مقه‌یه‌ت گه‌رده‌لویل ترسناك بوون له‌كوردستان!

شفق نيوز

هاوردسه‌ى ده‌س وه‌ خوین خاسترین جایه‌ڵ جوانه‌یلى و له‌ئه‌نجام مه‌ینه‌تى ملله‌تیگ له‌و كاروانه‌ ك زیاتر له‌سه‌ده‌یگ كیشا.

ئمڕوو كوردستان نموونه‌یگ ژیارى تازه‌یگه‌و ڕى په‌ره‌سه‌ندن و پیشكه‌فتن گرته‌سه‌ وه‌ر له‌گشت مه‌یدانه‌یل ژیان، بیجگه‌ ئه‌وه‌یش ئیمه‌ نیه‌ویشیم كوردستان جویر ئه‌و شاره‌ وه‌پى هاتگه‌ ك فارابى تواسیاگه‌ى و نه‌یش كوتومت یا نوسخه‌یگه‌ له‌و كووماره‌ ك ئه‌فلاتۆن خه‌یاڵى كرد، چوینكه‌ خاسى و كه‌م وكوڕى فره‌یگیش دیریگ و نیه‌وگ جیاى بكه‌یمنه‌وه‌ له‌و مه‌سه‌له‌یل كوومه‌ڵایه‌تى و ئابوورى و سیاسى قورسه‌ ك كه‌ڵه‌كه‌ بوین وه‌ سه‌به‌ب وه‌زعه‌یل ناسروشتى كوردستان و ئاست رووشنهویرى ك نیه‌ڕه‌سیگه‌ قه‌بولكردن یه‌كترى.

وه‌رجه‌ رووژه‌یلیگ یه‌كیگ له‌ قه‌واره‌یل سیاسى ئۆپۆزسیۆن به‌یانیگ ده‌ركرد و له‌تى داواى لاوردن حكوومه‌ت و په‌رله‌مان كرد، ك له‌هویرى چیه‌ خوه‌ى به‌شداره‌ له‌تى وه‌ بڕ نزیكه‌ى چوار یه‌كى ئه‌ندامه‌یل په‌رله‌مان و له‌یوا زانیگ پرووسه‌گه‌ جووریگه‌ له‌ گه‌مه‌بازى. قه‌واره‌گه‌ وتیاگ گوایا وه‌زع گوزه‌ران له‌ هه‌رێم خراوه‌، وه‌لى وه‌ به‌راورد وه‌ل ئاست وه‌زع ناوچه‌یل تر ده‌یشت هه‌رێم جویر ئه‌وه‌ك له‌ ڕاپۆرت ریكخریاگه‌یل ناوده‌وڵه‌تى هاتگه‌، دوینیم ئه‌و شماره‌ى عراقیه‌یله‌ ك له‌ژیر ئاست فه‌قیریه‌وه‌ ژیه‌ن له‌ كوردستان فره‌ كه‌متره‌ له‌وه‌ك له‌ ناوڕاس و باشوور عراق ژیه‌ن.

