ئه‌نفال گه‌شتیگ هه‌تاهه‌تایى

شفق نيوز

ئیمه‌ ئه‌وه‌نه‌ خه‌مه‌یلمان گه‌وران و ئه‌سره‌یلمان پڕن، هه‌ر له‌وه‌ر ئه‌وه‌یش زه‌رده‌ خه‌نگه‌یلمان كه‌م و حه‌نستنمان وه‌ختیه‌! ئیمه‌ هه‌میشه‌ قاپى زه‌خمه‌یلمان گه‌وراسه‌و چه‌نیگ قاپیه‌یلمان داخرویاوید له‌ڕوى خه‌م، نیم ئه‌وه‌نه‌ ده‌روه‌چه‌یلمان واز نه‌ویه‌ ئه‌را خوه‌ر!

 

هه‌ر له‌وه‌ر ئه‌وه‌یش 25ساڵ وه‌رجه‌ ئیسه‌ له‌ وه‌هار ساڵ 1988، رژیم به‌عس گه‌وراترین په‌لامار ئه‌نجام دا ئه‌را بان ئاوایه‌یل كوردستان و له‌ماوه‌ى كه‌متر له‌ مانگیگ وه‌ هه‌زاران ئاوایى ویران كردو 182 هه‌زار ئاده‌میزاد بیتاوانیش له‌ ژن و مناڵ و جایه‌ڵ و پیر هه‌واڵه‌ى بیاوانه‌یل خوارگ عراق كرد، ك وه‌هویچ عورف و نه‌ریتیگ ناوده‌وڵه‌تى و وه‌بى له‌وه‌رچه‌وگرتن هویچ یاسایگ دینى و ئنسانى گشت ئه‌و رووحه‌یل پاكه‌ خسته‌ ژیر لمه‌یل داخكریاگ بیاوانه‌.

 

رژیم به‌عس وه‌ك دڕه‌نده‌ترین رژیم فاشى له‌ خوه‌رهه‌ڵات ناوین، تاریخیگ له‌ كوشتن و بڕین مه‌ردم كورد دیرید، تاریخیگ تا رووژ ئمڕوویش ك ئازادى باڵاده‌سه‌ وه‌لى هیمان شوونه‌واره‌یل خراوى وه‌ئاسانى لانیه‌چوود، چوینكه‌ ئه‌و رژیمه‌ هه‌ر له‌سه‌ره‌تاى ده‌سڵاتیه‌و له‌ ته‌ممووز سیه‌ى 1968 دریغى نه‌كردگه‌ له‌ كوشتن و زوڵم و سته‌م و رووژ وه‌ڕووژ تا پله‌ى ده‌سڵاتى بته‌وتر بویاد هه‌ر ئه‌و زوڵمیشه‌ وه‌لیا فیشتر و سیه‌تر بویاد.

 

دیاره‌ ئى كار دوزه‌خیانه‌ هه‌ر له‌ سه‌رتاوه‌ وه‌گووره‌ى پلان بویه‌و به‌رنامه‌ ئه‌راى دانریاگه‌، هه‌ر له‌وه‌ر ئه‌وه‌یش ئه‌گه‌ر به‌عس له‌ ساڵه‌یل هه‌فتاو له‌ سه‌رده‌م تازه‌ى ده‌سڵاتى وه‌ پیاده‌كردن سیاسه‌ت ته‌عریب و ته‌رحیل و ته‌هجیر روى وه‌ڕوى ملله‌ته‌گه‌مان بویده‌وه‌و هه‌وڵ ئه‌وه‌ داوید له‌و سیاسیه‌ت داگیركاریه‌ هیز و ئیراده‌ى كورد داگیر بكا، ئه‌وه‌ له‌ كووتایى ساڵه‌یل هه‌یشتاى سه‌ده‌ى وه‌رین و له‌ڕى پاكسازى ره‌گه‌زى و كیمیاوارانكردن مه‌ردم و ئه‌نفالكردن خه‌ڵك مه‌ده‌نیه‌و ره‌سیه‌ نك ده‌سڵات فاشیزم خوه‌ى، هه‌ر وه‌و خاتریشه‌ ئه‌نفال یه‌كیگه‌ له‌ كاره‌ساته‌یل تراژیدیاو فره‌ خویناوى ملله‌ته‌گه‌مان و تا ته‌نیا كه‌سیگ ئى ملله‌ته‌ بمینید ئه‌و خوینه‌ هه‌ر له‌ جه‌سه‌ى زه‌خمینى ڕى ئه‌كاو له‌وژدان ملله‌ت كورد هه‌ر وه‌ زینگى مینیده‌و.

 

ئه‌نفال ملله‌ت كورد دریژه‌وكریاگ كاره‌سات ئه‌رمه‌نیه‌یل سه‌ره‌تاى سه‌ده‌ى وه‌رین و هۆڵۆكۆست یه‌هوودیه‌یل جه‌نگ جه‌هانى دویه‌مه‌، ك له‌سه‌ره‌تاو ناوڕاس و كووتایى سه‌ده‌ى گوزه‌یشت له‌خوه‌رهه‌ڵات ناوین و له‌ ئۆرپا رویدان. ئنجا جى داخه‌ ك ئاشناكردن ئى كاره‌ساته‌ وه‌ ملله‌ته‌یل دونیاو گرده‌وكردن دۆكیۆمێنت له‌بانى و هه‌ۆداین ئه‌را مامڵه‌كردن وه‌لیا جوور تراژیدیایگ ناوده‌وڵه‌تى، هیمان ها سه‌ره‌تاى بویچگیگ و نه‌ڕه‌سیه‌سه‌ راده‌ى خواست، چوینكه‌ ئه‌نفال هه‌ر وه‌ته‌نیا پیك نه‌هاتگه‌ له‌ كوشتن 182 هه‌زار رووح یا خنكانن 182 هه‌زار هه‌ناسه‌! ئه‌نفال كاره‌ساتیگه‌ ك به‌دبه‌ختیه‌گه‌ى په‌یوه‌س نیه‌ ته‌نیا وه‌ فره‌یى و كه‌مى قوربانیه‌یل یا وه‌ سزانن روى وه‌ر گه‌ورایگ له‌ خاك، ئه‌نفال پرووسه‌یگه‌ په‌یوه‌ندى وه‌ كوشاننه‌وه‌ى ناسنامه‌ى ملله‌تیگه‌و دیرید و په‌یوه‌ندى وه‌ وسیان تاریخیگه‌و دیریدو ئه‌نفال پرووسه‌یگ بوى ئه‌گه‌ر بڕیگ ئاڵشتكارى ناوده‌وڵه‌تى نه‌ویاتاد ك ئاكامه‌گه‌ى وه‌ قانجاز ملله‌ته‌گه‌مان شكیاوه‌، ئه‌وه‌ دویر نه‌وى مه‌رز ناوچه‌یگ دیاریكریاگ بپه‌زنید و گشت شارو شاروچكه‌یل كوردستان بگریده‌و، ناناى ئه‌وه‌سه‌ ئه‌گه‌ر ئه‌نفال له‌سه‌ره‌تاى ساڵ 1988 چه‌ن شوونیگ له‌ جه‌سه‌ى كورد كردویده‌ نیشانه‌ ئه‌را پیاده‌كردن سیاسه‌ت پاكسازى ره‌گه‌زى، ئه‌وه‌ دویر نه‌وى دویاخر گشت شوونه‌یل تر ئه‌و جه‌سه‌ بكاده‌ قوربانى.

 

ئازاد ته‌وفیق

ج . أ