1970 تا 1988.. سه‌ختترین ماوه‌ له‌ مێژوو كورده‌یل فه‌یلى

شفق نيوز

سه‌دام هه‌ر له‌وه‌خت ده‌سڵاتدارێتى و له‌وه‌ختیگ جیگر سه‌رۆكیش بوى، پلان له‌ناوبردن كورده‌یل فه‌یلى له‌ كارنامه‌ى بوى، چوینكه‌ فه‌یلیه‌یل لایه‌نگرى شووڕشه‌گه‌ى نه‌كردن و هه‌ر له‌ سه‌ره‌تایش دژ هاتن به‌عس بوین ئه‌را ته‌خت ده‌سڵات.

كورده‌یل فه‌یلى هه‌رچه‌نى ساڵه‌یل دویرو دریژیگ كه‌فتنه‌ ژیر بار ده‌رده‌سه‌رى و مه‌ینه‌تى، وه‌لى له‌ساڵ 1970 تا 1988، وه‌ سه‌ختترین ماوه‌ له‌تاریخیان دریه‌ێده‌ قه‌ڵه‌م، چوینكه‌ له‌و ماوه‌ رژیم به‌عس وه‌ دڕنده‌ترین شیواز ده‌سكرده‌ كوشتن و گرتن و له‌ناوبردن و كووچ وه‌پیكردن زووره‌ملى كورده‌یل فه‌یلى وه‌ مه‌هانه‌ى ته‌به‌عیه‌ى ئیرانى!

له‌و ماوه‌ى سه‌خت و سته‌مه‌، چه‌وسیان فريه‌یگ هاته‌ تویش خیزانه‌یل كورد فه‌یلى و ماڵ و موڵكه‌یلیان له‌لیان زه‌فت كریا، رووڵه‌یلیان بى سه‌رو شوون كریا، كوڕ و دویه‌ته‌یلیان له‌خوه‌نین ناهمى بوى و هویچ كۆلیژیگ وه‌ریان نه‌گرت له‌وه‌ر ئه‌وه‌گ ناسنامه‌یان له‌لیان سه‌نریاوه‌، هه‌ر وه‌و خاتریشه‌ جیا له‌پیكهاته‌یل تر ته‌نیا رووڵه‌یل كورد فه‌یلى له‌ خوه‌نین بیبه‌ش كریان وه‌ بڕیاریگ له‌لایه‌ن ئه‌نجومه‌ن سه‌ركردایه‌تى شووڕش رمیاگ، وه‌ل ئه‌وه‌یشا دڕنده‌ترین تاوان كوشتن وه‌جه‌م ده‌رهه‌قیان ئه‌نجام دریا ك وه‌ جووریگ له‌ مێژوو ئنسانیه‌ت هویچ مه‌ردمان و ملله‌تیگ تر له‌بان ئى گووشه‌ى زه‌ویه‌ له‌یوا كاره‌ساتیگ ڕوى نه‌یاگه‌و جوور كورد فه‌یلى زوڵم له‌لیان نه‌كریاگه‌، راسه‌ به‌شیگ تر له‌ پیكهاته‌یل عراق وه‌ دریژایى ساڵه‌یل فریه‌یگ كه‌فتنه‌ وه‌ر سته‌م و چه‌وسیان دیكتاتۆریه‌ت و حوكم ئاگر و ئاسن به‌عس، وه‌لێ جوور ئه‌وه‌ك ئاماژه‌ وه‌پى كردیم كورده‌یل فه‌يلی له‌و زوڵم و چه‌وسیانه‌ به‌ش شیر كه‌فته‌ پیان.

ئمجا دویاى ئه‌و هه‌مگه‌ مه‌ینه‌تى و كاره‌ساته‌ ك هاته‌ تویش ئى مه‌ردمان ئاشتیخواز و نیشتمانپه‌روه‌ر و ره‌سه‌نه‌، وه‌لێ ئیسه‌یش هه‌ر وه‌ ئه‌زره‌ته‌و ژيه‌ن و هیمان هویچ به‌ند و بڕگه‌و مادده‌یگ له‌و بڕیاره‌یل ئه‌نجومه‌ن سه‌ركردایه‌تى شووڕش وه‌رینه‌ له‌بانیان لانه‌وریاگه‌و تائیسه‌یش بڕیار دادگاى باڵاى تاوانه‌یل ك له‌ڕووژ 29/11/2010 له‌باوه‌ت له‌ناوبردن وه‌جه‌م"جینۆساید"كورده‌یل فه‌یلیه‌و ده‌رچى ناته‌سه‌ جیوه‌جیكردن و ره‌وایى مافه‌یل ره‌وایان وه‌پیان نه‌دریاگه‌و قه‌ره‌بوو هویچ خیزانیگ له‌لیان نه‌كریاگه‌.

كورد فه‌یلى ئه‌را ماوه‌ی نيم سه‌ده‌س زوڵم و سته‌م ده‌رهه‌قيان ئه‌نجام دريه‌ێد، ماڵویرانى و ده‌روه‌ده‌رى و ژان و سته‌م فریه‌یگ هاته‌سه‌ تویشيان و ئه‌را ماوه‌ی 18ساڵ له‌و ساڵه‌یليشه‌ مه‌رگه‌سات بى وینه‌یگ بوى له‌ژیانیان و ئیسه‌یش له‌لایه‌ن حكومه‌ت تازه‌ی عراقه‌و فه‌رامووشن و حزب و لايه‌نه‌يليش ته‌نيا له‌وه‌خت هه‌ڵوژاردن ئی پيكهاته‌ی سته‌مديده‌ ئه‌كه‌فێده‌ هويريان!!

جه‌مال ئه‌ركه‌وازی