‌خوه‌شیه‌یل جوراوجوور هاتنه‌و فره‌یگ له‌لیان نابیناو ئفلیجه‌، ك رژیم به‌عس وه‌و كاره‌ساته‌ گه‌وراترین تراژیدیاى له‌ناوبردن و مه‌رگه‌سات تومار كرد ده‌رهه‌ق مه‌ردم شار هه‌ڵه‌بجه‌، وه‌و جووریشه‌ ره‌شبه‌ڵه‌ك و سازده‌هوڵ وه‌هار و نه‌ورووز له‌لیان كرده‌ به‌زم چه‌مه‌رى و كوته‌ڵكوو.

وه‌لى ئه‌وه‌سه‌ كاره‌سات هه‌ڵه‌بجه‌ بویه‌ ناسنامه‌ى ملله‌ت كوردو گشت دونیا وه‌ دید ریز و حورمه‌ته‌و نوڕنه‌ ئه‌و رویداگه‌و ریكخریاگه‌یل جه‌هانى و كلكریاگ ده‌وڵه‌ته‌یل دونیا گوڵ سه‌ربه‌رزى نه‌نه‌ بان مه‌زار شه‌هیده‌یل هه‌ڵه‌بجه‌.

ئیمه‌ى كورد هویچ وه‌ختیگ ئه‌و كاره‌سات پڕ ژان هه‌ڵه‌بجه‌و كاره‌ساته‌یل تر ئه‌نفال و بى سه‌روشوونكردن روڵه‌یل فه‌یلى ك كه‌فتنه‌ وه‌ر په‌لامار به‌عس دڕنده‌ له‌هویره‌و نیه‌وه‌یم و هه‌میشه‌ خوه‌مان وه‌ قه‌رزار ئه‌و شه‌هیدو قوربانیه‌یله‌ زانیم ك گیان پاكیان كردنه‌ قوربانى كورد و كوردستان.

جه‌ماڵ ئه‌ركه‌وازى