هویر نه‌ته‌وه‌یى كورد

شفق نيوز

نه‌ته‌وه‌ له‌بان زه‌وى، وه‌ل ئه‌وه‌یشا تویه‌نیم وه‌ فه‌قیرترین نه‌ته‌وه‌ تاریفى بكه‌یم ك هیمان نه‌ وڵاتیگ دیریدو نه‌یش هه‌قه‌یلى ده‌سه‌وه‌ر كریانه‌.

وه‌ل ئه‌و مێژوو كویه‌نه‌ ك نه‌ته‌وه‌گه‌مان دیرێده‌ى، هه‌ر له‌ ساڵه‌یل كویه‌ن تا ئیسه‌یش وه‌رده‌وام هه‌ر خه‌ریك راپه‌ڕین و خه‌بات و هه‌وڵ و ته‌قلا بویه‌و ته‌نانه‌ت ساڵه‌یلیگیش حوكمڕان بویه‌و حكوومه‌ت داشتگه‌و یه‌كیگیش له‌وانه‌ شه‌دادیه‌یل بوین ك ئه‌و حكوومه‌ته‌ له‌ساڵ 951زایینى پێكهات كه‌فتویده‌ ناونى ئازه‌ربایجان و ئیران، ك یه‌یش یه‌كه‌مین حكوومه‌ت كوردى بوى له‌شوون رمیان مادده‌یل.

نه‌ته‌وه‌ى كورد مێژوو كویه‌نیگ دیرێد له‌ڕوى جمشته‌یلى و هه‌ر له‌ سه‌رده‌مه‌یل كویه‌نه‌و هویر له‌ سه‌روه‌خوه‌یى و پێكهاوردن حكوومه‌ت كردگه‌و ئه‌و ئامانجیشه‌ وه‌ ته‌واوكه‌ر كێشه‌یل خوه‌ى و دڵنیابوین له‌ گه‌شه‌و ده‌سه‌وه‌ربوین هه‌قه‌یل خوه‌ى زانستگه‌.

له‌وه‌ر وجوود فشار فره‌یگ ، ك ساڵه‌یل دویرو دریژیگ هاتگه‌سه‌ بان نه‌ته‌وه‌ى كورد، داگیركه‌ره‌یل گشتیان یه‌ك له‌شوون یه‌ك ژیان ملله‌ت كورد تویش ئاواره‌یى و به‌دبه‌ختى و ماڵویرانى كردنه‌و ده‌سڵات خوه‌یان چه‌سپاننه‌و داڵگه‌یلمان سیه‌پووش كردنه‌و چاره‌نویس هه‌زاران له‌ رووڵه‌یل كوردمان نادیار كردنه‌و ئیسه‌یش مه‌زاره‌یلیان دیار نییه‌.

ئیمه‌ ئه‌گه‌ر ته‌ماشایگ گوزه‌یشته‌ بكه‌یم، مه‌حاڵه‌ رووژگاریگ خوه‌ش هاتویده‌ تویشمان، وڵاته‌یل داگیركه‌ر بیجگه‌ كوشتن و بڕین و داگیركردن ته‌نانه‌ت هانه‌ هویر ئه‌وه‌یش هویر و كه‌سایه‌تى و دین و زووانمانیش له‌لیمان زه‌فت بكه‌ن و له‌ناوى بوه‌ن، وه‌لى نیه‌ود هه‌میشه‌ تاوانه‌یل بخه‌یمنه‌ مل دوشمن، چوینكه‌ فره‌جاریش وه‌بى ئه‌وه‌ك خوه‌مان بزانیم له‌و پرۆسه‌ى داگیركاریه‌ ده‌سمه‌یه‌تیان ئه‌یه‌یم، ئه‌ویش تا ئه‌و راده‌ ك مناڵه‌یلمان فره‌جار له‌ قسه‌كردن وه‌ زووان كوردى شه‌رم بكه‌ن و فیشتر وه‌ زووان بیگانه‌ قسه‌ بكه‌ن یا دوینید وه‌ وه‌كارهاوردن وشه‌یل بیگانه‌ هس وه‌ ئارامى و دڵنیایى كه‌ن له‌وه‌ختیگ تێكه‌ڵى كه‌نه‌ ناو زووانه‌ كوردیه‌گه‌و قسه‌ وه‌پى كه‌ن.

وه‌ل ئه‌وه‌یشا دوینیم جنگه‌یل ره‌سه‌ن نه‌ته‌وه‌گه‌مان وه‌ راده‌ى فره‌یگ فه‌رامووش كریاگه‌و ته‌نیا مه‌گه‌ر له‌ بوونه‌یگ بكریه‌نه‌ وه‌ر، له‌یره‌ بیگانه‌ هویچ ده‌وریگ نه‌یرێد، به‌ڵكوو خوه‌مان ده‌سپیشخه‌ریم و هس نه‌ته‌وایه‌تیمان كزه‌و بویه‌، بیجگه‌ ئه‌وه‌یش مناڵه‌یلمان ك ئومید ئاینده‌ى نه‌ته‌وه‌گه‌مانن په‌روه‌رده‌یگ كوردانه‌ ناكریه‌ن و ته‌نانه‌ت ئه‌گه‌ر داوایش له‌لیان بكه‌یم كه‌میگ باس نه‌ته‌وایه‌تى كورد ئه‌رامان بكه‌ن، ئه‌وه‌ بیگومان له‌و لایه‌نه‌و چشت كه‌میگ زانن و فره‌جاریش له‌و چشته‌یلیشه‌ ك هووكاره‌ كریانه‌ له‌لى نافامن، ماناى ئه‌وه‌سه‌ وه‌ختیگ وه‌و به‌دبه‌ختیه‌ زانیم ك كاریگه‌رى خراویگ له‌بان ئاینده‌ى نه‌ته‌وه‌گه‌مان داشتگه‌و هس وه‌ ئاڵشتكارییگ خراو كه‌یم.

جه‌وهه‌ر مێرزا