كزبوين ده‌وڵه‌ت

شفق نيوز

له‌شوون په‌يابوين ناڕه‌زايه‌يل مه‌ردم و نه‌مه‌ندن يا واين ده‌سڵاتداره‌يل چه‌ن وڵاتيگ، سه‌رده‌ميگ تازه‌ له‌ ناوچه‌گه‌ هاته‌ وجوود، زوورم وڵاته‌يل هيز ده‌سڵاتيان له‌فريه‌ رويه‌و كه‌مه‌و بويه‌ يا له‌ده‌سی دانه‌. له‌ سوريا ده‌وڵه‌ت فريه‌ كز بويه‌و خاك و ملله‌ت له‌ده‌سی نه‌مه‌ندگه‌، له‌ ليبيا ده‌وڵه‌ت ديار نيه‌، له‌ يه‌مه‌ن ده‌وڵه‌ت ته‌نيا هه‌ر ناوه‌، له‌ عراق خاك و ملله‌ت له‌ده‌سداگه‌و فريه‌ شپرزه‌، له‌ مسر و تونس و جه‌زاير و سودان و ئوردن و لوبنان ده‌سڵات كزه‌و بويه‌و گرووپ تر كاريگه‌ری ديريد له‌ وه‌ڕيه‌وبردن.

مانای ئه‌وه‌سه‌ وڵاته‌يل ناوچه‌گه‌ گشتيان له‌ ناوه‌و كزه‌و بوينه‌و دی وه‌ شيوه‌ی ئه‌وسا ناتويه‌نن دريژه‌ بيه‌نه‌ ده‌سڵات خوه‌يان. وڵاته‌يل كه‌نداو تا ئيسه‌ وه‌هه‌ر شيوه‌يگ بوی مقه‌يه‌تيكه‌ر خوه‌يان بوين له‌ كيشه‌، وه‌لی ئه‌وانيش ماوه‌يگه‌كه‌فتنه‌سه‌ ناو بازنه‌ی شه‌پۆله‌گه‌، ئه‌ويش وه‌ به‌شداريكردن له‌ جه‌نگ وه‌ل يه‌مه‌ن و نزيكه‌و بوينه‌ له‌ كه‌فتن وه‌ناو حه‌وز قه‌يرانه‌يل.

هه‌ر وه‌و خاتريشه‌ ده‌ ساڵ ئاينده‌ جه‌نگ كيشه‌ له‌ خوه‌رهه‌ڵات ناوين په‌ره‌ سينيد و هويچ ده‌وڵه‌تيگ وه‌ شيوه‌ی ئيسه‌ ناتويه‌نيد بمينيده‌وه‌و هووكار مه‌ندنه‌وه‌يشی كه‌مه‌و بويه‌، چوينكه‌ چه‌ن هووكاريگ هه‌ن و له‌وانه‌يش: گشت ئه‌و ده‌وڵه‌ته‌يله‌ كيشه‌ی ئازادی و ديموكراسی ديرن و زوورميان كيشه‌ی نه‌ته‌وه‌و ئايين و مه‌زه‌وی ديرن.

ده‌وڵه‌ته‌يل به‌ش فريه‌يگ له‌ليان له‌ڕوی سيستمه‌و ريك نه‌خريانه‌و چه‌سپياگ نين و مه‌ردم به‌شدار نيه‌ له‌ ده‌سڵات وڵات، له‌ڕوی شماره‌ی مه‌ردميشه‌و ئی ناوچه‌ فريه‌ زيای ئه‌كاو سه‌رچه‌وه‌ی داهات و گوزرانيش كه‌مه‌و ئه‌كا.

بيجگه‌ گشت ئه‌يانه‌يش نه‌وين شه‌فافيه‌ت و دادگه‌ری گشت ده‌سڵاته‌يل خسته‌سه‌ له‌رزه‌، هووكاره‌يل په‌يوه‌نديكردن و دروسكردن ناڕه‌زايی فريه‌ ئاسان و كاريگه‌ره‌، هه‌ر له‌وه‌ر ئه‌وه‌يش هويچ حزب و ناوه‌نديگ فكری و ئايينی و مه‌زه‌وی ناتويه‌نيد زوورم مه‌ردم كۆنترۆڵ بكا و وه‌يه‌ك ئاراسته‌ ته‌كان وه‌پيان بيه‌يد ئه‌را ئه‌وه‌ك له‌ خزمه‌ت ده‌وڵه‌ت بوون.

وه‌ل ئه‌وه‌يشا گشت ئه‌گه‌ره‌يل وه‌ ئاراسته‌ی نه‌مه‌ندن يا دوباره‌ داناين نه‌خشه‌ی سياسی و جوگرافی و ئابووری ناوچه‌گه‌ن، ئه‌را ئه‌وه‌ك گشت پيكهاته‌يل نه‌ته‌وه‌يی و ئايينی و مه‌زه‌وی دوير له‌ حوكم ئه‌واكه‌ی تر بژيه‌ن، نه‌ك له‌سايه‌ی ئه‌واكه‌ی تر جوور هاووڵاتی پله‌ دو بژيه‌يد.

شادمان مه‌لا حه‌سه‌ن

ج . أ