گله‌وخواردن رخه‌وبه‌ر ئه‌را كومار ترس و ئاكامه‌یل پڕ كاره‌سات ئاره‌زووه‌یل مالكى
وه‌لى هیمان مه‌ردمانیگ وه فكره‌یل كویه‌ن و چه‌سپیاگ و بى جموجویل و كاولكه‌ر و ڕخه‌وبه‌ریگه‌و ره‌فتار كه‌ن و له‌وانه‌یش: سه‌رۆك وه‌زیره‌یل عراقى، ك له‌خوه‌یا پرووسه‌ى عراقى مه‌سه‌له‌یگه ته‌نیا تایبه‌ته وه‌خوه‌ى. یه‌یش له‌وه‌ختیگ مه‌سه‌له‌گه له عراق یه‌كێتى وه گووره‌ى ده‌ستوور وه‌و جووره نیه ك چاره‌نویس و به‌رژه‌وه‌ندیه‌یل وه یه‌كه‌و گیر بكه‌ن و چاره‌سه‌ر نه‌یاشتوون.
وه‌ل ئه‌وه‌یشا بار ئیسه‌ى عراق و قه‌یرانه‌یل حكوومه‌ت و جیاوازیه‌یل ناونى به‌غداو هه‌رێم گرژه‌وبوین ئاسایش و تون وتیژى وه‌خوه‌یه‌و دیه، هه‌ر له‌وه‌ر ئه‌وه‌یش دوینیم ك پرووژه‌یل ئاینده له‌ى عراقه مه‌سه‌له‌یگ موڵكدارى نیه، به‌ڵكوو دید جه‌هانییگ دیرید ك ده‌وڵه‌ته‌یل و ده‌زگایه‌یل هه‌رێمى و ناوده‌وڵه‌تى به‌شدارى كه‌ن له شیواز و ئه‌نجامداینى.
له‌باوه‌ت مه‌سه‌له‌ى په‌لاماره‌یل ره‌سانن یا ئعلامى ئى دویاخریشه ك سه‌رۆك ئه‌نجوومه‌ن وه‌زیره‌یل عراقى سه‌رپه‌رشیان ئه‌كا وه‌ل راویژكاره‌یلیا دژ هه‌رێم كوردستان وه‌تایبه‌ت هه‌وڵ وه‌ده‌سهاوردن راى گشتى عراقى دژ سه‌رۆك هه‌رێم، یه‌یش كرده‌وه‌یل خراویگه‌و ئامانج له‌لى گله‌وخواردنه ئه‌را شیوانن فكر و پڕه‌وكردن گووش مه‌ردم وه‌ره‌و مه‌سه‌له‌ى نه‌ته‌وه‌یى و ژیر په‌رده‌ى دینى.
ئى ئاڵشتكاریه‌یله له گوزه‌یشته تاقیه‌و كریاو ئاكامه‌گه‌یشى سه‌ركردایه‌تیكردن به‌رپاكردن جه‌نگ بوى دژ ملله‌ت كوردستان ئاشتیخواز و ده‌وڵه‌ته‌یل هاوساو دروسكردن كومار ترس پڕ له ئاكام كاره‌سات.
سه‌رۆك ئه‌نجوومه‌ن وه‌زیره‌یل عراقى وه‌رجه چه‌ن ساڵیگ ده‌سكرده دامه‌زرانن هیزیگ نیمچه سه‌ربازى تایبه‌ت وه‌خوه‌ى له‌ژیر ناونیشان"سه‌حوه" تا په‌یوه‌س وه خوه‌یه‌و بوود و فه‌رمان له‌خوه‌ى وه‌ربگرن نه‌ك له كه‌سیگ تر، یه‌یش وه ئامانج نیشانداین بازوو خوه‌ى ئه‌را رخه‌وبردن مه‌ردم، دویاى ئه‌وه‌یش ده‌سكرده هاوردنه‌وه‌ى پیاوه‌یل رژیم وه‌رین له سوپاو مه‌له‌ف سه‌ربازى له پاریزگاى كه‌ركووك كوردستانى و ناوچه‌یل تر داوڕیاگ له‌هه‌رێم كوردستان دا ده‌س سه‌ركرده‌یگ به‌عسى ناسریاگ وه زه‌یدى، ك تویه‌نست تواناى خوه‌ى باریده‌كار و متمانه په‌یا بكا له‌لاى مالكى و بویه باڵ راسى له جیوه‌جیكردن فه‌رمانه‌یلى و سه‌ركردایه‌تیكردن سه‌ربازى و ئاسایش وه‌پى دریا ئه‌را وه‌ڕیه‌وبردن سه‌ركردایه‌تى عه‌مه‌لیات دجله، ك ئیمه‌یش خاس زانیم زه‌یدى شاره‌زایى فره‌یگ داشتگه له پاكسازى ره‌گه‌زى وه ئه‌وه‌ك له‌وه‌خت رژیم سه‌دام به‌شدارى كردگه له كاره‌سات ئه‌نفال ك زیاتر له 182 هه‌زار كه‌س كورد له‌تى بوینه قوربانى.
