له‌ باوه‌ت جه‌نگه‌گه‌ێ ناونى حدكا و په‌كه‌كه‌

شفق نيوز

ئه‌و جه‌نگه‌ له‌ ناونی حزب دیموكرات كوردستان ئێران و پارت كارگه‌ره‌یل كوردستان له‌ى دوخ ناسك و هه‌سیاره‌ وه‌هه‌ر ویانگێگ بوو ، پاساو نیه‌ڵگرێ و له‌ به‌رژه‌وه‌ندی هویچ لاێگ نییه‌ و دواره‌ نه‌شته‌ر تیه‌رێگه‌ زه‌خمه‌یل گوزه‌یشته‌مان و جه‌نگ برا كوژی كورد وه‌كورد تێه‌رێگه‌ یادمان.

له‌ ساڵه‌یل گوزه‌یشته‌ ك جه‌نگ خوه‌ێ كوژی فه‌ره‌ كردیم، بێجگه‌ ماڵ وێرانی و نه‌هامه‌تی و كه‌مه‌و كردن له‌ پێگه‌ێ سیاسیمان له‌ ئاست ناوده‌وڵه‌تی ،  هویچتر وه‌ نسیومان نه‌وێ ، هه‌ر وه‌ێ خاتره‌ جێ خوه‌یه‌ هه‌رچى زوێه‌ لایه‌نه‌ سیاسییه‌گان چوار پارچه‌ێ كوردستان بانه‌ سه‌ر خه‌ت و وه‌په‌له‌ ئاگر ئه‌و جه‌نگ نگریسه‌ خاموش بكه‌ن.

ئیسه‌ له‌ باشوور كوردستان جه‌نگ سه‌خت وه‌ل تروریسته‌یل داعش درێژه‌ دێرێ و كوردستانیه‌یل له‌ جیاتی گشت جه‌هان جه‌نگ ترور ئه‌كه‌ن و له‌ ڕوێ ناو ده‌وڵه‌تیه‌وه‌ هه‌رێم متمانه‌ێ زیاتر وه‌ده‌س هاوردگه‌ و ڕوژ وه‌ ڕوژیش سه‌نگ هه‌رێم كوردستان له‌ كومه‌ڵگاێ ناوده‌وڵه‌تی ڕوی له‌ هه‌ڵكشانه‌ ، هه‌ر وه‌ی خاتره‌ ئێ جه‌نگ نه‌خوازریاگه‌ له‌ێ ئان و ساته‌ ، زه‌ره‌د وه‌ ناوبانگ كوردستان له‌ ناوچه‌گه‌ و جه‌هان ڕه‌سنێگ ، وه‌ێ خاتره‌ باێه‌د هه‌رسێ سه‌روكایه‌تییه‌گه‌ێ هه‌رێم كوردستانیش هه‌ڵویست خوه‌یان ده‌ر بوڕن و دژ ئه‌و جه‌نگ برا كوژیه‌ بوسنه‌و وته‌نانه‌ت گشت هه‌وڵێگێش بخه‌نه‌ گه‌ڕ تا جه‌نگه‌گه‌ كوتایی وه‌پێ بایگ و له‌ێه‌ زیاتر خوێن كورد وه‌ ده‌س كورد نه‌رژێه‌ێ.

دویاجار مه‌نگه‌ بوێشیم ، ئیسه‌ له‌ گشت وه‌ختێگ زیاتر كورد له‌ هه‌ر چوار پارچه‌ێ كوردستان نیاز وه‌ یه‌گده‌نگی و یه‌كهه‌ڵویستی دێرێ و پشتیوانی یه‌كتریش ئه‌رك سه‌ره‌كی گشت لایه‌نه‌ سیاسیه‌گان كوردستان گه‌وراس ، نه‌گ دژایه‌تی و ئه‌ڵگیرسانن جه‌نگ براكوژی.

له‌ درێژایی مێژوو كوێه‌نه‌ و نو ، قه‌ت له‌ فه‌ن ئیسه‌ كورد یه‌كهه‌لوێست و هاوده‌نگ نه‌وێه‌ و ئه‌و یه‌كهه‌ڵویستی و هاوده‌نگیه‌یش پاڵپشت زیاتر كومه‌ڵگاێ ناوده‌وڵه‌تی ئه‌ڕامان مسوگر ئه‌كا ك ئه‌ڕا هه‌ر چوار پارچه‌ و له‌ گشت ڕویه‌گانه‌وه‌ گرنگ و جیِ بایخه‌ ، وه‌ی خاتره‌ باێه‌د ناكوكیه‌یل بیلیمه‌ لاوه‌ و هه‌رچی زیاتر هه‌وڵ له‌یه‌ك حالى بوێن و له‌یه‌ك نزیك بوێنه‌وه‌ بێه‌یم ، نه‌گ له‌ جیاتی ئه‌وه‌ ، ته‌نانه‌ت له‌ ململانی سیاسیش ئه‌ڕا جه‌نگ برا كوژی په‌ل بكوتیم.

ئومید بابان

ج ك