نه‌ورووز وه‌رگری

شفق نيوز

هه‌رچه‌نی له‌لای نه‌ته‌وه‌يل تريش نه‌ورووز پيرووزی ديريد و ماناداره‌، وه‌لی هويچكام له‌و نه‌ته‌وه‌يله‌ ئه‌وه‌نه‌ی كورد نه‌تويه‌نستگه‌ نه‌ورووز روی وه‌ڕوی وه‌رگری و خه‌بات و جه‌نگ زوڵم و زوور بكه‌ن.

وه‌ دريژايی مێژوو هه‌ميشه‌ نه‌ورووز نيشانه‌ی مه‌ندنه‌وه‌ی نه‌ته‌وه‌ی كورد بويه‌، له‌ گوزه‌يشتيش له‌وه‌ر خاتر ده‌مداين ئاگر نه‌ورووز كه‌سه‌يليگ هه‌ميشه‌ ئاماده‌ی گيانبه‌خشان بوينه‌و چالاكی سياسی له‌و رووژه‌ كردنه‌وه‌ی ئاگر نه‌ورووز بويه، ئی چالاكيه‌ له‌و وه‌خته‌يله‌ وه‌ته‌نيا ئاگركردنه‌وه‌يگ ئاسايی نه‌ويه‌، به‌ڵكوو كاردانه‌وه‌يگ بويه‌ وه‌رانوه‌ر زوڵم وسته‌م داگيركاره‌يل.

له‌و وه‌خته‌يله‌ ك ئاگر نه‌ورووز دژ زوڵم بويه‌و نيشانه‌ی وه‌رده‌وامی و مه‌ندنه‌وه‌ بويه‌، هه‌ر له‌وه‌ر ئه‌وه‌يش بويه‌ ك رژيم ئه‌وه‌نه‌ له‌ دژ چالاكی بويه‌ له‌و رووژه‌، چوينكه‌ رژيم به‌عس له‌وه‌ ره‌سيه‌سه‌و ك نه‌ورووز چ ماناو نيشانه‌يگ ديريد و هه‌ر وه‌و خاتريشه‌ گشت توانايگی خسته‌سه‌ خزمه‌ت كوشاننه‌وه‌ی ئاگر نه‌ورووز و نواگرتن له‌ كڵپه‌ی ئه‌و ئاگره‌ ك له‌بان جه‌وه‌ڵه‌يل ده‌مدريا، وه‌لی بيئاگايش بوی له‌وه‌ك له‌ناخ گشت كورديگ گڵپه‌ی ئاگريگ گه‌ورا بڵيزه‌ داشتياد.

ئمساڵ نه‌ورووز له‌وه‌ختيگه‌ ك پێشمه‌رگه‌ی كوردستان ها وه‌رده‌م جه‌نگيگ قورس ترۆر و تا ئی سه‌عاتيشه‌ چه‌نه‌ها رووڵه‌ی ئی وڵاته‌ گيان خوه‌ی به‌خت كردگه‌، ئمجا ئه‌گه‌ر نه‌ورووز وه‌گووره‌ی قوناغه‌يل مه‌زه‌نه‌ بكريه‌يد و له‌وه‌رجه‌ راپه‌ڕين ناوی بنريه‌يد نه‌ورووز خه‌بات و روی وه‌ڕوی بوينه‌وه‌ی زوڵم و سته‌م و دوياخريش وه‌ نه‌ورووز راپه‌ڕين و ئازادی بناسريه‌يد، ئه‌وه‌ نه‌ورووز ئمساڵ بايه‌سه‌ جوور نه‌ورووز وه‌رگری بدريه‌يده‌ قه‌ڵه‌م، يه‌يش له‌وه‌ختيگه‌ ك گامه‌يل وه‌ره‌و سه‌روه‌خوه‌يی نريه‌ن و ئامانج گه‌ورايش ره‌سينه‌ وه‌ نه‌ورووز سه‌روه‌خوه‌يی.

ئه‌وه‌ك ئيسه‌ پێشمه‌رگه‌ی كوردستان ئه‌كاده‌ی، وه‌رگريكردنه‌ له‌ گه‌ورايی نه‌ته‌وه‌يگ ك گرووپيگ تيه‌ريك مه‌زه‌و ئه‌خوازن ئاسايش و ئه‌منيه‌ت بشيونيد و دوياخريش خاكه‌ پيرووزه‌گه‌ی وه‌ خوين رووڵه‌يلی ئاو بيه‌يد.

ئيسه‌ پێشمه‌رگه‌ نيشانه‌ی نه‌ته‌وه‌يگ بی ده‌وڵه‌ته‌ ك زوڵم و سته‌م قه‌بوول ناكا، ئازايه‌تيه‌يل پيشمه‌رگه‌ ئه‌وه‌نه‌ گه‌وران له‌گشتلايگه‌و مايه‌ی ستايشه‌، ئمجا وه‌گشتی ئه‌وه‌ ده‌ركه‌فيد ك گشت هه‌وڵه‌يل پێشمه‌رگه‌ جوور ئه‌وه‌ك له‌ مێژوو گوزه‌يشت وه‌ خوين وه‌رگری كرد، ئی نه‌ورووزيشه‌ وه‌ خوين نه‌خشنيد و كرده‌سه‌ی نه‌ورووز وه‌رگری و ناوسيه‌يديش تا ره‌سين وه‌ نه‌ورووز سه‌روه‌خوه‌يی.

هونه‌ر ره‌سول ئه‌حمه‌د

ج . أ