ئیمه له‌یوا دوینیم هه‌ر ئه‌نجامداینیگ كرده‌وه‌ى سه‌ربازى سه‌رۆك ئه‌نجوومه‌ن وه‌زیره‌یل له كوردستان پرووسه‌ى سیاسى وه‌ره‌و خراوى به‌یدو كاره‌سات و كاولكارى له‌لى كه‌فیده‌وه‌و هه‌ر هه‌وڵیگ ئه‌را لكانن سوپاى عراقى له جه‌نگ چینایه‌تى و ره‌گه‌زى وه‌ل هه‌رێم كوردستانا چه‌واشه‌ى ده‌ستووره‌و ئاكامه‌گه‌یشى ئه‌وه‌سه ك جاده‌ى كوردستانى متمانه‌یان وه سیاسیه‌یل عه‌ره‌ب نیه‌مینید له‌عراق فیدراڵى و داواى بڕیار چاره‌نویس ها له‌شوونى.
ئنجا وه‌ل ئه‌وه‌یشا ئاكام ئى گامه‌یل نادروسیشه فكره‌ى هاووڵاتیبوین شیونیدو ده‌زگاى دیموكراسى لوغمداره‌و ئه‌كاو مه‌ترسى نه‌ك وه ته‌نیا له‌بان هه‌رێم، به‌ڵكوو له‌بان عراق و عراقیه‌یلیش دیرید. دى ئه‌وه‌سه مالكى ئه‌وه له‌هویره‌و بردگه ك سه‌رده‌م نه‌ته‌وه‌یى نه‌مه‌ندگه.
ژیان له‌ى سه‌رده‌مه‌و ئاشنابوین وه‌ل ئى جه‌هان و جه‌هانگیریه ك پڕه له فكر و هووكاره‌یل سه‌رده‌م گوزه‌یشت، گشت ئه‌یانه نیشانه‌ى دویاكه‌فتنه له كاروان ژیار، چوینكه رووژگار ئمپراتۆریه‌ت دى نیایده دویاوه جوور ئه‌وه‌ك سه‌رۆك وه‌زیره‌یل هساو ئه‌ڕاى كردگه‌و خسته‌سه‌ى خه‌یاڵ خوه‌ى ته‌نیا مه‌گه‌ر وه‌شیوه‌یگ گه‌مه‌بازى و كارتۆنى و ترۆریستیانه له‌شوون رمیان رژیم به‌عس چینایه‌تیكه‌ر و شۆفێنى.
ئاشكراس ك جیاوازیه‌یل بنه‌ڕه‌تى ناونى هه‌رێم و حكوومه‌ت مه‌ركه‌زى مه‌سه‌له‌ى یاساى نه‌فت و غاز و دراوردن سامانه‌یل نه‌فتى له‌خاك كوردستان و مادده‌ى 140 ده‌ستوور و پێشمه‌رگه‌و بودجه نیه، به‌ڵكوو مه‌سه‌له‌گه په‌یوه‌سه وه دید نامه‌ده‌نى و نادیموكراسیه‌ت مالكى له‌وه‌رانوه‌ر گرینگترین هه‌قه‌یل ملله‌ت كوردستان ك ئه‌ویش هه‌ق ئابوورى و كوومه‌ڵایه‌تى و رووشنهویرى و هه‌قه‌یل مه‌ده‌نى و سیاسیه ك له‌لایه‌ن كوومه‌ڵه‌ى گشتى نه‌ته‌وه‌یل یه‌كگرت له‌ساڵ 1966 ئشاره‌ت وه‌پى كریاگه‌و مادده‌ى یه‌كه‌مى ئاشكراى ئه‌وه كردگه گشت ملله‌تیگ هه‌ق بریار چاره‌نویس و قه‌واره‌ى سیاسى و په‌ره‌داین وه ئابوورى و كوومه‌ڵایه‌تى و رووشنهویرى خوه‌ى دیرید وه ئازادى.
دویاخریش ئویشیم: سه‌ربازیكردن و گوشه‌گیركردن كوومه‌ڵگا هویچ نه‌فیگ وه عراق و مه‌ردمه‌گه‌ى ناڕه‌سنیدو نیه‌وده مایه‌ى مقه‌یه‌تیكردن وه‌ڕیه‌وبردن ده‌وڵه‌ت و ده‌سڵات یه‌كه‌میش ها له راسى و دادگه‌رى.
ج . أ
سامان سۆرانى.
