دويه‌ته‌ كورديگ فه‌يلی له‌ ناونی شيعر و هونه‌ر سيناريۆ

شفق نيوز

ئيمه‌ فريه‌جار باس كرديمه‌و ئويشيم: كورده‌يل فه‌يلی مه‌ردمانيگ هزر زينگ و رووشنويرن، له‌ ئه‌ده‌ب و ماريفه‌ت ده‌س باڵايگ ديرن، شاعر و نويسه‌ر و مێژوونويس و ئه‌ديبه‌يل فريه‌يگ له‌ناو فه‌يليه‌يل هه‌ڵكه‌فتگه‌، يه‌يش بيجگه‌ كه‌سايه‌تی پايه‌به‌رز و شوونه‌وارناس و زاناو دانای ناوداريگ ك جی داخه‌ رووژنامه‌و ميديايه‌يل كوردی هويچ وه‌ختيگ هه‌وڵ ئه‌وه‌ نه‌ياگه‌ ئه‌را چه‌ن ده‌قه‌يگيش بچێده‌ خزمه‌تيان و باسيگيان بكا.

هه‌ر وه‌و خاتريشه‌ ئاره‌زوو ئه‌وه‌ داشتم له‌ی باوه‌ته‌و باس به‌هره‌ی دويه‌ته‌ كورديگ فه‌يلی بكه‌م ك سه‌ره‌تای ده‌س وه‌پيكردن نويسانن له‌ عومر ١٥ ساڵان له‌لای ره‌نگه‌و داگه‌و ده‌سكرده‌سه‌ نويسانن شعر و ئه‌ده‌ب، وه‌لی جوور ئه‌وه‌ك خوه‌ی ئويشيد: له‌ كه‌شيگ پڕ له‌ ترس و له‌رز و له‌ سه‌رده‌م رژيم گوڕ وه‌گووڕ و له‌ناو ناڕه‌حه‌تی و دڵه‌ڕاوه‌كی فريه‌يگ.

"زه‌ميا وه‌لی مه‌ڵگشايی فه‌يلی" دويه‌ته‌ شاعر و هونه‌رمه‌ند كورد فه‌يلی له‌ ساڵ ١٩٦٤ له‌ ناوچه‌ی مه‌نسوور له‌ به‌غدا هاته‌سه‌ دونيا، دويای خوه‌نين سه‌ره‌تايی و ناوه‌ندی و ئاماده‌يی چيه‌سه‌ كۆليژ ئاداب له‌ به‌ش ره‌سانن ك هه‌رچه‌نی كووچ زووره‌ملی وه‌پيانيش كرياو چه‌ن كه‌سيگيش له‌ ئه‌ندامه‌يل خيزانه‌گه‌يشی دريا له‌ سێداره‌، وه‌لی وه‌ل ئه‌وه‌يشا هه‌ر وه‌رده‌وام مقه‌يتی له‌ نويسانن شعره‌يلی كردياد و ئيسه‌يش خاوه‌ن چه‌نه‌ها ديوان و كتاو شعری له‌چاپدرياگه‌.

زه‌ميا فه‌يلی خاوه‌ن باوه‌ڕنامه‌ی دبلۆم ئداره‌و باوه‌ڕنامه‌يگه‌ له‌ نويسانن هونه‌ر سيناريۆ له‌ ريكخرياگه‌يل كومه‌ڵگای مه‌ده‌نی، ك له‌ی هونه‌ريشه‌ بيجگه‌ هونه‌ره‌ شيعريه‌گه‌ی ده‌س باڵايگ ديريد، يه‌يش بيجگه‌ ئه‌وه‌ك جوور نويسه‌ره‌يگيش له‌ رووژنامه‌يل جوور"ئه‌لزه‌مان و ئه‌لشه‌رق و ئه‌لمه‌دا و ئه‌لبه‌يان و ئه‌لنه‌هار و كه‌ربه‌لای ئمڕوو و ئاينده‌ی عراقی"باوه‌ته‌يلی بڵاو كرياگه‌.

زه‌ميا فه‌يلی حاڵ حازر نيشته‌جی شار هه‌ولێره‌و ئيسه‌يش وه‌رده‌وامه‌ له‌بان نويسانن شعر و باوه‌ته‌يلی، ك له‌ هه‌مان وه‌خت ئاماژه‌ وه‌ مه‌ويسی و ده‌رده‌سه‌ری پيكهاته‌گه‌يشی كردگه‌و گشت ئه‌و رويداگه‌يل دڵته‌زنه‌ له‌ناو نويساننه‌يلی خسته‌سه‌ وه‌رچه‌و. ئوميده‌وارم نموونه‌ی فيشتر بوود ئه‌را خزمه‌ت وه‌ هونه‌ر و ئه‌ده‌ب كوردی.

جه‌مال ئه‌ركه‌وازی