با گفتوگوو بكه‌یم له‌وه‌ر خاتر دویاڕووژ ڕووشنایگ

شفق نيوز

مه‌عناى چاره‌سه‌ر و میلكانه‌ ئه‌را جیاوازه‌یل و دژه‌یل له‌هویر و ڕا، ئه‌ویش له‌شوون ئه‌وه‌ك گشت هووكار یا وه‌سیله‌یل تون وتیژى و كوشتن و بوختكردن و تاوانباركردن و خیانه‌تكردن و ناوزڕاننیگ  تاقیه‌و كردن ك بیگومان زه‌خمدار و كز گشت لایگیان كرد وه‌بى جیاوازى.

له‌وڵات ئیمه‌ ك خاوه‌ن كویه‌نترین تاریخ و ژیار یا حزاره‌س له‌جه‌هان و مه‌ردمه‌گه‌ى زیاتر هسدارن له‌ناونى گشت مه‌ردمان تر، ئمجا هه‌ر له‌وه‌خت دامه‌زرانن ده‌وڵه‌ته‌ سیاسیه‌گه‌ى له‌سه‌ره‌تاى سه‌ده‌ى وه‌رینه‌وه‌، مه‌ردم عراق هووكاره‌ى زوان گفتوگوو یا قه‌بوولكردن وه‌رانوه‌ر نه‌وینه‌ ته‌نیا له‌ حاڵه‌ته‌یل كه‌میگ  نه‌وگ له‌تاریخى، به‌ڵكوو هه‌میشه‌ مه‌یدان كیشمه‌كیش تیه‌ڵ بویه‌ چ وه‌ئاشكرا جه‌نگ  له‌لى كه‌فته‌سه‌وه‌ وه‌ دریژایى تاریخ یا ژیر وه‌ژیر ك بویه‌سه‌ مایه‌ى جه‌نگه‌یل ناوخوه‌یى و چه‌ن ده‌یه‌یگ  دریژه‌ داشتگه‌و هه‌زاره‌ها قوربانى له‌ خاسترین ژن و پیاو پیكهاته‌یل ئى ملله‌ته‌ له‌لى كه‌فته‌وه‌ وه‌ سه‌به‌ب زوان تون و تیژى و زوڵم و قه‌بوولنه‌كردن یه‌كترى, وه‌ل ئه‌وه‌یشا رژیم ده‌سڵاتدار مه‌سه‌له‌ى ده‌س وه‌ده‌سكردن ده‌سڵات وه‌ڕیگه‌ى ئاشتیانه‌و سه‌ندووقه‌یل هه‌ڵوژانن ئاڵشت كرد ئه‌را ریگه‌ى ده‌بابه‌و زاڵ بویه‌ بان ماڵ كوومارى و له‌ هه‌مان وه‌خت سه‌ده‌ها كوشیاگ و زه‌خمدار له‌لى كه‌فته‌وه‌ بیجگه‌ ئه‌وه‌انه‌ك ده‌سگیر كریان وه‌ل ساڵه‌یل دویر و دریژیگ  له‌ به‌دبه‌ختى و ماڵویرانى، تا ئه‌وه‌ بوى وڵات بردنه‌ ناو پیسترین جه‌نگه‌یل كاولكارى و تواس وڵات و مه‌ردمه‌گه‌ى وه‌جاریگ  بكه‌یگه‌ خاك، ئه‌و كووماى خاكه‌ ك رژیم وه‌رین قه‌وڵیدا عراق له‌ جیاى زوان گفتوگوو وه‌ل كه‌سه‌یل وه‌رانوه‌را له‌حاڵه‌تیگ  ئه‌گه‌ر داواى ده‌سڵات له‌لى بكه‌ن و ئه‌وه‌ بوى ملیۆنه‌ها قوربانى ئه‌را ملله‌ت عراق له‌لى كه‌فته‌وه‌ هه‌ر له‌ زه‌خمدار و كوشیاگ بگر تا بیوه‌ژن و یه‌تیم و كووچ وه‌پیكریاگ و ئاواره‌. دى ئه‌وه‌ بوى وڵات داڕزیا وه‌ سه‌به‌ب پڕبوین گشت ده‌زگایه‌یل ده‌وڵه‌ت له‌ سه‌رباز و پۆلیس و هه‌وه‌جه‌یلیان، ك بیگومان گشت ئه‌یانه‌یش له‌بان هساو پیشكه‌فتن كوومه‌ڵگاو خزمه‌تگوزاریه‌یل بنه‌ڕه‌تى بوى.

ئه‌و كیشمه‌كیش تون وتیژه‌ له‌ناونى هیز زاڵم و خوینمژ گوزه‌یشته‌و ڕژیم تازه‌و بیجگه‌ ئه‌و كاره‌ساته‌یل دڵته‌زنه‌ ك ساڵه‌یل فره‌یگ  دریژه‌ داشت، وه‌ل ئه‌وه‌یشا گویڕانكارى گه‌ورایگ  بوى له‌گشت مه‌یدانه‌یل سیاسى و كوومه‌ڵایه‌تى و ئابوورى، ك هه‌رچه‌نى ملله‌ت تویش نه‌عره‌ته‌ى گه‌ورایگ  هات، وه‌لى گرینگترین ئه‌و كاره‌یلیشه‌ شیواز ده‌س وه‌ده‌سكردن ده‌سڵات و قه‌بوولكردن ئه‌نجام هه‌ڵوژاردنه‌یل بوى جویر ئه‌وه‌ك ملله‌ت توایگه‌ى دویر له‌ تون وتیژى و زوڵم و زووردارى و ڕه‌ته‌وكردن یه‌كترى.

ئیمه‌ له‌گشت حاڵه‌تیگ  بایه‌سه‌ قه‌بوول یه‌كترى بكه‌یم له‌بان بنه‌ماى دیموكراسى سه‌رده‌میانه‌و دویر له‌ زوان زاڵبوین و فشار و ته‌كڕه‌وى. هه‌ر له‌وه‌ر ئه‌وه‌یش ئویشیم با گفتوگوو بكه‌یم له‌وه‌ر خاتر ئه‌وه‌ك قورتار بویمن له‌و قوناغ سیه‌ له‌ تاریخ سیاسى و كوومه‌ڵایه‌تیمان و له‌ هه‌مان وه‌خت قه‌بوول یه‌كترى بكه‌یم له‌بان بنه‌ماى باوه‌ڕ هاوبه‌ش وه‌ عراق دیموكراسى.