ژيانيگ بى خوه‌شه‌ويسى ژيان نيه‌

شفق نيوز

دياره‌ جياوازى فريه‌يگ هه‌س له‌ناونى ئشق راسكانى و ئشق ساخته‌، يه‌كيگ له‌و جياوازيه‌يليشه‌ راسگوويى و درووه‌، وه‌ل ئه‌وه‌يشا هووكاره‌يل فريه‌يگ هه‌ن له‌ناو ئشق راسكانى و له‌وانه‌يش: يه‌ك دڵى و مه‌يلكيشانن و رۆمانيسه‌ت، ئه‌يانه‌ له‌بان ئاشق حاكمن، دووسدارييش جوور هه‌ر كاريگ تر يايگرتن و مه‌شقكردنه‌، چوينكه‌ نيشانه‌يل ئشق سووزداريه‌ ك وه‌شيوه‌يگ شارياگ و ئاشكرا له‌باوه‌ت ره‌گه‌ز وه‌رانوه‌ره‌و ده‌رخريه‌ێد.

ئشق باوه‌تيگ سه‌خت و چه‌ن لايه‌نه‌، ئاڵشت وئوڵشت خوه‌شه‌ويسى و ميهره‌بانيه‌، رووحيگ ئنسانيه‌، ئمجا وه‌و خاتره‌ ك خوه‌ش كه‌سه‌يل وه‌رانوه‌ر بتواێد، بايه‌سه‌ نيشلنى بيه‌ێد ك خوه‌شى ئه‌تواێد، ئشق ئه‌را ره‌گه‌ز وه‌رانوه‌ر ديارده‌يگ مه‌يلكيش و نرخداره‌ ك ژيان ئاده‌ميزاد پڕ ئه‌كا له‌ وزه‌و شادى، جارجاريگيش ئشق ئه‌دێده‌ هووكار ئالشتكردن ئاده‌ميزاد، ئازايه‌تى و جورئه‌ت وه‌پى ئه‌ياد و ترس و شه‌رم نايلێد،وه‌نا ئاده‌ميزاد ناتويه‌نێد قوربانى بيه‌ێد ئه‌را هه‌ر چشتى ك خوه‌شى بتواێد.

ئشق ها بان گشت چشتيگه‌و، مه‌رز نه‌يرێد، ئاده‌ميزاد ئه‌كاده‌ ئه‌فسانه‌و ئارام له‌لى ئه‌وڕێد، ئشق راسكانى ئه‌وه‌ خوه‌شه‌ويسييه‌سه‌ ك زووان پيكهاتن گه‌ردوونه‌و ئه‌ژنه‌ويمنه‌ى، جوور ئه‌وه‌گ مه‌ولانا ئويشێد"له‌ دونيا چه‌ بوود ئشقه‌، دى چشته‌يل تر قسه‌ى هويچ و پويچه‌".

ئه‌وه‌گ ئشق له‌ شوونى وێڵه‌ په‌ياكردن مانايگ پاكه‌ ئه‌را ژيان، له‌يرا ئويشيم هه‌قيقه‌ت ئشقه‌، ئشقيش ژيان ئازاده‌، هه‌ر وه‌و خاتريشه‌سه‌ ك ئشق هووكاره‌ى گه‌وراييمان ئه‌كا، وه‌لێ ريخوه‌شكه‌ره‌ ئه‌را ئه‌وه‌كيش له‌وه‌ر خاترى گشت جووره‌ سه‌رشيتييگيش بكريه‌ێد، ئمجا له‌يرا ئشق قوربانى ئه‌راى ئه‌ياد و راسگوويانه‌ مامڵه‌ ئه‌كا.

له‌ڕاسى ژيانيگ وه‌بى ئشق به‌تاڵه‌ له‌ وزه‌و شادى، ئاده‌ميزاده‌يل ته‌ندروس و سه‌ڵامه‌ت ئاماده‌گى ئاشقبوين ديرن ديرن و هه‌ر وه‌ كرده‌وه‌يش تام ئشق ئه‌كه‌ن، وه‌ل ئه‌وه‌يشا ئامانج سه‌ره‌كى ئشق پرووسه‌ى هاوسه‌رگيريه‌، چوينكه‌ وه‌بى ئشق و خوه‌شه‌ويسى ماڵه‌يل به‌تاڵن، له‌وه‌ر ئه‌وه‌گ ئشق راسكانى دويره‌ له‌ به‌رژه‌وه‌ندى ماددى و هه‌ر به‌رژه‌وه‌ندييگ تر، چوينكه‌ ته‌نيا رووح له‌تى باڵاس و له‌يرايش ئه‌تويه‌نيم ئه‌را چه‌ن جووريگ دابه‌ش بكه‌يم، جوور"ئشق رۆمانسى، ئشق ئه‌فلاتۆنى، ئشق زاهيرى، ئشق هويچ وبه‌تاڵ، ئشق يه‌كلايه‌نى، ئشق دروو، ئشق راسكانى و هه‌قيقى" ك هه‌ر يه‌ك له‌يانه‌ ماناى تايبه‌ت خوه‌ى ديرێد.

ئمجا هه‌رچه‌نى ته‌كنۆلۆجيايش لايه‌ن رووحى ئشق كاڵه‌و كردگه‌، وه‌لێ بيگومان رووح پاك مه‌حاڵه‌ گووم بدێ، ماناى ئه‌وه‌سه‌ مادام هه‌ردوگ ره‌گه‌ز له‌ خاك دروس كريانه‌و ئه‌را خاك چنه‌و، خوه‌شتره‌ ئشق خوه‌مان وه‌ل ئشق خاك و نيشتمانيش تيكه‌ڵ بكه‌يم و په‌يوه‌سيان وه‌ يه‌كه‌و بكه‌يم، چوينكه‌ ئه‌گه‌ر نيشتمان سه‌لامه‌ت بوى، ئه‌وه‌ خوه‌شه‌ويسيمان سه‌لامه‌ت ئه‌دێ و دوياخريش له‌ به‌هه‌يشتيگ داكراسيه‌يم و خيزانيگ به‌خته‌وه‌ر و كومه‌ڵگايگ دروس دامه‌زريه‌ێد، دى ماناى ئه‌وه‌سه‌ با كوردستانه‌گه‌مان خوه‌ش بتوايم.

سۆران