داعش و كه‌مينه‌يل

شفق نيوز

مێژوو كه‌مينه‌يل ئايينی له‌ مێژوو ئسلام مێژووييگه‌ ك پڕه‌ له‌ سته‌مليكردن و په‌لامارداين، ئه‌را نموونه‌: ئه‌گه‌ر ته‌ماشای مێژوو كورده‌يل ئێزيدی بكه‌يم، دوينيم له‌ مێژوو خوه‌ان هه‌م له‌بان ده‌س هاوخوينه‌يل كورد خوه‌يان وه‌ناو ئسلامه‌و، هه‌م له‌بان ده‌س عوسمانيه‌يل وه‌گشت جووريگ چه‌وسيانه‌سه‌وه‌و په‌لامار دريانه‌.

كه‌مينه‌يل، وه‌تايبه‌ت كه‌مينه‌يل ئايينی، له‌لای گرووپه‌يل ئسلامی، په‌سه‌ن نين. ئسلاميه‌يل وه‌ چه‌و حورمه‌ته‌و ته‌ماشای كه‌مينه‌يل ئايينی ناكه‌ن و باوه‌ڕيان ئه‌وه‌سه‌ ك مامڵه‌كردن وه‌ل ئه‌و كه‌مينه‌يل ئايينيه‌ له‌ ديد ئايينه‌و بايه‌سه‌ وه‌شيوه‌يگ بدێ ك جوور بيباوه‌ڕ و دژ وه‌ ئسلام ته‌ماشا بكريه‌ن، ئمجا مه‌هانه‌يش ئه‌را ئی هه‌ڵويستيشه‌ ئه‌وه‌سه‌ ك مادام ئسلام دويا ئايين ئسلاميه‌، مانای ئه‌وه‌سه‌ باقی مه‌ردمان تر ك هانه‌ بان ئايينه‌يل تر ئه‌ركه‌ له‌بانيان ك واز له‌ ئاينه‌گه‌ی خوه‌يان بارن و بانه‌ بان ئايين ئسلام.

نه‌خوه‌ندنه‌وه‌ی كه‌مينه‌يل ئايينی له‌لای ئسلاميه‌يل هه‌ڵويست زوورمينه‌ی مه‌ردمه‌گه‌يانه‌، هه‌ر يه‌يش بوی له‌يوا كرد وه‌زير وه‌رين ئه‌وقاف و كاروبار ئايينی هه‌رێم كوردستان له‌وه‌خت جه‌شن ئێزيديه‌يل پيرووزبايی ئه‌و جه‌شنه‌ له‌ليان نه‌كا، يه‌يش له‌وه‌ختيگ ك ريزداريان وه‌زير كاروبار ئايينه‌يل تر غه‌يره‌ ئسلاميش بوی!

ده‌وڵه‌ت ئسلامی ناسرياگ وه‌ داعش، جوور ريكخرياگيگ ترۆريستی ئسلامی، نه‌ك هه‌ر دگان وه‌ كه‌مينه‌يل ئايينی نانه‌يد، به‌ڵكوو له‌ده‌يشت هه‌رچوار مه‌زه‌وه‌يل سنی ئسلاميش دگان وه‌ مه‌زه‌و شيعه‌يش نانه‌يد.

داعش وه‌ هه‌مان شيوه‌ی قاعيده‌ هه‌ر له‌ سه‌ره‌تای دامه‌زراننيه‌و تائيسه‌ په‌لامارداين كه‌مينه‌يل ئايينی له‌ عراق و هه‌رێم كوردستان كرده‌سه‌ به‌شيگ له‌ پرووژه‌ و به‌رنامه‌ی كاركردن خوه‌ی. داعش و ئه‌وانه‌ك هانه‌ پشت داعش يا هاوهوير داعشن، وه‌ به‌رنامه‌ مه‌راميان ئه‌وه‌ بويه‌ كه‌مينه‌يل ئايينی له‌ناو پيكهاته‌يل عراقی و هه‌رێم كوردستان بسڕنه‌وه‌و له‌ناوی بيه‌ن.

ئويشن داعش ئسلامی نين و هه‌ر ئسلام جوور ئايدۆلۆجيا ئه‌يه‌رنه‌ كار و له‌ هه‌مان وه‌خت وه‌ناو ئسلاميشه‌و تاوان دژ وه‌ ئنسانيه‌ت ئه‌نجام ئه‌يه‌ن و كه‌مينه‌يل فه‌وتنن، وه‌لی ئه‌وه‌ك جی داخه‌ ئه‌وه‌سه‌ ئه‌وانه‌يش ك داعش و ئسلام تونڕه‌وه‌يش نين، له‌وه‌رانوه‌ر كه‌مينه‌يل ئايينی هه‌مان هه‌ڵويست ديرن له‌ڕوی باوه‌ڕه‌و.

داعش ريكخرياگيگ ترۆريستيه‌ و پرووژه‌يگه‌ ئه‌را له‌ناوبردن، نه‌ك بنياتناين، ك وه‌و خاتريشه‌ ترۆريسته‌يل ئه‌وه‌ له‌ليان دوينريه‌يد ك گشت كرده‌وه‌يگيان دژ وه‌ ئاده‌ميزاد و ديموكراسيه‌، وه‌لی ئه‌وانه‌ك خوه‌يان له‌يوا نيشان ئه‌يه‌ن ك پرووژه‌ی بنياتناين ديرن ئه‌را كوومه‌ڵگاو ئنسانيه‌ت، ئه‌وانه‌ بايه‌سه‌ خوه‌يان ساقه‌و بكه‌ن له‌ جه‌وهه‌ر و كارو كرده‌وه‌و هوير و باوه‌ڕ و بچه‌سپننه‌ی ك ئه‌وان وه‌ شيوه‌يگ ئنسانی هويره‌و ئه‌كه‌ن و گشت كه‌سيگ له‌ هوير وڕا ئازاده‌ ك هه‌رچه‌نی كه‌مينه‌ی ئايينييش بوون.

حه‌سه‌ن ياسين

ج . أ