عراق و پيلان ترۆر

شفق نيوز

ئمجا ئايا له‌وه‌رچه‌ ترۆر په‌يوه‌س بويه‌ ئسلام و هه‌وڵ ئه‌وه‌ دان ناو ئسلام له‌كه‌دار بكه‌ن و له‌ی ڕيه‌و مه‌رامه‌يل خوه‌يان جيوه‌جی بكه‌ن، ك يه‌يش خراوی گه‌ورايگه‌ ده‌رهه‌ق ئسلام، ك هه‌رچه‌نی ئسلام په‌ياميگه‌ ئه‌را ئنسانيه‌ت و ئايينيگه‌ پڕ له‌ وه‌خشين و خوه‌شه‌ويسی، وه‌لی بڕيگ تونڕه‌و له‌وانه‌گ خوه‌يان له‌بان ئسلام هساو ئه‌كه‌ن تويه‌م ئاشووگه‌ری كاڵين وه‌ شيوازيگ تر و هه‌وڵ ئه‌وه‌ دان ده‌س ترۆر داشتوون و ره‌سم ئسلام راسكانی بشيونن ك رووشنايی خسته‌ ژيان ئنسانيه‌ت وه‌و په‌يام ئاسمانيه‌.

مێژوو هويچ وه‌ختيگ ئه‌و كره‌وه‌يل ترۆريستی و كوشتاره‌ فه‌رامووش ناكا ك چه‌ته‌يل سهيۆنی ئه‌نجامی دان ده‌رهه‌ق ملله‌ت فلستينی له‌ سه‌برا و شاتيلا و شوونه‌يل تر ئه‌و وڵاته‌ له‌وه‌ختيگ كاره‌سات و كوشتار دڕندانه‌ له‌ وه‌رانوه‌ر ئه‌و ملله‌ته‌ ئه‌نجام دان و ده‌س گيريا بان خاكه‌يليان وه‌ زووره‌ملی و رخيانه‌و بردن له‌وه‌ر ئه‌وه‌گ شوونه‌يليان بيلنه‌جی وه‌خاتر زه‌فتكردنی، ئمجا له‌يرا پرسيم و ئويشيم: ئايا له‌وه‌رچه‌ عه‌ره‌ب له‌وانوه‌ر ئه‌و هه‌مگه‌ كوشتاره‌ بيده‌نگ بوی و هه‌ميش پرسيم: ئه‌ی فه‌رمانڕه‌وايه‌يل عه‌ره‌ب ئه‌راچه‌ بيده‌نگ مه‌نينه‌ له‌وه‌رده‌م ئی هه‌مگه‌ كوشت و كوشتاره‌ ك ئمڕوو ترۆر له‌ ريكخرياگ داعش ئه‌نجامی ئه‌ياد له‌ عراق؟

ئه‌وه‌گ ئمڕوو داعش و چه‌ته‌يل تاوانكار ئه‌نجامی ئه‌يه‌ن له‌ كرده‌وه‌يل كوشتن و رخه‌وبردن و مه‌سه‌له‌ی كووچ وه‌پيكردن گشت ئه‌يانه‌ هووكاره‌گه‌ی ناكووكی سياسيه‌ و خراوی سياسه‌ت ده‌وڵه‌ته‌يل گه‌وراس وه‌خاتر زاڵبوين خوه‌يان و فرووشتن چه‌ك و ته‌قه‌مه‌نی تا هه‌ميشه‌ مه‌يدانه‌گه‌ پڕ كيشمه‌كيش بمينيد و ئاگر ئاشووگه‌ری له‌تی دامه‌زرنن.

هه‌ر وه‌و خاتريشه‌ ئويشيم: پيلان له‌بان وڵاته‌گه‌مان وه‌رده‌وامه‌و نه‌بايه‌د وه‌ی حاڵه‌وه‌ كووتايی وه‌پی بايد ئه‌گه‌ر ئيمه‌ چويچيايمه‌، ك هه‌ر وه‌و خاتريشه‌ ئه‌و پيلانه‌يله‌ هيز نيشتمانه‌گه‌مان كزه‌و ئه‌كا و بويمنه‌ شكار ئاسانيگ ئه‌را هه‌ركه‌سيگ شه‌ڕ وه‌پيمان بخوازيد، هه‌ر له‌وه‌ر ئه‌وه‌يش بايه‌سه‌ له‌ بانمان يه‌كڕز بويمن له‌ روی وه‌ڕوی بوينه‌وه‌ی گشت سه‌ختيه‌يل و گشت ناكووكی و جياوازييگيش وڵ بكه‌يم وه‌خاتر عراق و ملله‌ته‌ سه‌برداره‌گه‌ی.

عه‌لی زاغينی

ج . أ