به‌غدا خوازياره‌ له‌ده‌يشته‌و خاس بدێد و له‌ناوه‌و جوور خوه‌ی!!

شفق نيوز

عبادی گام يه‌كه‌می وه‌ل شانشين عه‌ره‌بی سعودی ده‌س وه‌پيكرد و ره‌سيه‌ ئه‌وه‌ك باڵوێزخانه‌ی ئه‌و وڵاته‌ له‌ به‌غداو هه‌ولێر واز بكريه‌يد، وه‌ل توركيايش ده‌سكرده‌ دانيشتن و سه‌ردان هاوشيوه‌و سه‌ردان ئوردن و مسريش كرد و مه‌سه‌له‌ی ترۆر و كيشه‌يل وه‌ليانا خسته‌ وه‌رباس و تاوتويكردن، وه‌ل ئه‌وه‌يشا ئيرانيش يه‌كيگه‌ له‌ ناوه‌نده‌يل گرينگ و نزيكه‌يل به‌غدا، ك بيجگه‌ ئه‌وه‌يش ئيران ته‌نيا ده‌وڵه‌ته‌ ك وجوود سه‌ربازی و هه‌واڵگری بته‌و ديريد و له‌ هه‌ر سه‌ردانيگيش گاميگ تر له‌ی وڵاته‌ ئه‌چێده‌ نواوه‌.

ئی سياسه‌ته‌ سه‌رۆك وه‌زيره‌يل به‌غدا جوور ئه‌وه‌سه‌ ك به‌رنامه‌ی كاره‌يل خوه‌ی له‌بان بنه‌مای خاسكردن و شيه‌وكردن و دقه‌تكردن په‌يوه‌نديه‌يل هه‌رێمايه‌تی دانرياويد، يا ئه‌و په‌يوه‌نديه‌يله‌ ك له‌ سه‌رده‌م رژيم به‌عس يا له‌ هه‌يشت ساڵ حوكمڕانی نوری مالكی شيويانه‌، ئه‌و خاسيانه‌و بكا.

گرينگ عبادی يا باوه‌ڕی ئه‌وه‌سه‌ ك كيشه‌يل عراق له‌ ده‌يشته‌و ئه‌يه‌ن ئه‌را ناو وڵاته‌گه‌و وڵاته‌يل ده‌ره‌كی سه‌رچه‌وه‌ی گشت ئه‌و كيشه‌يله‌نه‌ ك له‌ناو عراق دروس بوينه‌، يا خوازياره‌ له‌ی ڕيه‌و خوه‌ی له‌ چاره‌سه‌ر كيشه‌يل راسكانی ناو عراق بدزيده‌و، چوينكه‌ ئه‌و بايه‌سه‌ ڕی له‌ پاشمه‌نده‌ی سياسه‌ت نوری مالكی بگريد له‌ناو ده‌سڵات و له‌ناو حزب ده‌عوه‌يش، ك هيمان مالكی باڵاده‌سه‌.

لێدوانه‌يل حه‌يده‌ر عبادی بريگ دژه‌ ئه‌ڕای چوين ديرن، له‌لايگه‌و بريار چاره‌سه‌ر كيشه‌يل وه‌ل هه‌رێم كوردستان ئه‌ياد، له‌لايگ تريشه‌و بڕيار وه‌رده‌وامبوين دووسی نيشتمانی ده‌رئه‌كا و له‌لايگيشه‌و ئويشيد ئيمه‌ خوه‌مان عراقيانه‌ چاره‌سه‌ر كيشه‌يل وه‌ل سونيه‌يل ئه‌كه‌يم و هه‌ر خوه‌مانيش له‌ڕوی داعش ئه‌وسيم و له‌ جيای دونيايش جه‌نگ ئه‌و گرووپه‌ ئه‌كه‌يم و شكه‌ست وه‌پيان ئه‌يه‌ريم.

