نه‌خش كورده‌یل فه‌یلى له‌ژیان رووشنهویرى عراقى

شفق نيوز

و كومه‌ڵایه‌تى و رووشنهویرى و زانستى عراقى. به‌شداربوین له‌ بنیاتناین عراق تازه‌و هه‌ر كه‌سیگ له‌مه‌یدان خوه‌یه‌وه‌ به‌شدارى كرد، له‌ ناونیانیش پزیشكه‌یل خاس و شاره‌زا، له‌وانه‌یش ڕه‌حمه‌تى شه‌هاب عه‌زیز، ك یه‌كه‌م كه‌سیگ بویه‌ نه‌شته‌رگه‌رى كاڵین گلینه‌(قرنیه‌)ى چه‌و كرد له‌ڕووژهه‌ڵات ناوڕاس، ك وه‌ سه‌ركه‌فتن خاسیگ ئه‌را میریگ سعودى ئه‌نجامیدا، ك دویاخر میر سعودى داوا له‌لى كرد عیاده‌یگ واز بكا له‌بان هساو ئه‌و، ك گشت خه‌رجه‌گه‌ى بكیشیگ و تازه‌ترین وه‌سیله‌ى پزیشكى ئه‌ڕاى دابین بكا، وه‌لى ئه‌وه‌ بوى دكتۆر شه‌هاب نه‌تواس له‌سعودیه‌ ئه‌و كاره‌ ئه‌نجام به‌یگ ، چوینكه‌ وڵاته‌گه‌ى خوه‌ى(عراق) هه‌وه‌جه‌ وه‌پى داشت، وه‌لى وه‌داخه‌وه‌ خاسیه‌گه‌ى وه‌ ئه‌وه‌ دریاوه‌ له‌وه‌خت ده‌ركردن فه‌یلیه‌یل له‌ساڵ 1980 گیریاو خریا زندانه‌وه‌ تا له‌ورا بكوشیه‌یگ.

له‌مه‌یدان رووشنهویرییش له‌گشت لایه‌نه‌یل وه‌رزشى وئه‌ده‌بى و هونه‌رى و رووژنامه‌گه‌رى، كورده‌یل فه‌یلى به‌شدارى خاسیگ داشتنه‌، له‌وانه‌یش: هه‌ردوگ شاعر گه‌ورا جه‌میل سدقى زه‌هاوى و مه‌عروف ڕسافى و داستاننویس عه‌بدولمه‌جید لوتفى و دكتۆر كامل به‌سیر و شاعر و رووژنامه‌نویس عه‌باس به‌درى و غائب توعمه‌و شاعر زاهد محه‌مه‌د و بڵند حه‌یده‌رى و شاعر تازه‌ جه‌لیل حه‌یده‌ر و ره‌ساننكار و ویژه‌ر روشدى عه‌بدولساحب و كه‌سه‌یل تر.

له‌ مه‌یدان مۆسیقایش: ژه‌نیار ناودار جه‌هانى عود ڕه‌حمه‌تى سه‌لمان شوكر و مه‌حموود شوكر براى، وۆسیقاژه‌ن ناودار نه‌سیر شه‌مه‌، ئاوازدانه‌ر كه‌وكب حه‌مزه‌، گورانیچڕ مه‌قام ڕه‌حمه‌تى حه‌سه‌ن خه‌یوكه‌، گورانیچڕه‌یل جه‌عفه‌ر حه‌سه‌ن و ره‌زا عه‌لى و جاسم خه‌یات و حه‌سه‌ن سه‌عدى و ره‌زا خه‌یات.

له‌مه‌یدان وه‌رزشیشه‌وه‌: كورده‌یل فه‌یلى جموجویل خاسیگ دانه‌ وه‌رزش عراقى، له‌وانه‌یش: پاڵه‌وان عه‌بدولواحد عه‌زیز ك مه‌دالیه‌ى برۆنزى عراق وه‌رگرت له‌ ده‌وره‌ى رۆما له‌ساڵ 1960، بیجگه‌ ئه‌ویش پاڵه‌وان له‌ وازیه‌یل ئاسیایى عه‌زیز عه‌باس و هه‌ردوگ گۆڵچى هه‌ڵوژارده‌ى وه‌رین عراق ئه‌نوه‌ر موراد و جه‌لال عه‌بدولره‌حمان و وازیزانه‌یل مه‌حموود ئه‌سه‌د و عه‌بدولسه‌مه‌د ئه‌سه‌د و مهدى عه‌بدولساحب و جه‌بار سه‌یفوڵڵا و هه‌ردوگ وازیزان هه‌ڵوژارده‌ى نیشتمانى له‌ تووپ سه‌وه‌ته‌ داوود سه‌لمان و عه‌بدلحسین خلیل.

كورده‌یل فه‌یلى له‌مه‌یدان وه‌رزشه‌وه‌، یانه‌ى فه‌یلى وه‌رزشى دامه‌زرانن، ك له‌گشت چالاكیه‌یل ژیان وه‌رزشى به‌شدار بوین، ك جاریگ وه‌پله‌ى دویه‌م سه‌ركه‌فت له‌ پاڵه‌وانیه‌تى عراق تووپ پا.

له‌مه‌یدان كومه‌ڵایه‌تییشش، له‌ساڵ 1946 كومه‌ڵه‌ى خوه‌ندگایه‌یل فه‌یلى دامه‌زرانن، ك خوه‌ندگاى شه‌وانه‌و ڕووژانه‌ ئه‌را ڕوڵه‌یل فه‌یلى و چینه‌یل تر له‌لى دامه‌زریاو شماره‌ى فره‌یگ له‌تى خوه‌ندن ته‌واو كردن له‌ كورد و عه‌ره‌ب و توركمان و مه‌سیحى و خاسترین مامۆستایه‌یل له‌تى ده‌رسدان. وه‌ل ئه‌وه‌یشا له‌ مه‌یدانه‌یل تر ژیانیش كورده‌یل فه‌یلى نه‌خش یا ده‌ور خاسیگ داشتنه‌.

 

له‌یس فه‌یلى