چاره‌نویس وه‌ وكاله‌ت

شفق نيوز

جموجویل سیاسیانه‌. هه‌ر له‌وه‌ر ئه‌وه‌یش مه‌سه‌له‌ى چاره‌نویس كورد  له‌ڕوى خاك و هه‌قه‌یل ره‌واى ك ساڵه‌یل دویر ودریژیگه‌ شووڕش و خه‌بات ئه‌ڕاى كریاگه‌، هیمان ئاشكرا نیه‌و نه‌ڕه‌سیه‌سه‌ ئاست دڵنیایى و ئاسووده‌یى.

له‌عراق تازه‌ى دویاى رمیان و نه‌مه‌ندن رژیم دكتاتۆر و په‌یابوین سه‌رده‌م عراق دیموكراسى و فره‌یى ك تائیسه‌ چه‌ن جاریگه‌ حكوومه‌ت دامه‌زریه‌یگ و قانوون و ده‌ستووریگ وڵات به‌یگه‌ ڕییه‌و، وه‌لى هیمان چاره‌نویس ئیمه‌ى كورد له‌گشت ڕوییگه‌وه‌ وه‌ وكاله‌ته‌و ئه‌نجام نه‌گرتگه‌.

ئه‌را نموونه‌: مه‌سه‌له‌ى كه‌ركووك و ناوچه‌یل داوڕیاى له‌هه‌رێم كوردستان تائیسه‌یش یه‌كلاوه‌ نه‌ویه‌و نه‌ڕه‌سیه‌سه‌ خاڵ كووتایى و نیه‌زانیم چاره‌نویسى چوین و چه‌ بوود؟

فیدراڵیه‌تمان هیمان وه‌ كرده‌وه‌و له‌ژیر بڕیار ده‌ستوور عراق جموجویلیگ وه‌پى نه‌دریاگه‌و گیله‌شیون وه‌پى كریه‌یگ ، ك هه‌رچه‌نى لایه‌نه‌یلیگ هه‌وڵ جى وه‌جیكردن و چه‌سپاننى ده‌ن. ئه‌گه‌ریش بایمنه‌ بان مه‌سه‌له‌ى سه‌روه‌خوه‌یى ئه‌ویش هه‌ر قسه‌یگه‌و نیه‌زانیم له‌ئاینده‌ چه‌ له‌لى كه‌فیگه‌و؟

ئیمه‌ى ملله‌ت كورد فره‌ خوه‌شباوه‌ڕیم و لایه‌ن سووزدارى زاڵه‌ له‌بان ئیراده‌ى بته‌ومان، ئیمه‌ بایه‌سه‌ دویاى ئه‌و هه‌مگه‌ ساڵه‌یل چه‌وه‌ڕیكردن و ئه‌نفال و كیمیاواران و له‌ناوبردن وه‌جه‌م روڵه‌یلمان به‌ن خوه‌مان وه‌ ته‌واوى شله‌و نه‌كردایم ئه‌را لایه‌نه‌یل ده‌سڵاتدار له‌ حكوومه‌ت مه‌ركه‌زى به‌غداو پا له‌بان داواكاریه‌یلمان داگرتایم و هویچ وه‌ختیگ وه‌ دویاخستن كیشه‌یل رازى نه‌ویاتایم، چوینكه‌ مه‌سه‌له‌گه‌ ئه‌وه‌سه‌ خاوه‌ن هه‌ق زاڵه‌ له‌بان ناهه‌ق و داگیركاره‌یل، ئیمه‌یش نیه‌توایم وه‌ك مه‌سه‌له‌ى(كشمیر) نیمه‌ى خاك و نیشتمانه‌گه‌مان بكه‌یمنه‌ قوربانى، یا وه‌ك فلستین هه‌ر له‌خاكه‌گه‌ى داوڕیه‌یگ و دڵیان خوه‌شه‌ له‌ناو خاك خوه‌یان ژیه‌ن!! هه‌وڵ و ته‌قلاى سه‌ركرده‌یل كورد مایه‌ى شانازیه‌ ئه‌را ملله‌ت، وه‌لى نه‌بایه‌د هویچ وه‌ختیگ له‌هه‌قه‌یل كورد خوه‌ش بویاتان و كیشه‌ى چاره‌سه‌ر چشته‌یل فره‌یگ بایه‌سه‌ دویا نه‌خریاگ له‌لایه‌ن حكوومه‌ت مه‌ركه‌زى به‌غدا، چوینكه‌ تاڕووژ ئمڕوو سیاسه‌ت ئى حكوومه‌ت هه‌ڵوژریاگ به‌غدا رووشناییگ له‌باوه‌ت هه‌قه‌یل كورد وه‌پیه‌و دیار نیه‌و قسه‌یگ دڵخوه‌شكه‌ر له‌باوه‌ت مادده‌ى 140و باقى كیشه‌یل ناونى هه‌ولێر و به‌غدا وه‌ ته‌واوى چاره‌سه‌ر نه‌كردگه‌، یه‌یش ماناى ئه‌وه‌سه‌ ئیمه‌ گشت چشتیگمان وكاله‌ته‌و خاوه‌نداریه‌تى ته‌واویگ له‌بان خاك و ئاو خوه‌مانیش وه‌پیمان ره‌وا نیه‌دوینن. وه‌ل ئه‌وه‌یشا كه‌سه‌یلیگش هیمان هویچ هه‌قیگیمان وه‌ته‌واوى ناته‌سه‌و ده‌م له‌ سه‌روه‌خوه‌یى و ده‌وڵه‌تبوین كوتن و دى نیه‌زانن زه‌ره‌د و قانجازى چوینه‌و چاره‌نویس ئى خاك و ناوچه‌یل داوڕیاگه‌ ك كوردایه‌تى ره‌سه‌ن وه‌پیانه‌و دیاره‌ تاكوورا ره‌سیگ ؟! ئیمه‌ى كورد بایه‌سه‌ گام چه‌فت وه‌ره‌و چاره‌نویس نادیار نه‌نه‌یم، چوینكه‌ چاره‌نویسمان تا ئیسه‌ هه‌ر نادیار بوى و نه‌بایه‌د له‌یه‌ولا هه‌ق خه‌مسه‌ردى به‌یمنه‌ خوه‌مان.

 

ج.عه‌لى میرى