وه‌ قسه‌ ئويشيد هووزه‌يل عه‌ره‌ب سنی پڕچه‌ك ئه‌كه‌يم، له‌ هه‌مان وه‌ختيش ئويشيد ئيمه‌ هه‌وه‌جه‌ وه‌ فيشتر له‌ سێ ساڵ ديريم ئه‌را ريكه‌ه‌وخستن سوپا، وه‌ل ئه‌وه‌يشا گومانيش له‌ پڕچه‌ككردن هووزه‌يل سونييش ديرن و كيشه‌يل به‌غداو هه‌ولێريش سپاريده‌ ليژنه‌يل.

ئيمه‌ وه‌پيمان له‌يواسه‌ ك ئه‌وان چه‌ويان كه‌فته‌ هه‌وڵ پێشمه‌رگه‌و گه‌شه‌كردن دبلۆماسی و په‌يوه‌نديه‌يل سياسی هه‌ولێر وه‌ل ئه‌مريكاو وڵاته‌يل ئۆرپاو توركياو بريگ له‌ وڵاته‌يل عه‌ره‌بی و ئيران، ك وه‌و خاتريه‌ حه‌سويدی وه‌پی بردن و وه‌هميگ له‌لايان دروس بوی ك گوايا سوپای شكه‌ستخواردگ عراق ئه‌تويه‌نيد هه‌مان چشت بكا ك هه‌رێم كوردستان دژ داعش ئه‌كاده‌ی. نه‌خه‌ير ئه‌وه‌ ديد غه‌ڵه‌تيگه‌، چوينكه‌ هه‌ڵكه‌فت هه‌رێم كوردستان جياوازه‌ وه‌ل هه‌ڵكه‌فت به‌غداو پێشمه‌رگه‌ كيشه‌و مه‌سه‌له‌يگ ئنسانی و سياسی و ئه‌خلاقی وه‌رانوه‌ر وه‌ داعش و گرووپه‌يل تونڕه‌و ديريد، هه‌رێم كوردستان مقه‌يه‌تی له‌ فيشتر له‌ يه‌ك مليۆن ونيم ئه‌كا، ك نه‌ حكوومه‌ت به‌غداو نه‌ سوپای عراقيش ئی مه‌سه‌له‌ نه‌يرن.

بايه‌سه‌ ئه‌وه‌يش له‌ هوير نه‌وه‌يم ك كومه‌ڵگای عه‌ره‌ب عراقی ئيسه‌يش دابه‌شن له‌بان دو به‌ش سه‌ره‌كی سونی و شيعه‌و باوه‌ڕ وه‌ يه‌كتری نه‌يرن و هيمان داعش له‌ زوورم ناوچه‌يل سونی باڵاده‌سه‌و جی متمانه‌ی ده‌سڵات و لايه‌نه‌يل شيعه‌ نيه‌، ك وه‌و خاتريشه‌ ئويشيم عبادی غه‌ڵه‌ت گه‌ورايگ سياسی ئه‌كا له‌ گامه‌يل يه‌كه‌م ده‌سڵاته‌گه‌ی ئه‌گه‌ر له‌ كيشه‌يل ناوخوه‌ی بهه‌يوايد و گام بنه‌يد وه‌ره‌و ده‌يشت عراق، يا باوه‌ڕی ئه‌وه‌ بدێد ك له‌ڕی خاسه‌وكردن په‌يوه‌نديه‌يل وه‌ل وڵاته‌يل هاوسا ئه‌تويه‌نيد چاره‌سه‌ر كيشه‌يل ناوخوه‌يی بكا.

ئه‌و ئه‌گه‌ر بخوازيد فشاره‌يل ناوخوه‌يی له‌ڕی خاوكردنه‌وه‌ی فشاره‌يل ده‌ره‌كی چاره‌سه‌ر بكا، ئه‌وه‌ ته‌نيا گاميگ ئه‌را به‌نجكردن كيشه‌يل ئه‌نه‌يد وه‌شيوه‌يگ وه‌ختی و ئه‌گه‌ريش ناوماڵ عراق چاره‌سه‌ر و بته‌و نه‌كا، مه‌حاڵه‌ بتويه‌نيد ئارامی و گونجيان و دووسی نيشتمانی و بته‌وكردن سوپاو هاوردنه‌وه‌ی متمانه‌ و چاره‌سه‌ر كيشه‌يل ناونی به‌غداو هه‌ولێر دابين بكا.

غازی حه‌سه‌ن

ج . أ