عه‌يد له‌ به‌غدا

شفق نيوز

ئمجا گشت مناڵه‌يل وه‌ جنگ تازه‌و جوان كورده‌واری كه‌فتيايمنه‌ شوون گه‌ورايه‌يل و ده‌سه‌ ده‌سه‌ روی كرديايمه‌ ماڵه‌يل قه‌وم وخيش وه‌خاتر عه‌يد بماركی( به‌ين خوه‌مان بوود با كه‌س نه‌زانيد عه‌يدانه‌ی فريه‌يگيش له‌و رووژه‌يل عه‌يده‌ جه‌مه‌و كرديايم بيجگه‌ عه‌يدانه‌ی باوگ و دايگمان)و گه‌ردن ئازايی له‌ يه‌كتری كرديان و نوقڵ و شرينی وه‌رگرتيايم.

ئه‌و ڕی وڕه‌سم عه‌يده‌ ك ئه‌وسا وجوود داشت ئيسه‌ ئاڵشت بويه‌و دی ئه‌وه‌ نه‌مه‌ندگه‌ بگه‌رديده‌ ماڵه‌يل ئه‌را عه‌يدمباره‌كی، ك بيگومان يه‌يش مانای له‌يه‌ك چه‌كيان په‌يوه‌ندی خيشايه‌تی و دويره‌و كه‌فتنه‌ له‌ يه‌كتری، ك جی داخه‌ ئيسه‌ جوور ئه‌وسا گرينگی وه‌و سووز و خوه‌شه‌ويسی و نزيكايه‌تيه‌ نادريه‌يد ك به‌ن ره‌حم و به‌زه‌يی بته‌وتر كردياد.

جاران عه‌يد له‌ به‌غدا تا وه‌رجه‌ چه‌ن ساڵيگيش ره‌نگ ڕوی عه‌يد وه‌پيه‌و ديار بوی و جايه‌ڵ جوانه‌يل تا راده‌يگ روی كرديانه‌ شوونه‌يل خوه‌شگوزه‌ری و پارك و دويرگه‌ی گه‌شتياری و دويرگه‌ی ئه‌عراس له‌ جادريه‌و پارك زه‌وراو شوونه‌يل تر گشتی ئه‌را وه‌سه‌ربردن وه‌خت خوه‌شيگ، وه‌لی جی داخه‌ ئمساڵ ئه‌وه‌نه‌ به‌دبه‌ختی و ده‌رده‌سه‌ری و كوشتن و بڕين و ته‌قينه‌وه‌ فشتره‌و بويه‌ نه‌ جايه‌ڵه‌يل و نه‌ مناڵه‌يليش تويه‌نن روی بكه‌نه‌ ده‌يشت و رووژه‌يل عه‌يد وه‌ خوه‌شی بگوزه‌رن.

ئمساڵ له‌ به‌غدا عه‌يد خه‌فتن و ئسراحه‌تكردنه‌ ئه‌را كارمه‌نده‌يل، ئه‌را جايه‌ڵه‌يليش عه‌يد قليانكيشان و بيده‌نگيه‌و، ئه‌را مناڵه‌يليش عه‌يد سه‌ركويچه‌يی و حه‌سره‌ت كاڵ و مه‌ترسيه‌ له‌ ته‌قينه‌وه‌يل له‌ناكاو!!.

دی عه‌يد ئمساڵ له‌ به‌غدا وه‌ی جووره‌ جوانه‌مه‌رگ بوی و مناڵ و گه‌وراو جايه‌ڵ جوانه‌يل نك ناهمی و هه‌ناسه‌ی سه‌رد له خوه‌شيه‌گه‌ی بيبه‌شن، هه‌ر وه‌و خاتريشه‌ ئويشيم هه‌واڵه‌ی سه‌به‌بكار وه‌ خودا له‌يوا ئی عراقه‌ شيواننه‌ يه‌كاو خوه‌شی و شادی مناڵه‌يلمان دزين و جايه‌ڵ جوانه‌يلمان حه‌سره‌تبار كردن و دڵ و ده‌روين باوگ و داڵگه‌يل وه‌ خه‌م سزانن.

جه‌ماڵ ئه‌ركه‌وازی