خوه‌یكوشتن و كووتاییهاوردن وه‌ ژیان

شفق نيوز

  دیاره‌ مه‌سه‌له‌ى خوه‌یكوشتن ژنه‌یل هیمان له‌ ناو كومه‌ڵگا چاره‌سه‌ریگ بنه‌ڕه‌تى ئه‌راى نه‌كریاگه‌و تا ئیسه‌یش ئى حاڵه‌ته‌ وه‌رده‌وامه‌و رووژانه‌ ئیچنه‌ هه‌واڵه‌یلیگ بویه‌سه‌ مانشێت سه‌ره‌كى لاپه‌ڕه‌یل رووژنامه‌و میدیایه‌یل له‌ عراق وه‌ گشتى و هه‌رێم كوردستان وه‌تایبه‌ت.

حاڵه‌ته‌یل خوه‌یكوشى له‌ شاره‌یل جیاجیاى عراق دیاره‌ له‌وه‌ر فشاره‌یل كومه‌ڵایه‌تى و هووزایه‌تى روى وه‌ر فراوانیگ وه‌ خوه‌یه‌و دیه‌و زوورم ئه‌و حاڵه‌ته‌یلیشه‌ له‌ناو ژنه‌یل روى ئه‌یاد له‌ ئاكام فشاره‌یل خیزانى و داب و نه‌ریت سه‌خت هووزایه‌تى، ك یه‌یش له‌یوا ئه‌كا ئى دیارده‌ى مه‌ترسیداره‌ وه‌رده‌وام ئه‌نجام بگرید، یه‌یش بیجگه‌ حاڵه‌ته‌یل ئابوورى ك مه‌ردمانیگ هه‌ن باس گرفتارى خیزانه‌یلیگ كه‌ن وه‌ده‌س ئیچنه‌ حاڵه‌ت كه‌مده‌سى و نه‌داریه‌، ك یه‌یش كاریگه‌رى ناسه‌ بان ژیان بڕیگ له‌ مه‌ردم كومه‌ڵگا.

له‌ى دیارده‌ى خوه‌یكوشتن و كووتاییهاوردنه‌ وه‌ ژیان، وه‌رپرسیارێتى ئه‌كه‌فیده‌ بان هه‌ر یه‌ك له‌ خیزان و حكوومه‌ت و لایه‌نه‌یل په‌یوه‌ندیدار و مامۆستایه‌یل ئایینى، هه‌ر وه‌و خاتریشه‌ بایه‌سه‌ له‌بان گشت ئى لایه‌نه‌یله‌ هه‌وڵ جددى بیه‌ن ئه‌را كه‌مه‌وكردن ئى دیارده‌ى مه‌ترسیداره‌و حكوومه‌تیش وه‌ شیوه‌ى سه‌ره‌كى رى و شوون تایبه‌ت له‌وه‌ر بگرید و كیشه‌ى خوه‌یكوشتن ژنه‌یل وه‌ كاروبار و ئه‌رك ئنسانیه‌ت خوه‌ى بزانید ئه‌را روى وه‌ڕوى بوینه‌وه‌ى ئه‌و خاڵه‌یل خراوه‌ ك بوونه‌ هووكار ئى دیارده‌.

وه‌ل ئه‌وه‌یشا ئه‌رك مامۆستایه‌یل ئایینى له‌ى مه‌سه‌له‌، نه‌بایه‌د ته‌نیا هه‌ر ئدانه‌و حاشاكه‌ر حاڵه‌ته‌گه‌ بوود، به‌ڵكوو بایه‌سه‌ رینیشانده‌ر و رینماییكه‌ر و چاره‌سه‌ركه‌ر جددى حاڵه‌ته‌یل تون وتیژى و فیشتر گرینگى وه‌ى لایه‌نه‌ بیه‌ن و نه‌خش باڵایگ داشتوون له‌ بڵاوكردنه‌وه‌ى هویر پوخت و په‌یوه‌سكردن ژنه‌یل وه‌ ریڕه‌و چاره‌سه‌ر، چوینكه‌ فریه‌جار ئه‌گه‌ر ژنه‌یل په‌ى وه‌ چاره‌سه‌ر گونجیاگیگ بووه‌ن، شایه‌ت دى خوه‌یان نه‌خه‌نه‌ دام ئه‌و مه‌رگ كوتپڕ و نه‌خواسته‌، وه‌ل ئه‌وه‌یشا بایه‌سه‌ له‌بان حكوومه‌تیش ك ڕى وشوون خاسیگ ئه‌را چاره‌سه‌ر ئى دیارده‌ بگریده‌ وه‌ر و هه‌وڵ وازكردن ده‌زگایه‌یلیگ بیه‌ید چه‌ودیرى حاڵه‌ته‌یل ماددى و ئابوورى خیزانه‌یل بكه‌ن و ده‌زگایه‌یل دژ تون وتیژى دامه‌زریه‌ید ئه‌را په‌یجوریكردن له‌ هه‌ر حاڵه‌تیگ ك ریڕه‌و ئه‌گریده‌ وه‌ر وه‌ره‌و مه‌ترسى و خوه‌یكوشى و له‌ى باوه‌ته‌و بایه‌سه‌ بودجه‌یگ ته‌رخان بكا ئه‌را هه‌وه‌جه‌ى ئه‌و ده‌زگایه‌یل دژه‌ تون وتیژیه‌ تا بتویه‌نید هه‌وه‌جه‌ى ئه‌و ژنه‌یله‌ پڕه‌و بكا ك له‌وه‌ر نه‌دارى و كه‌مده‌سى په‌نا به‌نه‌ وه‌ر خوه‌یكوشى و خوه‌یسزانن و له‌ هه‌مان وه‌خت پرس و پرسكارى وه‌ل ئه‌و كه‌سه‌یله‌ بكا ك بوونه‌ هووكار خوه‌یكوشى ئاده‌میزاده‌یل تر له‌وه‌ر هه‌ر مه‌سه‌له‌یگ كومه‌ڵایه‌تى و یاسایگ دابنریه‌ید ك له‌تى هه‌ق هویچ كه‌سیگ له‌ى باوه‌ته‌و نه‌فه‌وتیه‌یدو كاریگه‌رى ئه‌و یاسایه‌یله‌ له‌یوا بوود هویچ ژن و پیاویگ هه‌وه‌جه‌ وه‌ خوه‌یكوشى نه‌یاشتوون و بتویه‌نن وه‌ گووره‌ى ئه‌و یاسایه‌یله‌ ك په‌یڕه‌و كریه‌ن چاره‌سه‌ر كیشه‌یلیان له‌تى په‌یا بكه‌ن، ك یه‌یش خاسترین له‌وه‌رگرتن ڕى و شوونه‌ ئه‌را كووتاییهاوردن وه‌ى دیارده‌.

محه‌مه‌د كه‌مال

ج . أ