ده‌رفه‌ته‌يل له‌ده‌سچگ فه‌يليه‌يل – به‌ش يه‌كه‌م

شفق نيوز

ئيمه‌ پيشبينى ئه‌وه‌ كرديايم، چوينكه‌ ئه‌يه‌ يه‌كه‌مجار و دوياجار نيه‌، ئيمه‌يش ك پيكهاته‌يگيم ئه‌و قورسايى سياسى و ره‌سانن و كومه‌ڵايه‌تى و ئابووريه‌ نه‌يرێد و تواناى خاسيگيش نه‌يريم له‌ ديد بريگ له‌ پيكهاته‌يله‌و، وه‌لى بايه‌سه‌ بويشيم ئيمه‌ ئمڕوو بڕيگ كادر دڵسووز ديريم و ناسريانه‌ وه‌ ئه‌وه‌گ وه‌ كه‌مترين توانايگه‌و ئه‌تويه‌نن ده‌سكه‌فت گه‌ورا وه‌ده‌س بارن، ئى ده‌زگايشه‌ وه‌ى چشته‌ ناسرياو ركابه‌رى ده‌زگايه‌يل تر ئه‌كا، نه‌ك هه‌ر وه‌ توانا، به‌ڵكوو وه‌ پيشكه‌شكردن فيشتر و جيوه‌جيكردن ئاكامه‌يل وه‌ل سه‌ختيه‌يل فريه‌يگ، ك يه‌يش خواست و مكوڕبوينيگه‌ تا كه‌سه‌يل تر له‌ كيشه‌گه‌مان بڕه‌سنه‌و، ك يه‌يش مه‌سه‌له‌ى ئاشكرايگ بوى له‌ ماوه‌ى ده‌يه‌يگ له‌ كاركردن.

وه‌لى ئمڕوو وه‌ل نيزكه‌وبوين دو ساڵ له‌ قه‌يران نه‌وين پشتگيرى ماددى، خوه‌ندنه‌وه‌يليگ تر هه‌س گونجيه‌ێد وه‌ل ئه‌و بڕه‌ ته‌عليقه‌يله‌ ك گرته‌ى خوه‌ى، هه‌ر له‌وه‌ر ئه‌وه‌يش شايه‌ت خراو فامستنيگ له‌باوه‌ت خواست مه‌ندنه‌وه‌ يا نه‌مه‌ندنى بدێ له‌ساى به‌راوردكردن ئى ده‌زگا وه‌ل ده‌زگايه‌يل تر، چوينكه‌ كه‌سه‌يليگ هه‌ن پرسيار ئه‌كه‌ن ده‌سكه‌فته‌يل شه‌فه‌ق چه‌ بويه‌ تا باوه‌ڕ وه‌ خواست وجوودى يا وه‌رگرى و پشتگيريكردنى بكريه‌ێد؟

بيگومان ئنساف نيه‌ به‌راورد توانايه‌يل شيعه‌ يا سنى وه‌ل تواناى فه‌يليه‌يل بكه‌يم، فريه‌جار ئه‌وانه‌گ دعايه‌ ئه‌را مه‌سه‌له‌ى رويكردن له‌ مه‌زه‌وى يا سياسى يا نه‌ته‌وه‌يى يا ره‌گه‌زى ئه‌كه‌ن ئه‌وانه‌ پشتگيرى گه‌ورايگ ديرن و وه‌گووره‌ى ئه‌و توانايه‌يله‌ ئى شماره‌ى فريه‌ى كه‌ناڵه‌يل ئاسمانى و هووكاره‌يل تر ره‌ساننه‌ ئاشكراسه‌و له‌ هه‌مان وه‌خت وه‌و توانايشه‌وه‌ شاره‌زايى و په‌يوه‌نديه‌يل سياسى فراوانيگيش ديرن و ئه‌دێده‌ هووكار دروسكردن ده‌رفه‌ت و كه‌شيگ ده‌سميه‌تده‌ر ئه‌رايان ئه‌را وه‌رده‌وامى و فراوانكردن كاره‌يليان.

