"لیبیا" خه‌ریك فیدراڵیه‌و "عراق"یش هێمان خوینالیه‌

شفق نيوز

 

ئمڕوو جوور ئه‌وه‌ك ئاشكراس بڕیگ له‌ ده‌وڵه‌ته‌یل گه‌وراى جه‌هان ئى سستمه‌ له‌تیان سه‌قامگیره‌و له‌ساى فیدراڵیه‌ت ژیان به‌خته‌وه‌ریگ به‌نه‌ سه‌ر، وه‌ل ئه‌وه‌یشا له‌ناوچه‌ى خوه‌رهه‌ڵات ناوین وه‌تایبه‌ت له‌ وڵاتیگ جوور میرنشینیه‌یل یه‌كگرتگ عه‌ره‌بى سستم فیدراڵى له‌تى بویه‌سه‌ مایه‌ى خوه‌شگوزرانى هاووڵاتیه‌یلى، ك تا راده‌یگیش  شاره‌یلى له‌ڕوى  گه‌شه‌كردن و پیشكه‌فتنه‌و  جوور نموونه‌ ناو بریه‌ن.

 

وه‌ى تازه‌یشه‌ وه‌ گووره‌ى هه‌واڵ رووژنامه‌ و میدیایه‌یل، ئاشكراى هه‌رێم تازه‌ى خوه‌رهه‌ڵات" لیبیا"یش كریا وه‌ناو "هه‌رێم بورقه‌"، وه‌ سه‌رۆكایه‌تى ئه‌حمه‌د زوبێر سه‌نووس سه‌رۆك ئه‌نجوومه‌ن شاره‌گه‌و خودموختارى خوه‌ى ئاشكرا كرد، یه‌یش له‌وه‌ختیگه‌ ك لیبیا دویاى عراقیش ئاڵشتكارى حوكم له‌تى رویداو  حوكم قه‌زافى له‌ وه‌هار عه‌ره‌بى له‌تى كووتایى وه‌پى هات، هه‌ر له‌وه‌ر ئه‌وه‌یش چه‌وه‌ڕى یه‌یش كریه‌ید له‌ ده‌ستوور تازه‌ى ئه‌و وڵاته‌ سستم فیدراڵى له‌ لیبیا جیگیر بكریه‌ید.

 

له‌یرا ئه‌گه‌ر بایمنه‌ بان باسكردن و به‌راورد له‌ناونى عراق و لیبیا بكه‌یم دوینیم لیبیا ك كه‌فیده‌ باكوور ئه‌فریقیا هه‌یشت ساڵ دویاى عراق ده‌سكرده‌ شووڕش و راپه‌ڕین ئه‌را رمانن رژیم قه‌زافى و دویاى ئه‌وه‌یش شماره‌ى مه‌ردم عراقیش په‌نج ئه‌وه‌نه‌ى مه‌ردم لیبیاس، چوینكه‌ وه‌گووره‌ى ئامار شماره‌یان شه‌ش ملیۆن و نیمه‌، وه‌لى شماره‌ى مه‌ردم عراق فیشتره‌ له‌ 30 ملیۆن، ئنجا ئایا كامیان شایسته‌تره‌ له‌ڕوى فره‌ییه‌و ئه‌را ده‌مه‌زرانن هه‌رێم سه‌روه‌خوه‌ى؟ ئه‌گریش به‌راورد بكه‌یم له‌ناونى بار سه‌قامگیرى هه‌ردوگ وڵات بگر عراق هیمان خوینالیه‌و گشت رووژگارى پڕه‌ له‌ كوشت و كوشتار ، وه‌ل ئه‌وه‌یشا زوورم مه‌ردم عراق كورد له‌لى بترازیه‌ید و شماره‌ى كه‌میگ له‌ مه‌ردم عه‌ره‌ب مه‌سه‌له‌ى فیدراڵى وه‌پیان ره‌وا نیه‌و جوور به‌شبه‌شه‌وبوین عراق زاننه‌ى، یه‌یش له‌وه‌ختیگ ك وڵاته‌یل فره‌یگ له‌ساى ئى سستمه‌ گشت كیشه‌و گرفته‌یلیان چاره‌سه‌ر بویه‌و تام ئاسووده‌یى و سه‌رفرازى كه‌ن.

 

جه‌ماڵ ئه‌ركه‌وازى