ئبن به‌تووته‌و پاشاى میلاس

شفق نيوز

  بیگومان یه‌كیگ له‌ ده‌وڵه‌ته‌یل فه‌رامووشكریاگ كورده‌ ك مه‌گه‌ر وه‌ ریككه‌فت جارجاریگ بخریه‌یده‌ وه‌ر باس و له‌یه‌كه‌وداین، ئه‌ویش ده‌وڵه‌ت "مینه‌تشا"یى كورده‌ ك له‌ نزیكه‌ى ناونى ساڵه‌یل 1283زاینى دامه‌زریاگه‌ له‌بان ده‌س كوڕه‌یل مینه‌تشا ك پیك هاتوین له‌ سێ برا وه‌ناو شه‌مسه‌دین ك ناسریا وه‌"شه‌مۆ"و به‌هائه‌دین وه‌"به‌هدینى" و میننه‌تشاه وه‌"مه‌ند"، ك مه‌ند دامه‌زرنه‌ر فه‌رمانڕه‌وایى كیلس و ئه‌عزاز بوى.

مه‌لا جه‌میل رۆژبه‌یانى ئویشید: فه‌رمانڕه‌وایه‌یل كیلیس جه‌خت له‌وه‌ كه‌ن ك گوایا له‌ بنه‌چه‌كه‌و چنه‌و ئه‌را بان بنه‌ماڵه‌ى عه‌باس و ئه‌و عه‌باسیه‌یله‌ ك له‌بان ته‌خت خه‌لافه‌ت بوین و له‌كوردستان نه‌ژیانه‌، میر شه‌ره‌فخان بدلیسییش ئویشید: فه‌رمانڕه‌وایه‌یل كیلس وه‌ل بنه‌ماڵه‌ى فه‌رمانڕه‌وایه‌یل حه‌كارى ئامووزان.

شه‌مسه‌دین ، به‌هائه‌دین ، میننه‌تشاه یا (مه‌نته‌شاه) سێ برا بوین . شه‌مسه‌دین وه‌ (شه‌مۆ) و به‌هائه‌دین وه‌ (به‌هدینى) و میننه‌تشاه وه‌(مه‌ند) ناسریانه‌و ئى (مه‌ند)یشه‌ دامه‌زرنه‌ر فه‌رمانڕه‌وایى كیلس و ئه‌عزازه‌ " .

ده‌وڵه‌ت میننه‌تشاهى وه‌ گووره‌ى قسه‌یل" ئبن به‌تووته‌"و سه‌رچه‌وه‌یل تر تاریخى فیشتر له‌ 10 كه‌س له‌تى حوكمڕانى كردنه‌ جوور" حاجى به‌گ، مه‌سعود به‌گ، شوشاعه‌دین، ئبراهیم به‌گ، تاجه‌دین به‌گ، محه‌مه‌د به‌گ، مزه‌فه‌ردین ئلیاس به‌گ، له‌یس به‌گ، ئایدین به‌گ، ساروخان به‌ك و یاقوو به‌گ".

ئنجا شجاعه‌دین ئۆرخان به‌گ كوڕ مه‌سعوود مینه‌تشا پادشاى"میلاس"بویه‌و كوشك پادشایه‌گه‌ى له‌"به‌رچین"بویه‌ له‌ نزیك میلاس و پیاویگ زرنگ و زانا بویه‌و هه‌میشه‌ وه‌خته‌یلى وه‌ل مه‌لاو خوه‌نه‌واره‌یل برده‌سه‌ سه‌ر .

ئبن به‌تووته‌ ئویشید : له‌گه‌شتیگ وره‌و میلاس چه‌ومان پادشاى (میلاس)و ریز و حورمه‌ت فره‌یگ له‌لیمان گرت و له‌شوون ئه‌و هه‌مگه‌ ریز و حورمه‌تیشه‌، كراسیگیش وه‌ دیارى داپیم و ئویشید ئى فه‌رمانڕه‌وا هه‌میشه‌ خاوه‌ن كه‌ره‌م و میواندووس بوینه‌و فریه‌یش قه‌در له‌ غه‌ریب نانه‌.

ئبن به‌تووته‌ ئویشید: پاشاى میلاس ك شاریگ جوان فریه‌ ره‌نگین بوى خاسى فریه‌یگ وه‌لما كردو ئازووقه‌و خواردن فریه‌یگیش ئه‌ڕامان كلكرد و "ئه‌سپ"یگ وه‌دیارى داپیم ، ك ماڵ تایبه‌ت ئى پاشا له‌"به‌رچین" بوى له‌ نزیك میلاس وه‌دویرى 2 میل، به‌رچین شاریگ تازه‌ دروسكریاگ بوى له‌بان ته‌په‌یگ و باڵه‌خانه‌و مزگفت جوان داشت ك ئیمه‌ ئه‌را دیده‌ن پاشا چیمنه‌ ئى شاره‌و له‌ورا له‌خانه‌قاى "ئه‌خى عه‌لى" میوانى كریایم.

دى په‌یوه‌ندى و دیدار ناونى ئبن به‌تووته‌و ئى پاشاى مینه‌تشایى كورده‌ دیاره‌ وه‌ كه‌ره‌م كووتایى وه‌پى هاتگه‌و هه‌ر له‌وه‌ر ئه‌وه‌یش له‌بانى نویساگه‌و ناوى وه‌ خاسى بردگه‌ له‌ یاداشته‌یلى، وه‌لى جى داخه‌ تاریخ رووژ و ساڵ گه‌شته‌گه‌ى وه‌ ته‌واوى ئاشكرا نه‌كردگه‌و نه‌نویساگه‌ .

سه‌روه‌ر نیازى

ج . أ