يه‌يش گشتى هه‌وه‌جه‌ وه‌ وه‌خت و به‌رنامه‌و چه‌وديرى ئه‌خوازێد و ئيمه‌ى فه‌يليه‌يليش ئى چشته‌يله‌ نه‌يريم وه‌ بوونه‌ى تايبه‌تمه‌نديه‌يل كيشه‌گه‌مان ئه‌و وه‌ربه‌س و گرفته‌يله ك وجوود ديرن وه‌ل شيواز هويره‌وكردنمان و ره‌فتاره‌يلمان له‌ناونى خوه‌مان له‌ كه‌شيگ نه‌گو‌نجياگ.‌ ئه‌را نموونه‌: هه‌ناى بويمه‌ ئه‌ندام له‌ په‌رله‌مان كوردستان باوه‌ڕم ئه‌وه‌ بوى له‌ بوار سياسه‌ت توانايگ زيايه‌و كاريگه‌ر په‌يا ئه‌دێ ئه‌را پشتگيرى كيشه‌گه‌مان، وه‌لى ئه‌ڵڵاجه‌وييم هات له‌ ديد وه‌رته‌نگه‌ له‌لاى بڕيگ له‌ فه‌يليه‌يل وه‌ وه‌رنه‌گرتن ئى رويداگه‌و ئه‌ڵڵاجه‌ويميش هات وه‌ رينمايى و په‌يڕه‌وه‌يل كار له‌ په‌رله‌مان كوردستان، ماناى ئه‌وه‌سه‌ هويچ ده‌رفه‌تيگ يا به‌رنامه‌يگ نه‌وى ئه‌را پيكهاته‌يل كومه‌ڵگاى كوردى و كه‌مينه‌يل تر له‌وانه‌گ تايبه‌تمه‌ندى و مه‌ينه‌تى جوراوجوور ديرن و ته‌نانه‌ت له‌ ساى ده‌ركه‌فتن ئۆپۆزسيۆنيش ك گومان و ره‌ته‌وكردن داشت ئه‌را گشت چشتيگ، يه‌يش له‌وه‌ختيگ ك من كانديد بويم ئه‌را ريڕه‌ويگ سياسى ك هوير له‌وه‌ كريا ك له‌ڕى داين ئى كورسيه‌ وه‌ فه‌يليه‌يل ئاشته‌و بكريه‌ن وه‌ ئه‌وه‌گ قه‌رزار فه‌يليه‌يلن وه‌ بوونه‌ى به‌شداريكردنيان و قوربانيداينيان له‌ جمشت ئازاديخواز كورد وه‌ سه‌ركردايه‌تى بارزانى نه‌مر.

وه‌ل گشت ئه‌يانه‌يش هه‌ميشه‌ ده‌سپيچگ وه‌رده‌وام له‌ په‌رله‌مان كوردستان له‌باوه‌ت كيشه‌يل فه‌يليه‌يل دوير بوى له‌ قسه‌وباسه‌يل نه‌ته‌وه‌يى و وتيان كيشه‌گه‌دان ها ده‌يشت هه‌رێم، بار ئيسه‌يش خاستر نه‌وى وه‌ل نوێنه‌ره‌يل فه‌يلى له‌ ئه‌نجومه‌ن نوێنه‌ره‌يل عراقى له‌ وه‌ختيگ ته‌ڵايى ك 9 نوێنه‌ر داشتيم و دگان وه‌ كيشه‌گه‌يان نرياو تواناى دامه‌زانن لۆبييگ نه‌ياشتن له‌وه‌ر هووكاره‌يل فريه‌يگ، يه‌يش بيجگه‌ وجوود وزه‌يره‌يل و بريكاره‌يل وه‌زير و وه‌رپرسه‌يليگ فه‌يلى له‌و قوناغه‌، ئمجا ئيسه‌يش نه‌ ئه‌نداميگ ديريم و نه‌يش وه‌زير و جارجاريگيش وه‌ كه‌سيگ ئويشم فه‌يليه‌، وه‌لى ئه‌و دگان وه‌ فه‌يلى نانه‌ێد.

گشت ئاده‌ميزاديگ له‌ رووژگارى ئه‌ياده‌ تويش بريگ له‌ هه‌ڵبژارده‌يل چاره‌نويسساز، ك بايه‌سه‌ گرينگى ئى بڕيار و هه‌ڵبژارده‌يل گونجياگه‌ ده‌سنيشان بكا وه‌‌‌ل كاريگه‌رى له‌بان ژيان و ئاينده‌ى، هه‌ڵوژاردن له‌ كيشه‌يل ئاسايى ئه‌و كاريگه‌ريه‌ نانه‌ێده‌ بان ژيان و ئاينده‌ى كه‌سيگ، وه‌لى داين برياره‌يل گرينگ راسه‌وخۆ كاريگه‌رى ديرێد له‌بان ئاينده‌ و هه‌ڵوژاردن نادقه‌تيش گرفته‌يليگ له‌ شوونى مينێده‌و ئاقيه‌تى خراوه‌، ئمجا ئيمه‌ى فه‌يليه‌يليش بايه‌سه‌ دگان وه‌ ئه‌وه‌يا بنه‌يم ك فريه‌جار برياره‌يلمان غه‌ڵه‌ت بويه‌و له‌و ئاست هه‌وه‌جه‌داره‌ نه‌ويه‌. ئمجا وه‌ باوه‌ڕم يه‌كيگ له‌ گرينگترين هووكاره‌يل ئه‌وه‌سه‌ ك ئيمان وه‌ كيشه‌گه‌ نيه‌ له‌لاى كه‌سه‌يليگ وه‌و جووره‌ ك خواسته‌، ره‌سينيش ئه‌را ژير گومه‌ز په‌رله‌مان يا ئه‌نجومه‌ن وه‌زيره‌يل يا هه‌ر پۆستيگ تر جوور سه‌ره‌تاى ده‌سوه‌پيكردن كاريگه‌، وه‌لى ئه‌را بريگ له‌ فه‌يليه‌يل جوور دويا ويستگه‌يگه‌و گرينگ نيه‌ چشتيگ وه‌ناو فه‌يليه‌يل باس بكريه‌ێد، به‌ڵگه‌يش له‌بان ئه‌وه‌ ئايا ئه‌وانه‌ ئيسه‌ خه‌ريك چه‌ن؟ ته‌نانه‌ت هه‌رچه‌نى ك چالاكييش داشتوون ئه‌را له‌وه‌رچه‌ دياريان نيه‌ له‌ مه‌يدان و ئه‌را ته‌نيا له‌ بوونه‌يليگ خوه‌يان نيشان ئه‌يه‌ن؟!