له‌لایه‌ن په‌ره‌سه‌ندن ژیارى و زانستییشن، بیگومان شماره‌ى خوه‌ندگاو په‌یمانگاو زانكۆیه‌یل وه‌ به‌راورد وه‌ل شماره‌ى ده‌یشت هه‌رێما، دیاره‌و ئاشكراس. له‌باوه‌ت ئازادى ڕاده‌رخستن و چالاكیه‌یل ره‌سانن یا ئعلامى و رووژنامه‌گه‌رى له‌ كوردستان، فره‌ پیشكه‌فتگه‌و له‌هه‌مان وه‌خت وه‌ل راپه‌ڕینه‌گه‌ى ئادار پیرووز له‌سه‌ره‌تاى ساڵه‌یل نه‌وه‌د سه‌ده‌ى گوزه‌یشت ده‌س وه‌پیكرد، ئه‌ویش له‌وه‌ختیگ  ك عراقییگ نه‌تویه‌نست ته‌نانه‌ت له‌ ژیر لیویشه‌وه‌ ته‌نیا وشه‌یگ بویشیگ و لاده‌ر بووگ له‌فكره‌ى حزب سه‌ركرده‌و دكتاتۆر، وه‌لى له‌ى رووژگاره‌ ئازادى ره‌سانن مه‌رزداره‌و هه‌ر شوونیگ وه‌ گووره‌ى فكر سیاسى و زاڵبوین حزبى ناوچه‌گه‌س، ك له‌زوورم پاریزگایه‌یل عراقى مه‌سه‌له‌ى ره‌سانن وه‌رته‌نگه‌، وه‌لى سه‌قامگیرى وه‌زع ئاسایش له‌كوردستان وه‌ جووریگه‌ ك مایه‌ى شانازى هه‌رێمه‌و ئه‌وه‌سه‌ سه‌رمایه‌گوزارى بیگانه‌ له‌تى ره‌سیه‌سه‌ زیاتر له‌ 13 ملیار دۆلار له‌وه‌ختیگ ك ئیسه‌ حكوومه‌ت مه‌ركه‌زى سه‌رنه‌كه‌فتگه‌ له‌ى مه‌یدانه‌وه‌.

نویسانن ئى باوه‌ته‌ له‌وه‌ر خاتر سووكایه‌تیكردن وه‌ قه‌واره‌یگ سیاسى نیه‌، یا تاوانباركردن لایه‌نیگ ئۆپۆزسیۆن نیه‌، به‌ڵكوو له‌ هه‌ڵویستیگه‌وه‌ ده‌رچووگ ك جویر یه‌ك نوڕیگه‌ گشت ئه‌و قه‌واره‌یل سیاسیه‌وه‌ ك له‌بان خاك كوردستان ئه‌نجام كاره‌یلیان ده‌ن، له‌هه‌مان وه‌خت ئاگادارییگه‌ ئه‌را ئه‌وه‌ك نه‌كه‌فنه‌ دام كاره‌سات و دویاخر ئه‌نجامه‌گه‌ى خراو له‌لى بكه‌فیگه‌وه‌، وه‌ هه‌ر حاڵ نیه‌وگ به‌راورد وه‌زع كوردستان وه‌ ڕویداگه‌یل تونس یا مسر یا هه‌ر ده‌وڵه‌تیگ تر بكه‌یم، چوینكه‌ كووماره‌یل فره‌یگ هه‌س ئاڵشت بوین ئه‌را دكتاتۆریه‌ت و خراوتر له‌رژیمه‌یل پاشایه‌تى سته‌م له‌ ملله‌ته‌یلى كرد ئه‌را ساڵه‌یل دویر ودریژیگ وه‌ناو ئازادى و دیموكراسى.

ئه‌و كیشه‌و گرفته‌یله‌ ك ئشاره‌ت وه‌پى كریاگه‌ له‌مه‌یدان كوردستانى، هویچ وه‌ختیگ مه‌حاڵ نیه‌ ئه‌را چاره‌سه‌ر و هیمان شوون فره‌یگ هه‌س ئه‌را دانیشتن له‌بان مێز گفتوگوو، چوینكه‌ هه‌رچه‌نى ئمڕوو ئۆپۆزسیۆنن یا هویر و ڕایان جیاوازه‌، وه‌لى تا دویه‌كه‌ى نزیكیگ  له‌ خه‌بات چه‌كدارى له‌ناو یه‌ك سه‌نگه‌ر بوین و ئامانجیان یه‌كیگ بوى و له‌وه‌ر خاتر ئازادى و هه‌ق ملله‌ت كوردستان خه‌بات كردیان، هه‌ر له‌وه‌ر ئه‌وه‌یش ئویشیم: زه‌رده‌خه‌نه‌ بخه‌نه‌ بان لیو مناڵه‌یل كوردستان و ئه‌سر چه‌وه‌یل داڵگه‌یل بسڕن، داواكاریمان ئه‌وه‌سه‌ مقه‌یه‌ت گه‌رده‌لویل ترسناك بوون له‌ كوردستان له‌شوون ئه‌وه‌ك ملله‌ت ئازاد بوى له‌ده‌س زاڵم و سته‌مكار.