نه‌ورووزیگ ك سیاسه‌ت خراوى كرد، خاسه‌و بوود؟

شفق نيوز

 

وه‌لى نه‌ورووز ئمساڵ وه‌ تایبه‌ت ئه‌را ئیمه‌ كه‌میگ جیاوازى دیرید له‌ نه‌ورووز وه‌رین، ئه‌ویش وه‌ بوونه‌ى ده‌رئه‌نجامه‌یل ساڵ كوردى ك گوزه‌ر كردو هه‌میش له‌وه‌ر بار ئیسه‌ى عراق و مه‌ینه‌تیه‌یل و شه‌كه‌تى ملله‌ت عراقى و فراوانبوین ناكووكى له‌ ناونى پیكهاته‌یل و به‌رزه‌وبوین تون وتیژى و خوسه‌و كینه‌ت و پلانه‌یل وه‌خاتر زاڵبوین له‌بان بار گوزران ملله‌ت و شكه‌ستهاوردن وه‌ ئیراده‌ى، دى وه‌ هه‌ر شیوازیگ .

ئمساڵ عراق شوونیگ سه‌قامگیر نیه‌ ك مه‌ردم ئومید داشتوود سه‌ردانى بكاو نموونه‌یگیش له‌ دیموكراسیه‌ت سه‌ركه‌فتگ نیه‌ كه‌سه‌یل تر چه‌و له‌لى بووڕن، وه‌و خاتریشه‌ له‌وه‌ر وجوود ملیۆنه‌ها نه‌دار و یه‌تیم و سه‌دان هه‌زار بیوه‌ژن و بیكاره‌یل و له‌وه‌ر سیاسه‌ت ناوه‌رپرسانه‌ى خاوه‌ن بڕیاره‌یل، شایه‌ت بویشیم ك نه‌ورووز ئمساڵ مه‌ردم بكیشید وه‌ره‌و هه‌وارگه‌یل گه‌شتیارى و سه‌ردانكردن یه‌كترى و خاسه‌وكردن په‌یوه‌ندیه‌یل كومه‌ڵایه‌تى، وه‌لى ئایا ئه‌تویه‌نید په‌یوه‌ندیه‌یل گرژ سیاسى بتاونیده‌و له‌ مه‌ترسیه‌یل به‌رپابوین ئاگر ئاشووگه‌رى و له‌ شوونه‌وار كیشمه‌یش ناوخوه‌یى كه‌مه‌و بكا؟

ئه‌گه‌ر هات و یه‌كیگ له‌ مانایه‌یل نه‌ورووز ك وه‌پى ئوشین" رووژ نوو"خزمه‌ت بڕه‌سنید له‌روى كه‌مه‌وكردن ئه‌و خه‌مینیه‌ ك له‌بان خاك عراق و ئه‌گه‌ر گشتمان له‌بان سفره‌ى خوه‌شه‌ویسى نیشتمان جه‌مه‌و كرد و ئه‌گه‌ر ئاسوو تازه‌یگ واز كرد ئه‌را راسه‌وكردن ریڕه‌و و له‌ناوبردن تومه‌ت درووكانى و وشكه‌وكردن سه‌رچه‌وه‌یل كینه‌ت و كاڵین دووسى و سووزدارى، مه‌رحه‌با له‌لى.

نه‌ورووز جه‌شنیگ كورده‌، وه‌لى خوازیم له‌لى به‌تیه‌یگ بپووشید شوون عراقیه‌یل له‌ژیر ساى بووده‌وه‌و گشت مه‌ردم به‌شدار بوون له‌ هه‌ڵپه‌ڕگه‌ى و له‌وه‌رجه‌ گشتیانیش مه‌ردم ئازاردیده‌و زه‌ره‌دمه‌ن له‌ ئاكام سیاسه‌ته‌یل چه‌فت. ئیمه‌ حه‌ز ئه‌كه‌یم ئه‌و ئاگر كویه‌ن بڵیزه‌داره‌ چیلگ كینه‌ت بسزنیدو رووژ تازه‌یگ ده‌س وه‌پى بكه‌یم له‌بان بنه‌ماى فامیده‌یى راسكانى ماناى ئى جه‌شنه‌ ك ئه‌ویش قاوداین شه‌ڕه‌.

یه‌یش هویچ خه‌رجیگ نه‌یرید له‌بان ئه‌وانه‌گ گووشیان ناڵه‌وهاوار قوربانیه‌یل ترۆر و تون و تیژى تایفه‌گه‌رى ناژنه‌فیدو چه‌ویگ نه‌یرن رویداگه‌یل ئى عراقه‌ بوینید جوور ئه‌وه‌ك گشت دونیا دویننه‌ى، ئمجا سه‌خته‌ له‌بان ملله‌ت كورد له‌ قویلایى دڵیه‌و ئاهه‌نگ ساز بكاو دویر بوود له‌ باقى پیكهاته‌یل تر عراقى. دویاخریش ئویشم: خوه‌ش هاتن له‌ جه‌شن و له‌ خاوه‌ن و دووس و دڵسووزه‌یل نه‌ورووز و گشت ئه‌وانه‌گ خوه‌شاڵن وه‌و بوونه‌یله‌ ك خوه‌شى ئه‌خاده‌ دڵ مه‌ردم.

عه‌لى حسێن فه‌یلى

ج . أ