مامڵه‌كردن له‌ باريگ سياسى و كومه‌ڵايه‌تى و ئابوورى وه‌ شيوه‌يگ واقعى نه‌خش كاريگه‌ر ديرێد له‌ سه‌رخستن يا شكه‌ست هه‌ر پرووژه‌يگ، ئه‌وسا گرينگترين ئه‌زره‌ته‌يل هه‌ر جايه‌ڵيگ ئه‌وه‌ بوى بچێده‌ زانۆ، وه‌لى ئمڕوو چگن وه‌ زانكۆ زه‌مانه‌ت ئاينده‌ ناكا، چوينكه‌ ريژه‌ى بيكارى له‌ناونى ده‌رچگه‌يل نيشانه‌ى ئه‌و مه‌سه‌له‌سه‌.

به‌شداريكردنيش له‌ هه‌ر پرووسه‌يگ سياسى يا ده‌سوه‌پيكردن هه‌ر پرووژه‌يگ ده‌سميه‌تده‌ر يا پشتگيريكه‌ر له‌ كيشه‌گه‌مان وه‌بى شيه‌وكردن و نه‌فوه‌رگرتن له‌ ئه‌زموونه‌يل وه‌رين و خوه‌نينه‌وه‌ى دروسيگ ئه‌را ئى واقعه‌ ك له‌ى ژيه‌يم سه‌رناكه‌فێد، ئيمه‌ى فه‌يليه‌يليش وه‌رجه‌ ئه‌وه‌گ ده‌س بيه‌يمنه‌ هه‌ر پرووژه‌يگ بايه‌سه‌ يه‌كه‌مجار بڕه‌سيمنه‌ ئه‌و چشته‌ ك قه‌ناعه‌ت و ئيمان وه‌و كيشه‌ داشتويم ك كار له‌بانى ئه‌كه‌يم.

په‌يابوين شه‌فه‌ق وه‌ل سه‌ره‌تاى بار تازه‌ له‌ عراق ريككه‌فت، له‌و وه‌ختيشه‌ جه‌هان ئه‌نته‌رنێت چه‌سپياگ هه‌وه‌جه‌يگ نه‌وى جوور وه‌سيله‌يگ په‌يوه‌ندى وه‌ل گشت مه‌ردم و ئه‌وسايش مه‌ويسى گوزه‌يشته‌ هه‌ميشه‌ له‌وه‌رده‌ممان بوى و كيشه‌يل هونه‌رى و به‌رهه‌مى و كه‌مى له‌و كادره‌يله‌ داشتيم ك وه‌ شيوه‌زووانه‌گه‌مان قسه‌ بكه‌ن وه‌بوونه‌ى تايبه‌تمه‌نديه‌يلمان و وه‌ بوونه‌ى گشت ئه‌و گرفته‌يليشه‌ هه‌ميشه‌ كيشه‌كه‌مان دو ئه‌وه‌نه‌ى كيشه‌ى مه‌ردمان تر بوى له‌ى بواره‌، وه‌لى وه‌ل ئه‌وه‌يشا تام شيرين دامه‌زرانن يه‌كه‌م راديۆ و يه‌كه‌م ماڵيه‌ڕ و يه‌كه‌م گووڤار كوردى فه‌يلى نيشانه‌ى ئيمان و باوه‌ڕ و توانايى ريڕه‌ويگ بوى له‌ كاروانيگ ك نادێ بويشيم به‌تاڵ بوى له‌ غه‌ڵه‌ت.

عه‌لى حسێن فه‌يلى